MUKANDA MUIBIDI MUTUMINA BENA TESALONIKE

1 Meme Paulo ne Siluano* ne Timote,+ kudi tshisumbu tshia bena Tesalonike mu buobumue ne Nzambi Tatu wetu ne Mukalenge Yezu Kristo:

2 Ngasa ne ditalala bia kudi Nzambi Tatu ne Mukalenge Yezu Kristo bikale nenu.

3 Bana betu, tudi benzejibue bua kuela Nzambi tuasakidila misangu yonso bua bualu buenu. Mbikumbane bua kuenza nunku, bualu ditabuja dienu didi dienda dikola bikole ne dinanga dienu nuenu bonso, muntu ne muntu, dinudi banangangane nadi didi dienda dikola.+ 4 Bua bualu ebu, tuetu bine tudi tudisua bua bualu buenu+ munkatshi mua bisumbu bia Nzambi bua dinanukila dienu ne ditabuja dienu mu dikengeshibua dienu dionso ne mu nsombelu mikole* idi inukuata.*+ 5 Etshi ntshijadiki tshia dilumbuluisha diakane dia Nzambi, tshidi tshinufikisha ku dibadibua bakumbanyine Bukalenge bua Nzambi bunudi bulelela nutatshila.+

6 Bualu mu bulelela, mbualu buakane kudi Nzambi bua kupingajilaye badi banukengesha makenga.+ 7 Kadi nuenu badi bakenga nenupete disulakana pamue netu dîba dia dibuluibua dia Mukalenge Yezu+ kumbukila mu diulu ne banjelu bende ba bukole+ 8 mu kapia kadi kalakuka, padiye ulua ne disombuela kudi bantu badi kabayi bamanye Nzambi ne badi kabayi batumikila lumu luimpe lua bualu bua Mukalenge wetu Yezu.+ 9 Bantu aba nebapete dinyoka dia kabutu ka tshiendelele+ kumpala kua Mukalenge ne kua butumbi bua bukole buende, 10 dîba didiye ulua bua kutumbishibua bua bansantu bende ne bua bantu bonso bavua baleje ditabuja bamutangile bakema mu dituku adi, bualu nuvua bitabuje bumanyishi butuvua bafile.

11 Bua bualu buine abu tudi tusambila misangu yonso bua bualu buenu, bua Nzambi wetu anubale bakumbanyine dibikila diende,+ ne ku diambuluisha dia bukole buende, akumbaje menemene malu onso mimpe adiye musue ne mudimu wonso wa ditabuja. 12 Mbienzeke nunku bua dîna dia Mukalenge wetu Yezu ditumbishibue munda muenu ne nuenu mu buobumue nende, bilondeshile ngasa wa Nzambi wetu ne wa Mukalenge Yezu Kristo.

2 Kadi bana betu, bua dikalaku dia Mukalenge Yezu Kristo+ ne bua disangishibua dietu kudiye,+ tudi tunulomba 2 bua kanutenkakajibu mu meji enu lukasa anyi kanulubakajibu kudi dîyi diamba ku nyuma*+ anyi kudi mukenji muamba mukana anyi kudi mukanda udi umueneka bu udi ufumina kutudi bua ne: dituku dia Yehowa*+ dikadi difike.

3 Muntu nansha umue kanusesuishi* mu mushindu nansha umue to, bualu dituku adi kadiakulua butontolodi+ kabuyi buanji kulua ne kabayi banji kuela mushipi wa mikenji+ patoke, mmumue ne: muana wa dibutuka.+ 4 Yeye udi uluisha tshionso tshidibu babikila nzambi anyi tshintu tshia kutendelela* ne udi udibandisha ku mutu kuatshi, bienza bua asombe mu ntempelo wa Nzambi, uleja patoke mudiye yeye muine nzambi. 5 Kanuena bavuluke ne: pantshivua nenu mvua nnuambila malu aa anyi?

6 Nunku mpindieu nudi bamanye tshintu tshidi tshimupumbisha, bua alue kuedibua patoke mu tshikondo tshiende tshikumbane. 7 Bulelela, bualu busokoka bua dishipa dia mikenji edi bukadi butuadije,+ kadi anu too ne pumbuka muntu udi umupumbisha mpindieu. 8 Pashishe mushipi wa mikenji needibue patoke bulelela, yeye wikala Mukalenge Yezu ne bua kubutula ne nyuma wa mukana muende+ ne kumuvuija tshianana ku dimueneka+ dia dikalaku diende. 9 Kadi dikalaku dia mushipi wa mikenji ndienzeja kudi mudimu wa Satana+ ne midimu ya bukole yonso ne bimanyinu bia dishima ne malu a kukema*+ 10 ne kudinga kua mishindu yonso kudi kakuyi kuakane+ bua bantu badi bajimina, bu difutu, bualu kabavua bitabe bua kunanga bulelela bua bamone mua kupanduka. 11 Ke bualu kayi Nzambi udi ulekela malu adi ashimakajangana abapambuisha, bua bafike ku ditaba dishima,+ 12 bua babalumbuluishe bonso, bualu kabavua bitabe bulelela, kadi bavua basanke bua malu adi kaayi makane.

13 Kadi bana betu banangibue kudi Yehowa,* tudi benzejibue misangu yonso bua kuela Nzambi tuasakidila bua bualu buenu, bualu Nzambi uvua munusungule katshia ku tshibangidilu+ bua lupandu pa kunuvuija ba tshijila+ ne nyuma wende ne bua ditabuja dienu mu bulelela. 14 Wakanubikila bua bualu ebu ku diambuluisha dia lumu luimpe lutudi tumanyisha, bua nupete butumbi bua Mukalenge wetu Yezu Kristo.+ 15 Nunku mpindieu, bana betu, nushindame+ ne nulamate bikole ku bilele bivuabu banulongeshe,+ nansha bikale ku diambuluisha dia mukenji muamba mukana anyi dia mukanda mufume kutudi. 16 Bualu bukuabu, Mukalenge wetu Yezu Kristo yeye nkayende ne Nzambi Tatu wetu uvua mutunange+ ne mutupeshe busambi bua tshiendelele ne ditekemena dimpe+ ku diambuluisha dia ngasa, 17 basambe mioyo yenu ne banushindamije* mu malu mimpe onso ne mu dîyi dimpe dionso.

3 Ndekelu wa bionso bana betu, tungunukayi ne kusambila bua bualu buetu,+ bua dîyi dia Yehowa* ditungunuke ne kumuangalaka lukasa+ ne kutumbishibua anu bu mudibi bienzeka kuenu aku, 2 ne bua tusungidibue mu bianza bia bantu bena tshinyangu ne babi,+ bualu ki mbantu bonso badi ne ditabuja to.+ 3 Kadi Mukalenge udi ne lulamatu, ne yeye neanukoleshe ne neanukube kudi mubi. 4 Bualu bukuabu, tudi ne dishindika mu Mukalenge bua bualu buenu ne: nudi nukumbaja malu atuvua banuambile bua kulonda ne nenutungunuke ne kuakumbaja. 5 Mukalenge atungunuke ne kuludika mioyo yenu bimpe ku dinanga dia Nzambi+ ne ku dinanukila+ bua Kristo.

6 Mpindieu bana betu, tudi tunuambila tshia kuenza mu dîna dia Mukalenge Yezu Kristo ne: nuepuke muanetu yonso udi kayi wenda mu bulongame,+ udi kayi ulonda bilele* binuvua* bapetele kutudi.+ 7 Bualu nuenu nkayenu nudi bamanye munudi ne bua kutuidikija,+ bualu katuvua benze malu a lukutukutu munkatshi muenu, 8 anyi badie tshiakudia tshia muntu tshianana to.*+ Kadi ku mudimu mukole ne wa lutatu tuvua tuenza mudimu butuku ne munya bua kubenga kutekela muntu nansha umue wa kunudi bujitu bunene.+ 9 Ki mbualu katuena ne bukokeshi,+ kadi tuvua basue kudifila tuetu bine bu tshilejilu tshia nuenu kuidikija.+ 10 Bulelela, patuvua nenu, tuvua tunutumina dîyi edi ne: “Bikala muntu kayi musue kuenza mudimu, nansha kudia, kadi to.”+ 11 Bualu tudi tumvua ne: kudi bantu bakuabu badi kabayi benda mu bulongame munkatshi muenu,+ kabayi benza mudimu nansha umue, kadi babuelakana mu malu adi kaayi abatangila.+ 12 Tudi tutumina bantu ba nunku dîyi ne tubabela mu Mukalenge Yezu Kristo ne: badi ne bua kuenza mudimu mu ditalala ne kudia biakudia bidibu bobu nkayabu bapeta.+

13 Kadi nuenu bana betu, kanulekedi kuenza malu mimpe to. 14 Kadi bikala muntu kayi utumikila dîyi dietu didi mu mukanda eu, numutue tshimanyinu ne nulekele kusomba nende,+ bua afuishibue bundu. 15 Tshidibi kanumuangatshi bu muena lukuna to, kadi tungunukayi ne kumubela+ bu muanenu.

16 Mpindieu Mukalenge wa ditalala yeye nkayende anupeshe ditalala misangu yonso mu mishindu yonso.+ Mukalenge ikale nenu bonso.

17 Eu mmuoyo wanyi, meme Paulo, wa ku tshianza tshianyi+ udi tshimanyinu mu mikanda yonso; eu ke mushindu undi mfunda.

18 Ngasa wa Mukalenge wetu Yezu Kristo ikale nenu bonso.