MUKANDA MUIBIDI MUTUMINA TIMOTE

1 Meme Paulo, mupostolo wa Kristo Yezu ku disua dia Nzambi bilondeshile mulayi wa muoyo udi ku butuangaji bua Kristo Yezu,+ 2 kudi Timote, muana munangibue:+

Ngasa, luse, ne ditalala bia kudi Nzambi Tatu ne Kristo Yezu Mukalenge wetu bikale nebe.

3 Ndi ne dianyisha dia bungi kudi Nzambi undi ngenzela mudimu wa tshijila anu bu muvua bankambua banyi benze, muikale ne kondo ka muoyo katoke, tshiyi ndekela kukuvuluka mu misengelelu yanyi butuku ne munya. 4 Pandi mvuluka binsonji biebe, ndi njinga bua kukumona ne muoyo mujima bua nguwujibue ne disanka. 5 Bualu ndi mvuluka ditabuja diebe didi kadiyi ne lubombo+ divua kumpala munda mua kakuebe Loyi ne mua mamuebe Eunike, kadi dindi mujadike ne: didi kabidi munda muebe.

6 Bua bualu ebu ndi nkuvuluija bua kusonsola anu bu kapia tshipedi tshia Nzambi tshidi munda muebe tshiuvua mupete pamvua mukutentekele bianza.+ 7 Bualu Nzambi kavua mutupeshe nyuma wa buôwa to,+ kadi wa bukole,+ wa dinanga, ne wa meji majalame. 8 Nunku kuikadi ne bundu bua kufila bumanyishi bua bualu bua Mukalenge wetu+ anyi kuikadi ne bundu bua bualu buanyi meme udi muena buloko bua bualu buende, kadi itaba bua kukenga+ bua lumu luimpe pa kueyemena bukole bua Nzambi.+ 9 Yeye wakatupandisha ne wakatubikila ne dibikila dia tshijila,+ ki mbua midimu yetu, kadi mbua dilongolola diende yeye ne ngasa wende.+ Wakatupa ngasa eu mu diumvuangana ne Kristo Yezu kale menemene, 10 kadi mpindieu mmumueneshibue patoke ku diambuluisha dia dimueneka dia Mupandishi wetu, Kristo Yezu,+ udi mujimije lufu+ ne muleje mua kupeta muoyo+ ne dibenga kubola+ ku diambuluisha dia lumu luimpe+ 11 luvuabu banteke bua kuikala muyishi walu, mupostolo ne mulongeshi.+

12 Bua bualu ebu meme panyi ndi nkenga ne malu aa,+ kadi tshiena ngumvua bundu to.+ Bualu ndi mumanye Yeye undi muitabuje, ne ndi mushindike ne: udi ne bukole bua kulama tshindi mutekeshe kudiye too ne ku dituku adi.+ 13 Ulamate tshilejilu* tshia mêyi adi akolesha*+ auvua mumvue kundi ne ditabuja ne dinanga bidi bifumina ku buobumue ne Kristo Yezu. 14 Lama tshintu tshia mushinga mukole tshidi tshitekesha kuudi etshi ku diambuluisha dia nyuma muimpe* udi muikale munda muetu.+

15 Udi mumanye ne: bantu bonso ba mu provense wa Asia+ mbandekele, kusangisha ne Fugelo ne Hêmogene. 16 Mukalenge afuile ba mu nzubu mua Onezifolo luse,+ bualu uvua unkolesha misangu ne misangu, ne kavua mumvue bundu bua nkanu yanyi to. 17 Kadi pavuaye ku Lomo, wakankeba ne muoyo mujima, kumpetaye. 18 Mukalenge amuambuluishe bua Yehowa* amufuile luse dituku adi. Wewe udi mumanye bimpe malu onso avuaye mungenzele ku Efeso.

2 Nunku wewe muananyi,+ tungunuka ne kupetela bukole mu ngasa udi mu Kristo Yezu; 2 ne malu auvua mumvuile kundi avua bantemu ba bungi bashindike,+ malu aa uambile balume ba lulamatu balua kuikala pabu bakumbane bimpe bua kulongesha bakuabu. 3 Bu musalayi muimpe+ wa Kristo Yezu, itaba bua kukenga.+ 4 Muntu udi wenza mudimu wa busalayi kena mua kuditua* mu dienda dia mushinga* panu, bua amone mua kusankisha muntu uvua mumuangate ku busalayi.  5 Nansha mu manaya, kabena mua kuasa muntu udi uanaya tshifulu tshia butumbi padiye kayi muanaye bilondeshile mikenji ya manaya to.+ 6 Tshidime udi wenza mudimu mukole ke udi ne bua kuikala wa kumpala bua kudia bia ku mudimu wende. 7 Ikala welangana meji bikole bua malu andi ngamba; Mukalenge neakupeshe lumvu* mu malu onso.

8 Vuluka ne: bakajula Yezu Kristo ku lufu+ ne uvua muana wa Davidi,*+ bilondeshile lumu luimpe lundi nyisha,+ 9 lundi nkengela, mbuelela mu buloko bu muenji wa malu mabi.+ Nansha nanku, dîyi dia Nzambi ki ndisuikibue to.+ 10 Bua bualu ebu, ndi ntungunuka ne kunanukila mu malu onso bua basungula,+ bua bobu pabu bapete lupandu ludi lulua ku diambuluisha dia Kristo Yezu, pamue ne butumbi bua tshiendelele. 11 Dîyi edi ndia kueyemena: Bulelela, bituikala tuvua bafue popamue nende, netuikale kabidi ne muoyo popamue nende;+ 12 tuetu batungunuke ne kunanukila, netukokeshe kabidi popamue nende bu bakalenge;+ tuetu bamuvile, neatuvile pende;+ 13 tuetu katuyi ne lulamatu, yeye udi ushala ne lulamatu, bualu kena mua kudivila to.

14 Tungunuka ne kubavuluija malu aa, ubambila* kumpala kua Nzambi bua kubenga kuluangana bua miaku, bualu budi kabuyi ne mushinga nansha mukese bualu budi buenzela badi babuteleja bibi.* 15 Enza muebe muonso bua kumueneka kumpala kua Nzambi bu muntu muanyishibue, muena mudimu udi kayi ne bualu bua kumvuila bundu, ulongesha dîyi dia bulelela bimpe menemene.+ 16 Kadi benga biyukiyuki bia patupu bidi binyanga tshintu tshia tshijila,+ bualu nebitungunuke anu ne kufikisha ku malu adi kaayi a Nzambi, 17 ne dîyi diabu neditampakane bu mputa wa lubangu. Humenayo ne Fileto badi munkatshi muabu.+ 18 Bantu abu mbasesuke ku bulelela, bamba mukadi dibishibua dia bantu ku lufu dimane kuenzeka,+ ne badi banyanga ditabuja dia bamue bantu. 19 Nansha nanku, tshishimikidi tshikole tshia Nzambi ntshishale tshimane, tshikale ne tshimanyinu etshi: “Yehowa* mmumanye badi bende,”+ kabidi ne: “Muntu yonso udi ubila dîna dia Yehowa,*+ alekele malu adi kaayi makane.”

20 Nunku mu nzubu munene kamuena anu bintu bia tshikuku* bia or ne bia tshiamu tshia arjan to, kadi mudi kabidi bia mitshi ne bia buloba; bimue bua mudimu wa bunême, kadi bikuabu bua mudimu udi kawuyi wa bunême. 21 Nunku muntu yeye mushale kule ne bidi kabiyi bia bunême ebi, neikale tshintu tshia mudimu* bua mudimu wa bunême, mujidila, muikale ne diambuluisha kudi muenaye, mulongolola bua mudimu muimpe wonso. 22 Nunku nyema majinga a bunsonga, kadi ipatshila buakane, ditabuja, dinanga, ditalala, popamue ne bantu badi babila Mukalenge ne muoyo mutoke.

23 Bualu bukuabu, benga malu a dikokangana a bupote ne dipanga,+ mumanye ne: adi alela mvita. 24 Bualu mupika wa Mukalenge kena ne bua kuluangana to, kadi udi ne bua kuikala muena bupole* kudi bantu bonso,+ mukumbane bua kulongesha, udikanda padibu bamuenzela bibi,+ 25 ulongesha bonso badi kabayi badiakaje bua kuteleja muikale ne bupole.+ Pamuapa Nzambi udi mua kubapetesha dinyingalala bua mpekatu* didi difikisha ku dimanya dijalame dia bulelela,+ 26 ne badi mua kupetulula lungenyi ne kupanduka ku buteyi bua Diabolo, bualu bavua bakuatshibue kudiye ne muoyo bua kuenza disua diende.+

3 Kadi umanye ne: mu matuku a ku nshikidilu+ nekuikale bikondo bia malu makole bidi bikole mua kupita nabi. 2 Bualu bantu nebikale badinangi, banangi ba makuta, bena diambu, badibandishi, bapendi ba Nzambi, kabayi batumikila baledi babu, kabayi ne dianyisha, kabayi ne lulamatu, 3 kabayi banange bana babu, kabayi ne lungenyi lua kumvuangana, bashiminyinyanganyi ba malu, kabayi badikanda, bena luonji, kabayi banange malu mimpe, 4 batungidianganyi, bena mutu mukole, badiuwuja ne lutambishi, banangi ba masanka pamutu pa kuikala banangi ba Nzambi, 5 bikale ne tshimuenekelu tshia dilamata Nzambi kadi bienzedi biabu kabiyi bileja bukole bua dimulamata edi;+ nunku umbuka kudi bantu aba. 6 Munkatshi mua bantu aba mudi mujuka bantu badi badifinya mu nzubu ya bantu ne bakuata bakaji badi ne butekete ku bupika, bikale ne majitu a mpekatu mapite, balombola kudi majinga mashilashilangane, 7 balonga misangu yonso, kadi kabayi mua kufika ku dimanya dijalame dia bulelela nansha.

8 Nunku anu bu muvua Yane ne Yambele baluishe Mose, ke mudi bantu aba batungunuka ne kuluisha bulelela. Bantu ba nunku badi ne lungenyi luonso lunyanguke, kabayi banyishibue bua ditabuja to. 9 Nansha nanku, kabakuya kabidi kumpala to, bualu bupote* buabu nebumueneke patoke kudi bantu bonso anu bu muvuabi bua bantu babidi abu.+ 10 Kadi wewe, udi mulonde bimpe menemene dilongesha dianyi, nsombelu wanyi,+ tshipatshila tshianyi, ditabuja dianyi, lutulu luanyi, dinanga dianyi, dinanukila dianyi, 11 dikengeshibua ne makenga bia buena bimvua mupete ku Antiokia,+ ku Ikonio+ ne ku Luseta.+ Mvua munanukile mu dikengeshibua edi, ne Mukalenge uvua munsungile ku dikengeshibua dionso edi.+ 12 Mu bulelela, bantu bonso badi basue kuikala balamate Nzambi mu buobumue ne Kristo Yezu nebakengeshibue pabu.+ 13 Kadi bantu babi ne badingianganyi nebatungunuke ne kunyanguka bibi menemene, bapambuishangana ne bapambuishibua.+

14 Kadi wewe, tungunuka mu malu auvua mulonge ne avuabu bakufikishe ku ditaba,+ mumanye bantu bavua bakulongeshawu 15 ne mumanye ne: katshia ku buana buebe+ udi mumanye mifundu ya tshijila+ idi mua kukuvuija muena meji bua kupeta lupandu ku ditabuja mu Kristo Yezu.+ 16 Dîyi dionso didi mu Mifundu ndifundisha kudi Nzambi ku bukole bua nyuma wende+ ne didi diambuluisha bua kulongesha,+ bua kubela, bua kululamija malu,* bua kunyoka mu buakane,+ 17 bua muntu wa Nzambi ikale mukumbane menemene, muikale ne bionso bidi bikengedibua bua mudimu wonso muimpe.

4 Ndi nkutumina dîyi ne muoyo mujima kumpala kua Nzambi ne Kristo Yezu udi ne bua kulumbuluisha+ badi ne muoyo ne badi bafue,+ ne ku dimueneka diende+ ne Bukalenge buende ne:+ 2 Yisha dîyi;+ udiyishe mu bikondo bimpe ne mu bikondo bikole kuyi ujingakana; bela,+ tandisha, dimuija, wenza nunku ne lutulu luonso ne dimanya kulongesha.+ 3 Bualu nekuikale tshikondo tshikuabu tshikalabu kabayi banyisha dilongesha didi dikolesha,*+ kadi bilondeshile majinga abu, nebadiunguijile balongeshi bua kumvua malu adi abafunya ku matshi.*+ 4 Nebabenge kuteleja bulelela bua kuteleja mianu ya dishima. 5 Kadi wewe, lama bieledi biebe bia meji mu malu onso, nanukila mu ntatu,+ enza mudimu wa muambi,* kumbaja mudimu webe wonso menemene.+

6 Bualu bakadi benda bampongolola bu mulambu wa bia kunua,+ ne tshikondo tshia kundekelabu+ tshikadi pabuipi. 7 Ndi muluangane mvita mimpe,+ ndi munyeme lubilu mufike ku ndekelu,+ ndi mulame ditabuja. 8 Kutuadijila ku mpindieu, mbandamine tshifulu tshia butumbi+ tshia buakane tshikala Mukalenge, mulumbuluishi muakane,+ mua kumpesha bu difutu dituku adi,+ ki nganu meme nkayanyi to, kadi kabidi bantu bonso bavua banange dimueneka diende.

9 Enza muebe muonso bua kulua kundi lukasa. 10 Bualu Dema+ mmundekele bualu uvua munange ndongoluelu wa malu eu,* ne mmuye ku Tesalonike, Kulesekene mmuye ku Galatiya, Tito ku Dalamatia. 11 Ndi anu ne Luka. Luaku ne Mâko, bualu utu ungambuluisha mu mudimu bikole. 12 Kadi ndi mutume Tukiko+ ku Efeso. 13 Paudi ulua, ulue ne tshizaku tshimvua mushiye ku Toa kua Kâpo, ulue kabidi ne mivungu, nangananga mivungu ya biseba.

14 Alesandelo nsenda wa biamu bia mitaku mmungenzele malu mabi a bungi. Yehowa* neamufute bilondeshile bienzedi biende.+ 15 Wewe pebe udi ne bua kumudimukila, bualu uvua muluishe mukenji wetu bikole menemene.

16 Mu didilumbuluila dianyi dia kumpala, muntu nansha umue kavua ku luseke luanyi, kadi bonso bakandekela; kabababadidi bualu ebu to. 17 Kadi Mukalenge wakimana ku luseke luanyi, kunguwujaye ne bukole, bua ne: ku butuangaji buanyi diyisha dienzekelamu menemene ne bua ba mu bisamba bionso badiumvue;+ ne ngakasungidibua mukana mua ntambue.+ 18 Mukalenge neansungile ku bualu bubi buonso ne neampandishe bua Bukalenge buende bua mu diulu.+ Butumbi buikale kudiye kashidi ne tshiendelele. Amen.

19 Ngelela Pisika ne Akila+ ne ba mu nzubu mua Onezifolo+ muoyo.

20 Elasto+ uvua mushale ku Kolinto, kadi ndi mushiye Tofimo+ ku Mileto usama. 21 Enza muebe muonso bua kufika kumpala kua muvu wa mashika makole.*

Eubulo udi ukuela muoyo ne Pude ne Lino ne Kulaudiya ne bana betu bonso.

22 Mukalenge ikale ne lungenyi luudi nalu. Ngasa wende ikale nenu.