MUKANDA MUTUMINA BENA KOLOSAYI

1 Meme Paulo, mupostolo wa Kristo Yezu ku disua dia Nzambi, ne muanetu Timote,+ 2 kudi bansantu ne bana betu ba lulamatu mu buobumue ne Kristo badi ku Kolosayi:

Ngasa ne ditalala bia kudi Nzambi Tatu wetu bikale nenu.

3 Tudi tuela Nzambi, Tatu wa Mukalenge wetu Yezu Kristo, tuasakidila misangu yonso patudi tusambila bua bualu buenu, 4 katshia tumvua lumu lua ditabuja dienu mu Kristo Yezu ne dinanga dinudi nadi bua bansantu bonso 5 bua ditekemena didibu banulamine mu diulu.+ Nukavua bumvue kumpala lumu lua ditekemena edi ku diambuluisha dia mukenji wa bulelela wa lumu luimpe 6 ludi lufike kunudi. Anu bu mudi lumu luimpe lukuama mamuma ne luvulangana pa buloba buonso,+ ke mudibi kabidi bienzeka munkatshi muenu katshia ku dituku dinuvua bumvue ne bamanye ngasa wa Nzambi mu bulelela mu mushindu mujalame. 7 Ke tshinudi balongele kudi Epafa,+ mupika netu munanga, udi muena mudimu wa Kristo wa lulamatu pa muaba wetu. 8 Yeye uvua kabidi mutuambile bua dinanga dienu dia mu nyuma.*

9 Ke bualu kayi kabidi, katshia ku dituku dituvua bumvue bualu ebu, katutu banji kulekela kusambila bua bualu buenu+ ne kulomba bua nuwujibue tente ne dimanya dijalame+ dia disua diende mu meji onso ne dijingulula dionso dia mu nyuma,+ 10 bua numone mua kuenda mu mushindu udi muakanangane ne Yehowa* bua kumusankisha mu malu onso panudi nuenda nukuama mamuma mu mudimu wonso muimpe ne nuvudija dimanya dijalame dia Nzambi;+ 11 ne bua nukoleshibue ne bukole buonso bilondeshile bukole buende bua butumbi+ bua numone mua kunanukila tshishiki ne lutulu ne disanka, 12 panudi nusakidila Tatu udi munuvuije bakumbane bua kuabanyangana bumpianyi ne bansantu+ badi mu butoke.

13 Wakatusungila ku bukokeshi bua mîdima+ ne wakatubueja mu bukalenge bua Muanende munanga 14 utudi tupikudibua ku butuangaji buende ku diambuluisha dia tshia kupikulangana natshi, dibuikidibua dia mpekatu yetu.+ 15 Yeye udi tshimfuanyi tshia Nzambi udi kayi umueneka,+ muanabute wa bifukibua bionso;+ 16 bualu ku diambuluisha diende bintu bikuabu bionso biakafukibua mu diulu ne pa buloba, bintu bidi bimueneka ne bintu bidi kabiyi bimueneka,+ nansha biobi bikale nkuasa ya makalenge anyi mamfumu anyi mbulamatadi anyi makokeshi. Bintu bikuabu bionso mbifukibue ku butuangaji buende+ ne bua bualu buende. 17 Yeye udi kabidi kumpala kua bintu bikuabu bionso,+ ne ku diambuluisha diende bintu bikuabu bionso biakafukibua, 18 ne yeye udi mutu wa mubidi, mbuena kuamba ne: tshisumbu.+ Yeye udi tshibangidilu, muanabute wa munkatshi mua bafue,+ bua alue muntu udi wa kumpala mu malu onso; 19 bualu Nzambi wakanyisha bua tshiuwidi tshionso tshisombele munda muende,+ 20 ne bua kufikisha kabidi bintu bikuabu bionso ku dilengejangana nende ku butuangaji buende+ pa kuteka ditalala ku diambuluisha dia mashi+ avuaye muele panshi ku mutshi wa makenga,* nansha biobi bikale bintu bia pa buloba anyi bintu bia mu diulu.

21 Bulelela, nuenu bavua ku kale kule ne bikale bena lukuna bu muvua lungenyi luenu lutuma ku midimu mibi, 22 mpindieu mmunufikishe ku dilengejangana nende ku diambuluisha dia mubidi wa musunyi wa yeye au, ku butuangaji bua lufu luende, bua anuleje kudiye bikale ba tshijila, kanuyi kalema ne kakuyi tshia kunubandabu natshi kumpala kuende,+ 23 kadi anu nuenu batungunuke bushuwa mu ditabuja,+ bajalamijibue pa tshishimikidi+ ne bashindame,+ kanuyi nusesuishibua kule ne ditekemena dia lumu luimpe lunuvua bumvue alu ne luvuabu bayishe munkatshi mua bifukibua bionso bidi muinshi mua diulu.+ Meme Paulo, ngakalua muena mudimu wa lumu luimpe elu.+

24 Ndi nsanka mpindieu mu makenga andi nawu bua bualu buenu,+ ne ndi ngenda nkenga makenga a Kristo atshidi mapangike mu mubidi wanyi bua bualu bua mubidi wende+ udi tshisumbu.+ 25 Ngakalua muena mudimu wa tshisumbu etshi mu diumvuangana ne mudimu wa kulama bintu+ wa kudi Nzambi uvuabu bampeshe bua bualu buenu bua kuyisha dîyi dia Nzambi menemene, 26 bualu busokoka bua tshijila+ buvuabu basokoke katshia ku ndongoluelu ya malu ikadi mipite*+ ne ku bipungu bia bantu bikadi bipite. Kadi mpindieu, mbabubuluile bansantu bende+ 27 badi Nzambi muanyishe bua kumanyisha bubanji bua butumbi bua bualu busokoka bua tshijila+ munkatshi mua bisamba bikuabu, budi buikale Kristo mu buobumue nenu, ditekemena dia butumbi buende.+ 28 Yeye ke utudi tumanyisha, tudimuija muntu yonso ne tulongesha muntu yonso mu meji onso, bua tumone mua kuleja muntu yonso mukumbane mu buobumue ne Kristo kudi Nzambi.+ 29 Bua bualu ebu, ndi ngenza mudimu mukole bulelela, ndienzeja ne bukole buende budi buenza mudimu munda muanyi ne bukole buonso.+

2 Bualu ndi musue bua nufike ku dimanya mundi nduangana bikole bua bualu buenu ne bua badi ku Laodikiya+ ne bua bonso badi kabayi banji kummona tshimona mêsu.* 2 Ndi ngenza nunku bua kusamba mioyo yabu+ ne bua bikale basuikakane pamue bimpe mu dinanga+ ne bua bikale ne bubanji buonso budi bufumina ku dishindika dionso dia dijingulula diabu dia malu, bua bapete dimanya dijalame dia bualu busokoka bua tshijila bua Nzambi, mbuena kuamba ne: Kristo.+ 3 Bubanji buonso bua meji ne bua dimanya mbusokoka munda muende bimpe menemene.+ 4 Ndi ngamba nunku bua muntu kanushimakaji ne ngenyi ya kuitabijijangana nayi malu to. 5 Nansha mundi tshiyi nenu mu mubidi, ndi nenu mu nyuma, nsanka bua kumona bulongame buenu buimpe+ ne bukole bua ditabuja dienu mu Kristo.+

6 Nunku anu bu munudi bitabe Kristo Yezu Mukalenge, tungunukayi ne kuenda mu buobumue nende, 7 bele miji, bibakibue munda muende+ ne bajalame mu ditabuja,+ anu bu muvuabu banulongeshe, ne buwujibue tente ne disakidila.+

8 Nudimuke bua muntu nansha umue kanukuatshi* ku diambuluisha dia nkindi ne mashimi a patupu+ bilondeshile bilele bia bantu, bilondeshile malu a ntuadijilu a panu, kabiyi bilondeshile Kristo; 9 bualu munda muende ke mudi tshiuwidi tshionso tshia bunzambi tshisombe mu mubidi.+ 10 Nunku nudi bapete tshiuwidi tshionso ku diambuluisha diende yeye udi ku mutu kua mbulamatadi yonso ne bukokeshi buonso.+ 11 Bua malanda enu nende, nuvua kabidi batengudibue ne ditengudibua mu diumbusha mubidi wa musunyi,+ mu ditengudibua didi dikale dia Kristo didi kadiyi dienza ku bianza.+ 12 Bualu nuvua bajiikibue nende mu dibatiza diende,+ ne bua malanda enu nende bavua kabidi banujule+ pamue ku diambuluisha dia ditabuja dinudi nadi mu mudimu wa bukole wa Nzambi uvua mumujule ku lufu.+

13 Bualu bukuabu, nansha munuvua bafue mu bilema bienu ne mu dikala kanuyi batengudibue ku mubidi, Nzambi wakanuvuija ne muoyo pamue nende.+ Wakatufuila tuetu bonso luse bua bilema bietu ne bulenga buonso+ 14 ne wakakupula* mukanda uvuabu bafunde ku tshianza+ uvua ne mêyi mela+ uvua utuluisha.+ Mmuwumbushe pavuaye muwupopele ku mutshi wa makenga.*+ 15 Mmushiye mbulamatadi ne makokeshi tshianana ne mmubileje patoke bu bintu bitshimuna,+ ubilombola mu luendu lua ditshimuna ku diambuluisha dia mutshi wa makenga.*

16 Ke bualu kayi, muntu kanulumbuluishi bua tshinudi nudia ne nunua+ anyi bua dienza tshibilu kampanda anyi disekelela dia dibala dia ngondo+ anyi dia nsabatu.+ 17 Malu au adi mundidimbi wa malu adi ne bua kulua,+ kadi bulelela buawu budi kudi Kristo.+ 18 Kabanunyengi difutu+ kudi muntu nansha umue udi musue didipuekesha dia dishima ne mushindu kampanda wa ntendelelu wa banjelu, “muikale weyemena”* malu adiye mumone. Mu bulelela, udi udiuwuja kakuyi bualu bua nsongo ku lungenyi luende ludi ku malu a mubidi, 19 ne ki mmulamate kudi mutu,+ kudi yeye udi ku butuangaji buende mubidi mujima udishibua ne ulamakajibua pamue bimpe ku diambuluisha dia manungu awu ne bijilujilu biawu, ne ukoleshibua ne dikola didi difumina kudi Nzambi.+

20 Binuikala nuvua bafue pamue ne Kristo mu malu a ntuadijilu a panu,+ bua tshinyi nudi nuenza malu bu batshidi mu ba panu pa kutungunuka ne kukokela mêyi matuma+ a ne: 21 “Kuangatshi, anyi kulabudi, anyi kulengi,” 22 adi akula bua malu adi ajimina onso ne mudimu wawu, bilondeshile mêyi matuma ne malongesha bia bantu?+ 23 Nansha mudi malu au amueneka bu a meji mu mushindu wa kutendelela udi bantu baditekele ne mikale ne didipuekesha dia dishima, dikengesha dikole dia mubidi,+ kaena ne mushinga mu diluisha disankisha dia mubidi to.

3 Kadi bikalabu bavua banujule ku lufu ne Kristo,+ tungunukayi ne kukeba malu a muulu mudi Kristo musombe ku tshianza tshia balume tshia Nzambi.+ 2 Nushale bateke meji enu ku malu a muulu,+ ki nku malu a pa buloba+ to. 3 Bualu nuvua bafue, ne muoyo wenu mmusokoka pamue ne Kristo mu buobumue ne Nzambi. 4 Padi Kristo muoyo wetu+ umueneshibua, dîba adi nenumueneshibue penu nende mu butumbi.+

5 Ke bualu kayi, fuishayi bitupa bienu bia mubidi+ bidi pa buloba pa bidi bitangila masandi,* malu a bukoya, majinga a kusangila adi kaayi bukuatshi,+ majinga a kuenzelangana bibi, ne lukuka, ludi kutendelela kua mpingu. 6 Tshiji tshia Nzambi tshidi tshilua bua malu aa. 7 Ke munuvua nuenu penu nuenza malu* mu nsombelu wenu wa kale.*+ 8 Kadi mpindieu, nudi ne bua kulekela bintu ebi bionso: bumfiika munda, tshiji, malu mabi,+ bipendu,+ ne mêyi a busenji+ mukana muenu. 9 Kanushimianganyi to.+ Vulayi bumuntu* bua kale+ ne bienzedi biabu, 10 nuvuale bumuntu bupiabupia budi buvuijibua bupiabupia+ ku dimanya dijalame bilondeshile tshimfuanyi tshia Yeye wakabufuka,+ 11 mudi kamuyi muena Greke anyi muena Yuda, ditengudibua anyi dibenga kutengudibua, muntu wa ku babende, muena Sekutia,* mupika, anyi muntu mudikadile; kadi Kristo udi malu onso ne mu bionso.+

12 Nunku bu bantu badi Nzambi musungule,+ ba tshijila ne banangibue, vualayi dinanga dikole didi ne luse,+ vualayi kabidi bulenga, didipuekesha,*+ bupole+ ne lutulu.+ 13 Nutungunuke ne kulejangana lutulu ne kufuilangana luse ne muoyo mujima+ nansha muntu yeye tshilumbu ne mukuabu.+ Anu bu muvua Yehowa* munufuile luse ne muoyo mujima, nuenu penu nudi ne bua kuenza nanku.+ 14 Kadi pa kumbusha malu aa onso, nuvuale dinanga,+ bualu didi tshisuikidi tshipuangane tshia buobumue.+

15 Bualu bukuabu, ditalala dia Kristo dilombole mioyo yenu,*+ bualu nuvua babikidibue ku ditalala adi mu mubidi umue. Nuikale kabidi bena dianyisha. 16 Dîyi dia Kristo disombe munda muenu menemene ne meji onso. Nutungunuke ne kulongeshangana ne kukoleshangana* ne misambu,+ misambu ya kutumbisha nayi Nzambi ne misambu ya mu nyuma mimba ne dianyisha,* nuimbila Yehowa* mu mioyo yenu.+ 17 Malu onso anudi nuenza mu mêyi ne mu bienzedi, nuenze malu onso mu dîna dia Mukalenge Yezu, nuela Nzambi Tatu tuasakidila ku butuangaji buende.+

18 Nuenu bakaji, kokelayi babayenu,+ anu bu mudibi bikumbane mu Mukalenge. 19 Nuenu balume, tungunukayi ne kunanga bakaji benu+ ne kanuikadi nabu ne tshiji tshikole.*+ 20 Nuenu bana, tumikilayi baledi benu mu malu onso,+ bualu kuenza nunku kudi kusankisha Mukalenge. 21 Nuenu batatu, kanuikadi nufiikisha bana benu munda,*+ bua kabateketshi ku muoyo.* 22 Nuenu bapika, tumikilayi bantu badi bamfumu benu ba ku mubidi* mu malu onso,+ ki nganu padibu banutangile, anu bua kusankisha bantu,* kadi nubatumikile ne muoyo mujima, ne ditshina dia Yehowa.* 23 Malu onso anudi nuenza, nuenze ne anyima wenu yonso* bu badi baenzela Yehowa,*+ kanuyi bu badi baenzela bantu, 24 bualu nudi bamanye ne: nenupete bumpianyi kudi Yehowa* bu difutu.+ Enzelayi Mfumu Kristo mudimu bu bapika. 25 Bulelela, muntu udi wenza bualu bubi nebamufute bua bubi budiye muenze,+ ne kakuena kansungansunga+ to.

4 Nuenu bamfumu, enzelayi bapika benu malu ne buakane, mu mushindu muimpe, bamanye ne: nuenu penu nudi ne Mfumu mu diulu.+

2 Nusuminyine mu disambila,+ nushala batabalamu ne kusakidila.+ 3 Panudi nuenza nunku, nusambile kabidi buetu tuetu,+ bua Nzambi unzulule tshiibi bua dîyi, bua tumone mua kumanyisha bualu busokoka bua tshijila bua Kristo budibu bansuikile nkanu,+ 4 ne bua meme kubumanyisha mu mushindu udi umvuika bimpe anu bu mundi ne bua kubumanyisha.

5 Tungunukayi ne kuenda ne meji kumpala kua bantu badi pambelu, nukuata mudimu bimpe menemene ne dîba dienu.*+ 6 Mêyi enu ikale mashême misangu yonso, mela mukele,+ bua numanye munudi ne bua kuandamuna muntu yonso.+

7 Tukiko,+ muanetu munanga, muena mudimu wa lulamatu ne mupika nanyi mu Mukalenge, neanuambile malu anyi onso. 8 Ndi nnutuminaye bua numanye mutudi, ne bua asambe mioyo yenu. 9 Udi ulua ne Onezimo + muanetu munanga udi ne lulamatu udi mufumine kuenu aku; nebanuambile malu onso adi enzeka kuneku.

10 Alistâko+ muena lukanu nanyi udi unuela muoyo, ne Mâko+ mulela wa Bânaba (muena mikenji inuvua bapete bua kuakidila bimpe+ yeye mulue kunudi), 11 ne Yezu udibu babikila ne: Yusto, badi munkatshi mua bantu batengula. Anu bantu aba ke badi benzejanganyi nanyi ba mudimu bua Bukalenge bua Nzambi, ne bobu badi bansamba bikole.* 12 Epafa,+ mupika wa Kristo Yezu udi mufumine kuenu aku, udi unuela muoyo. Udi udifila bikole mu masambila bua bualu buenu misangu yonso, bua ndekelu wa bionso nujalame bakumbane tshishiki, bikale ne dishindika dikole mu disua dionso dia Nzambi. 13 Bualu ndi njadika bualu buende ne: udi udifila ne muoyo mujima bua bualu buenu ne bua badi ku Laodikiya ne bua badi ku Hielapoli.

14 Luka,+ munganga munangibue, udi unuela muoyo, ne Dema+ kabidi. 15 Elayi bana betu ba ku Laodikiya muoyo ne muanetu wa bakaji Numpa ne tshisumbu tshidi mu nzubu muende.+ 16 Pabalabu mukanda eu munkatshi muenu, nuenze bua bawubale+ kabidi mu tshisumbu tshia bena Laodikiya ne bua nuenu penu nubale wa ku Laodikiya. 17 Nuambile kabidi Âkipo+ ne: “Dimuka bua mudimu uuvua muitabe mu Mukalenge bua umone mua kuwenza.”

18 Eu mmuoyo wanyi, meme Paulo, wa ku tshianza tshianyi.+ Tungunukayi ne kuvuluka nkanu yanyi+ ya buloko. Ngasa ikale nenu.