MUKANDA WA KUMPALA MUTUMINA BENA TESALONIKE

1 Meme Paulo ne Siluano*+ ne Timote,+ kudi tshisumbu tshia bena Tesalonike mu buobumue ne Nzambi Tatu ne Mukalenge Yezu Kristo:

Ngasa ne ditalala bikale nenu.

2 Tudi tuela Nzambi tuasakidila misangu yonso itudi tunutela nuenu bonso mu masambila etu,+ 3 bualu tudi tutungunuka ne kuvuluka mudimu wenu wa ditabuja, mudimu wenu mukole muenza ne dinanga, ne dinanukila dienu bua ditekemena dinudi nadi+ mu Mukalenge wetu Yezu Kristo kumpala kua Nzambi wetu ne Tatu. 4 Bualu, bana betu banangibue kudi Nzambi, tudi bamanye mudiye munusungule, 5 bualu lumu luimpe lutudi tuyisha kaluvua lulue kunudi ne mêyi nkayawu, kadi luvua lulue kabidi ne bukole ne nyuma muimpe* ne dishindika dikole, anu bu munudi bamanye tshituvua balue munkatshi muenu bua bualu buenu. 6 Nunku nuakalua bidikiji betu+ ne ba Mukalenge+ bu munuvua bitabe dîyi mu makenga a bungi+ ne disanka dia nyuma muimpe,* 7 nuenu kulua tshilejilu kudi bena kuitabuja bonso ba mu Makedonia ne mu Akaya.

8 Mu bulelela, dîyi dia Yehowa* divua difume kunudi kadivua diumvuike anu mu Makedonia ne mu Akaya nkayamu to, kadi ditabuja dienu kudi Nzambi nditangalake bikole miaba yonso,+ bienza bua katuikadi ne dijinga dia kuamba bualu bukuabu. 9 Bualu bobu nkayabu badi batungunuka ne kuakula bua dipetangana dietu nenu bua musangu wa kumpala ne munuvua bitabe Nzambi, balekele mpingu yenu+ bua kuenzela Nzambi mulelela wa muoyo mudimu bu bapika, 10 ne bua kuindila Muanende udi ufuma mu diulu,+ uvuaye mujule ku lufu, mbuena kuamba ne: Yezu udi utusungila ku tshiji tshidi tshilua.+

2 Bana betu, nuenu nkayenu nudi bamanye bulelela ne: dilua dietu bua kunutangila kadivua tshianana to.+ 2 Bualu anu bu munudi bamanye, nansha mutuvua bakenge kumpala ne batuenzele malu ne dipanga kanemu ku Filipoyi,+ tuakapeta dikima* ku diambuluisha dia Nzambi wetu bua kunuambila lumu luimpe lua Nzambi+ kumpala kua buluishi bua bungi.* 3 Bualu dikankamija ditudi tufila kadiena difuma ku tshilema anyi ku malu a bukoya peshi kadiena ne dishima to, 4 kadi anu bu mudi Nzambi muanyishe bua kutupesha lumu luimpe, ke mutudi tuakula, ki mbua kusankisha bantu, kadi mbua kusankisha Nzambi udi ukonkonona mioyo yetu.+

5 Mu bulelela, nudi bamanye ne: katutu banji kuakula mêyi a kulabidilangana nawu anyi kuangata mpala wa dishima ne meji a lukuka to;+ Nzambi udi ntemu wa bualu ebu! 6 Katuena nansha bakebe butumbi bua kudi bantu, ni nkunudi ni nkudi bantu bakuabu, nansha mutuvua mua kuikala bujitu bunene bu mutudi bapostolo ba Kristo.+ 7 Kadi tuakalua bena bulenga munkatshi muenu, anu bu mudi mamu udi wamusha utabalela bana bende ne dinanga dionso.* 8 Nunku bu mutuvua ne dinanga dikole kunudi, katuvua badisuike* bua kunupesha anu lumu luimpe lua Nzambi nkayalu to, kadi ne kudifila kabidi ne tuetu bine,*+ bualu nuvua balue banangibue bikole kutudi.+

9 Bulelela bana betu, nudi nuvuluka mudimu wetu mukole ne wa lutatu. Tuvua tuenza mudimu butuku ne munya bua katulu bujitu bunene kudi muntu nansha umue wa kunudi+ patuvua banuyishe lumu luimpe lua Nzambi. 10 Nudi bantemu, Nzambi pende ntemu, bua mutuvua banuenzele nuenu bena kuitabuja malu ne lulamatu ne buakane ne katuyi tshia kutubandabu natshi. 11 Nudi bamanye bimpe ne: tuvua anu tunukankamija, tunusamba ne tufila bumanyishi kudi yonso wa kunudi,+ anu bu mudi tatu+ wenzela bana bende, 12 bua nutungunuke ne kuenda mu mushindu udi mukumbanangane ne Nzambi+ udi unubikila mu Bukalenge buende+ ne mu butumbi buende.+

13 Bulelela, ke bualu kayi tuetu petu tudi tuela Nzambi tuasakidila katuyi tulekela,+ bualu panuvua bapete dîyi dia Nzambi dinuvua bumvuile kutudi, nuvua baditabe, ki mbu dîyi dia bantu, kadi anu bu mudidi mu bulelela, bu dîyi dia Nzambi didi kabidi dikuata mudimu munda muenu nuenu bena kuitabuja. 14 Bualu nuenu, bana betu, nuvua balue bidikiji ba bisumbu bia Nzambi bidi mu buobumue ne Kristo Yezu bidi mu Yudaya, bualu nuvua bakenge ku bianza bia bena mu ditunga dienu+ ne malu a muomumue ne adibu pabu bakenga nawu ku bianza bia bena Yuda 15 bavua bashipe too ne Mukalenge Yezu+ ne baprofete ne batukengeshe.+ Bualu bukuabu, kabena basankisha Nzambi to, kadi badi baluisha diakalenga dia bantu bonso, 16 bualu badi bakeba kutupangisha bua kuakula ne bantu ba bisamba bikuabu bua bobu kupandishibua.+ Mu mushindu eu badi bakumbajija bungi bua mpekatu yabu misangu yonso. Kadi ndekelu wa bionso, tshiji tshiende ntshilue kudibu.+

17 Kadi bana betu, pavuabu batumbushe kunudi* bua tshitupa tshîpi patupu (ku mubidi, kadi ki mmu mioyo yetu), bua dijinga dietu dikole, tuakadienzeja bikole bua kunumona mpala ne mpala.* 18 Bua bualu ebu, tuvua basue kulua kunudi, eyowa, meme Paulo tshiakateta anu musangu umue to, kadi misangu ibidi; kadi Satana wakatukangila njila. 19 Bualu ditekemena dietu anyi disanka dietu anyi tshifulu tshietu tshia butumbi tshia disanka dia bungi kumpala kua Mukalenge wetu Yezu tshikondo tshia dikalaku diende ntshinyi? Mu bulelela, ki nnuenu anyi?+ 20 Bulelela, nudi butumbi buetu ne disanka dietu.

3 Nunku patuvua katuyi mua kutantamena bualu ebu kabidi, tuakela meji ne: bivua bitambe buimpe bua tuetu nkayetu kushala ku Atena;+ 2 ne tuakanutumina Timote,+ muanetu ne muena mudimu wa Nzambi* mu lumu luimpe lua Kristo, bua kunushindamija* ne kunusamba bua ditabuja dienu, 3 bua muntu nansha umue katenkakajibu* kudi makenga aa. Bualu nuenu nkayenu nudi bamanye ne: katuena mua kuepuka makenga a nunku to.*+ 4 Bualu patuvua nenu, tuvua tudianjila kunuambila ne: netupete makenga, ne ke tshidi tshienzeke anu bu munudi bamanye.+ 5 Ke bualu kayi, pamvua tshiyi mua kukolesha kabidi muoyo, ngakatuma muntu bua meme kumanya bualu bua lulamatu luenu,+ bikala Mutetshianganyi+ mua kuikala munutete mu mushindu kampanda, ne mudimu wetu mukole mulue tshianana.

6 Kadi Timote mmufike kutudi mpindieu ufuma kunudi aku+ ne mmutuambile lumu luimpe lua lulamatu luenu ne dinanga dienu, munudi nutungunuka misangu yonso ne kutuvuluka ne dinanga dionso ne nujinga bikole bua kutumona anu mutudi petu tujinga bua kunumona. 7 Ke bualu kayi bana betu, mu ntatu* yetu yonso ne makenga etu onso, tudi basambibue bua bualu buenu ne bua lulamatu lunudi nuleja patoke.+ 8 Bualu tudi bapetulule bukole* bu munudi bashindame mu Mukalenge. 9 Bualu tshiena mumanye mushindu utudi mua kuela Nzambi tuasakidila bua bualu buenu bua disanka dinene ditudi tumvua kumpala kua Nzambi wetu bua bualu buenu. 10 Butuku ne munya tudi tusengelela ne muoyo mujima bua kumonangana nenu mpala ne mpala* ne bua kukumbaja tshidi tshipangike ku ditabuja dienu.+

11 Mpindieu Nzambi wetu ne Tatu yeye nkayende pamue ne Mukalenge wetu Yezu batuenzele njila bua tuetu kulua kunudi. 12 Bualu bukuabu, Mukalenge enze bua dinanga dinudi banangangane+ ne banange bantu bonso dikole, eyowa, divule, anu bu mutudi nadi kunudi, 13 bua ashindamije mioyo yenu, kanuyi ne tshidibu mua kunubanda natshi mu bunsantu kumpala kua Nzambi wetu+ ne Tatu tshikondo tshia dikalaku dia Mukalenge wetu Yezu+ ne bansantu bende bonso.

4 Ndekelu wa bionso, bana betu, anu bu munuvua bapete malu a kulonda atuvua banuambile bua mushindu unudi ne bua kuenda bua kusankisha Nzambi,+ anu bu munudi mu bulelela munkatshi mua dienda, tudi tunulomba ne tunusengelela mu dîna dia Mukalenge Yezu bua kutungunuka ne kutamba kuenza nunku. 2 Bualu nudi bamanye malu a kulonda* atuvua banupeshe ku butuangaji bua Mukalenge Yezu.

3 Bualu disua dia Nzambi ndia ne: nuikale ba tshijila+ ne nudikande ku masandi.*+ 4 Yonso wa kunudi amanye mua kulama mubidi*+ wende mu bunsantu+ ne bunême, 5 kayi ne majinga makole a kusangila a lukuka adi kaayi bukuatshi+ bu mudi bisamba bikuabu bidi kabiyi bimanye Nzambi bikale nawu.+ 6 Muntu nansha umue kena ne bua kusambuka mikalu ne kuenzela muanabu bibi bua disanka diende yeye mu bualu ebu to, bualu Yehowa* udi ufila dinyoka bua malu onso aa, anu bu mutuvua badianjile kunuambila ne banudimuije kabidi bikole. 7 Bualu Nzambi ki mmutubikile bua malu a bukoya to, kadi mbua bunsantu.+ 8 Nunku mpindieu, muntu udi ulengulula bualu ebu, kena ulengulula muntu, kadi udi ulengulula Nzambi+ udi unupesha nyuma wende muimpe.*+

9 Kadi bua dinanga dia bana betu,+ kabiena ne mushinga bua tuetu kunufundila, bualu Nzambi mmunulongeshe nuenu bine bua kunangangana.+ 10 Mu bulelela, ke munudi nuenzela bana betu bonso ba mu Makedonia mujima. Kadi bana betu, tudi tunusengelela bua nutungunuke ne kuenza nunku bikole menemene. 11 Nudienzeje bua kusomba mu ditalala,+ bua kubenga kubuelakana mu malu a bakuabu+ ne bua kuenza mudimu ne bianza bienu,+ anu bu mutuvua banuambile, 12 bua numone mua kuenda bimpe ku mêsu kua bantu ba pambelu,+ kanuyi nukengela tshintu.

13 Bualu bukuabu bana betu, katuena basue nuikale mu dipanga* bua bualu bua bantu badi balale tulu mu lufu,+ bua kanunyingaladi bu mudi bakuabu bonso badi kabayi ne ditekemena benza.+ 14 Bualu tuetu tuitabuja ne: Yezu uvua mufue ne kabidi mujuke,+ nunku tudi tuitabuja kabidi ne: Nzambi nealue nende pamue ne bantu badi balale tulu mu lufu ku butuangaji bua Yezu.+ 15 Bualu tudi tunuambila ku dîyi dia Yehowa* ne: tuetu badi ne muoyo badi bashala too ne ku dikalaku dia Mukalenge katuakudianjidila badi balale tulu mu lufu nansha kakese; 16 bualu Mukalenge nkayende neatuluke mu diulu ne lubila lua bumfumu, ne dîyi dia mfumu wa banjelu+ ne mpungi wa Nzambi, ne bantu badi bafue mu buobumue ne Kristo nebajuke kumpala.+ 17 Pashishe tuetu badi ne muoyo badi bashala, nebaye netu mu matutu pamue nabu+ bua kusambakena ne Mukalenge+ mu lupepele; nunku netuikale ne Mukalenge misangu yonso.+ 18 Nunku tungunukayi ne kusambangana ne mêyi aa.

5 Mpindieu bana betu, bua mêba ne bikondo, kabiena ne mushinga bua kunufundila bualu nansha bumue to. 2 Bualu nuenu nkayenu nudi bamanye bimpe menemene ne: dituku dia Yehowa*+ didi dilua anu bu mutu muivi ulua butuku.+ 3 Dîba dionso diambabu ne: “Ditalala, ne kakuena bualu bua kutshina!” dîba adi kabutu ka tshimpitshimpi nekalue kudibu diakamue,+ anu bu mutu didinyenga dia pa kulela dikuata mukaji udi ne difu, ne kabakupanduka nansha kakese. 4 Kadi nuenu bana betu, kanuena mu mîdima, bua dituku adi dinujikile bu mudidi mua kujikila bivi, 5 bualu nuenu bonso nudi bana ba butoke ne bana ba munya.+ Katuena ni mba butuku ni mba mîdima to.+

6 Nunku mpindieu, katuladi bu mudi bantu bakuabu bonso benza,+ kadi tushale batabale+ ne tulame bieledi bietu bia meji.+ 7 Bualu bantu badi balala, batu balala butuku, ne bantu badi bakuatshika, batu bakuatshika butuku.+ 8 Kadi buetu tuetu bana ba munya, tulamayi bieledi bietu bia meji, ne tuvuale tshibuikilu tshia pa tshiadi tshia ditabuja ne dinanga ne ditekemena dia lupandu bu tshifulu+ 9 bualu Nzambi kavua mutusungule bua tshiji, kadi bua kupeta lupandu+ ku butuangaji bua Mukalenge wetu Yezu Kristo. 10 Wakatufuila,+ bua nansha tuetu bashale batabale anyi balale tulu,* tuikale ne muoyo pamue nende.+ 11 Nunku tungunukayi ne kukankamijangana* ne kukoleshangana+ anu bu munudi nuenza mu bulelela.

12 Mpindieu bana betu, tudi tunulomba bua nunemeke bantu badi benza mudimu mukole munkatshi muenu ne badi banulombola mu Mukalenge ne banudimuija; 13 ne bua kubatua mushinga wa bungi menemene mu dinanga bua mudimu wabu.+ Nusombe mu ditalala.+ 14 Ku lukuabu luseke, bana betu, tudi tunusengelela bua kudimuija* badi babenga kutumikila,+ kuakula ne mêyi a busambi kudi badi babungame,* kuambuluisha badi batekete, kuikala ne lutulu kudi bantu bonso.+ 15 Nudimuke bua muntu nansha umue kapingajidi muntu mukuabu bubi ku bubi,+ kadi misangu yonso nukebe bua kuenzelangana malu mimpe ne kuenzela bantu bakuabu bonso.+

16 Ikalayi nusanka misangu yonso.+ 17 Nusambile misangu yonso.+ 18 Nuele Nzambi tuasakidila bua malu onso.+ Edi ke disua dia Nzambi bua bualu buenu mu Kristo Yezu. 19 Kanujimi kapia ka nyuma.+ 20 Kanupetudi mêyi a buprofete.+ 21 Nukonkonone malu onso;+ nulamate malu mimpe. 22 Nudikande ku malu mabi a mishindu yonso.+

23 Nzambi wa ditalala nkayende anuvuije ba tshijila mu malu onso. Bana betu, lungenyi luenu ne anyima* wenu ne mubidi wenu bidi kabiyi kalema mu malu onso bilamibue kabiyi ne tshidibu mua kubibanda natshi mu tshikondo tshia dikalaku dia Mukalenge wetu Yezu Kristo.+ 24 Yeye udi unubikila ngua lulamatu ne neenze nunku bulelela.

25 Bana betu, tungunukayi ne kusambila bua bualu buetu.+

26 Nuele bana betu bonso muoyo ne dituangana dia mishiku dia tshijila.

27 Ndi nnuenzeja mu dîna dia Mukalenge ne muoyo mujima bua nubadile bana betu bonso mukanda eu.+

28 Ngasa wa Mukalenge wetu Yezu Kristo ikale nenu.