MUKANDA MUTUMINA TITO

1 Meme Paulo, mupika wa Nzambi ne mupostolo wa Yezu Kristo bilondeshile ditabuja dia basungula ba Nzambi ne dimanya dijalame dia bulelela didi mu diumvuangana ne dilamata Nzambi 2 ne didi dishindamene pa ditekemena dia muoyo wa tshiendelele+ uvua Nzambi udi kayi mua kushima+ mulaye katshia ku kale menemene; 3 kadi mu tshikondo tshiende tshiakanyine wakamanyisha dîyi diende ku diambuluisha dia diyisha divuabu bampeshe+ bilondeshile dîyi dituma kudi Nzambi Mupandishi wetu; 4 kudi Tito muananyi mulelela bilondeshile ditabuja dimue ditudi nadi:

Ngasa ne ditalala bia kudi Nzambi Tatu ne Kristo Yezu Mupandishi wetu bikale nebe.

5 Mvua mukushiye mu Kulete bua kuakaja malu avua kaayi enda bimpe* ne bua kuteka bakulu mu tshimenga ne mu tshimenga, anu mumvua mukuambile: 6 bikalaku muntu mulume udi kayi ne bualu budibu bamubanda nabu, muikale ne mukaji umue ne bana bena kuitabuja badibu kabayi babanda bua buenzavi* anyi buntomboji.+ 7 Bualu bu mudi mutangidi muikale mulami wa bintu bia Nzambi, kena ne bua kuikala ne bualu budibu bamubanda nabu, kikadi muena mutu mukole,+ kikadi muntu udi ukuata tshiji lukasa,+ kikadi mukuatshiki wa maluvu, kikadi muena tshikisu,* kikadi muena lukuka lua bintu bipetela mu njila mibi, 8 kadi ikale muakididi wa benyi,+ munangi wa malu mimpe, muikale ne meji majalame,*+ muakane, muena lulamatu,+ mumanye mua kudikanda,+ 9 mulamate ku dîyi dia lulamatu* bikole bua dimanya kulongesha diende,+ bua ikale mukumbane bua kukankamijangana* ku diambuluisha dia dilongesha didi dikolesha*+ ne bua kubela+ bena mpata.

10 Bualu kudi bantomboji ba bungi, bena biakulakula, ne bena dishima, nangananga bantu badi balamate ku ditengudibua.+ 11 Bidi bikengela kukangisha bantu aba mukana, bualu bobu badi batungunuka ne kunyanga nzubu mijima padibu balongesha malu adibu kabayi ne bua kulongesha anu bua kupetela bintu mu njila mibi. 12 Muntu mukuabu wa munkatshi muabu, muprofete wabu, wakamba ne: “Bena Kulete batu anu bena dishima, nyama ya tshisuku idi yenzelangana bibi, badiavi badi kabayi ne mudimu wa kuenza.”

13 Bujadiki ebu mbulelela. Bua bualu buine ebu, tungunuka ne kubabela ne dîsu dikole bua bikale bakole mu ditabuja, 14 kabayi bateleja mianu ya bena Yuda ne mikenji ya bantu badi babenga bulelela. 15 Bintu bionso mbikezuke bua bantu bakezuke;+ kadi bua bantu badi banyanguke ne badi kabayi ne ditabuja, kakuena tshintu tshidi tshikezuke, bualu meji abu ne tondo tuabu tua muoyo mbinyanguke.+ 16 Badi bamba patoke mudibu bamanye Nzambi, kadi badi bamuvila mu bienzedi biabu,+ bualu mbantu babi badi kabayi batumikila ne ki mbanyishibue bua mudimu muimpe wa mushindu kayi wonso.

2 Kadi wewe, tungunuka ne kuamba malu adi mu diumvuangana ne dilongesha didi dikolesha.*+ 2 Balume bakulumpe bikale ne nkatshinkatshi mu bienzedi biabu, bikale bantu badibu banemeka, bikale ne meji majalame, bakole mu ditabuja, mu dinanga ne mu dinanukila. 3 Bia muomumue, bakaji bakulumpe bikale ne bikadilu bidi bileja mudibu batshina Nzambi, kabikadi bashiminyinyanganyi ba malu, kabikadi bapika ba mvinyo wa bungi, kadi bikale balongeshi ba malu mimpe, 4 bua babele* bansongakaji bua kunanga babayabu, kunanga bana babu balela, 5 kuikala ne meji majalame, bakezuke, benza midimu ya kumbelu,* bakaji bimpe, bakokela babayabu,+ bua bantu kabakudi bibi bua dîyi dia Nzambi.

6 Bia muomumue, tungunuka ne kulomba bansongalume bua bikale ne meji majalame,+ 7 uleja muudi tshilejilu tshia bienzedi bimpe mu mishindu yonso. Longesha malu adi makezuke* ne bunême buonso,+ 8 wakula ne mêyi adi akolesha* adibu kabayi mua kudiula,+ bua bantu badi batuluisha bafuishibue bundu, kabayi ne bualu bubi* bua kuamba bua bualu buetu.+ 9 Bapika bakokele bamfumu babu mu malu onso,+ badienzeja bua kubasankisha, kabayi batontolola, 10 kabayi babiba,+ kadi badileja ba kueyemena mu malu onso, bua bamone mua kulengeja dilongesha dia Nzambi Mupandishi wetu mu mishindu yonso.+

11 Bualu ngasa wa Nzambi mmumueneke, utuadila bantu ba mishindu yonso lupandu.+ 12 Ngasa eu udi utulongesha bua kulekela malu adi kaayi a Nzambi ne majinga a panu+ ne bua kuikala ne meji majalame ne buakane ne dilamata Nzambi munkatshi mua ndongoluelu wa malu udiku eu,*+ 13 patudi tuindila ditekemena dia disanka+ ne dimueneka dia butumbi dia Nzambi munene ne dia Mupandishi wetu Yezu Kristo 14 uvua mudifile bua bualu buetu+ bua kutumbusha*+ ku dishipa dia mikenji dia mishindu yonso ne bua kudilengejila bantu badi tshisamba tshiende tshia pa buatshi, bikale ne tshisumi bua midimu mimpe.+

15 Tungunuka ne kuambila bantu malu aa ne kubadimuija* ne kubabela ne bukokeshi buonso.+ Muntu nansha umue kakupetudi to.

3 Tungunuka ne kubavuluija bua bakokele mbulamatadi ne bakokeshi ne babatumikile,+ bikale badiakaje bua mudimu wonso muimpe, 2 kabakudi bibi bua muntu nansha umue, kabikadi batandangana, kabikadi bena malu makole,+ bikale ne bupole buonso kudi bantu bonso.+ 3 Bualu tuetu petu katuvua ne meji kumpala, katuvua tutumikila, bavua batupambuisha, tuvua bapika ba majinga ne masanka bia mishindu ne mishindu, tuenza malu mabi ne bikale ne lubabu, tuvua bantu ba kukina ne tuvua tukinangana.

4 Kadi pakamueneka bulenga bua Nzambi Mupandishi wetu+ ne dinanga diende bua bukua bantu 5 (kabiyi bua bienzedi biakane bituvua benze,+ kadi bua luse luende),+ wakatupandisha ku diambuluisha dia dioweshibua mâyi divua ditufikishe ku muoyo+ ne pa kutuvuija bapiabapia ku nyuma muimpe.*+ 6 Wakatuitshikijila nyuma eu wa bungi* ku butuangaji bua Yezu Kristo Mupandishi wetu,+ 7 bua tuetu bamane kubadibua bakane ku diambuluisha dia ngasa wa yeye au,+ tulue bapianyi+ bilondeshile ditekemena dia muoyo wa tshiendelele.+

8 Mêyi aa nga kueyemena ne ndi musue bua utungunuke ne kuimanyina pa malu aa, bua bantu badi bitabuje Nzambi bateke meji abu ku dilama midimu mimpe. Malu aa mmimpe ne adi ambuluisha bantu.

9 Kadi kubuelakanyi mu dielangana mpata dia malu mapote ne dilondolola dia milongo ya bankambua ne dikokangana ne diluangana bua Mikenji, bualu kabiena ne dikuatshisha ne mbintu tshianana.+ 10 Bua muntu udi ujula kasumbu kampanda,+ wewe mumane kumudimuija* musangu wa kumpala ne musangu muibidi,+ umubenge,+ 11 mumanye ne: muntu wa mushindu eu mmupambuke mu njila muimpe, udi wenza mpekatu ne udi udipisha yeye nkayende.

12 Pangatuma Âtema anyi Tukiko+ kuudi, wenze muebe muonso bua ulue kundi ku Nikopoli, bualu kuoku aku ke kundi mupangadije bua kupitshishila muvu wa mashika makole.* 13 Pesha Zena, mumanyi wa Mikenji, ne Apolo bintu bionso bidibu nabi dijinga, bua kabapangidi tshintu nansha tshimue bua luendu luabu.+ 14 Kadi bana betu balonge pabu mua kuikala benza midimu mimpe bua bamone mua kuambuluisha padiku dijinga dia lukasa lukasa,+ bua kabapangi mua kuenza midimu mimpe.*+

15 Bantu bonso badi nanyi badi bakuela muoyo. Ngelela bantu badi batunange mu ditabuja muoyo.

Ngasa ikale nenu bonso.