MUKANDA WA KUMPALA WA PETELO

1 Petelo, mupostolo+ wa Yezu Kristo, kudi bantu badi basombe bu benyi badi batangalake mu Ponto, Galatiya, Kapadokia,+ Asia, ne Bitunia, kudi basungula 2 bilondeshile didianjila kumanya dia Nzambi Tatu,+ ne divuijibua ba tshijila ku nyuma,+ bua bikale batumikila ne bikale bantu bamiamina mashi a Yezu Kristo:+

Ngasa ne ditalala bivulangane kunudi.

3 Nzambi ne Tatu wa Mukalenge wetu Yezu Kristo atumbishibue, bualu bilondeshile luse luende lunene wakatupesha diledibua dipiadipia+ bua ditekemena didi ne muoyo+ ku diambuluisha dia dibishibua dia Yezu Kristo ku lufu,+ 4 bua bumpianyi budi kabuyi mua kubola, kabuyi mua kunyanguka ne kabuyi mua kufubidila.+ Mbanulaminabu mu diulu,+ 5 nuenu badi balamibua ku bukole bua Nzambi ku diambuluisha dia ditabuja bua lupandu lukadi pa kubuluibua mu tshikondo tshia ku ndekelu. 6 Bua bualu ebu nudi nusanka bikole, nansha munudi babungamijibue, bikalabi bikengedibua, bua tshitupa tshîpi kudi mateta mashilashilangane,+ 7 bua bulenga bua ditabuja dienu budi butetshibue,+ bua mushinga mukole mupite wa or udi ujimina nansha mudibu bamutete* ne kapia, buikale bualu bua butumbi ne lumu ne bunême mu tshikondo tshia dibuluibua dia Yezu Kristo.+ 8 Nansha munudi kanuyi banji kumumona, nudi bamunange. Nansha munudi kanuyi numumona mpindieu, nudi nuleja ditabuja kudiye ne nudi nusanka bikole ne disanka dia butumbi didi kadiyi kumvuija, 9 panudi nufika ku tshipatshila tshia ditabuja dienu, lupandu luenu.*+

10 Bua lupandu elu, baprofete bavua bambe mêyi a buprofete a bualu bua ngasa uvua munulongoluela, bakakonkonona ne muoyo mujima ne kuenzabu makebulula bimpe bimpe.+ 11 Bakatungunuka ne kukebulula tshikondo tshisunguluke anyi tshikondo tshivua nyuma uvua munda muabu uleja bua bualu bua Kristo,+ pavuaye mudianjile kujadika bua makenga avua mafundila Kristo+ ne bua butumbi buvua ne bua kulonda. 12 Bakababuluila ne: kabavua badikuatshila mudimu, kadi bavua banukuatshilawu nuenu, bua malu adibu banumanyisha mpindieu kudi bantu bavua banuambile lumu luimpe ne nyuma muimpe* uvuabu batume ufuma mu diulu.+ Mu malu aa mene mmudi banjelu bajinga bua kutangilamu.

13 Nunku, nulongolole meji enu bua mudimu;+ nulame bieledi bienu bia meji tshishiki;+ nuteke ditekemena dienu ku ngasa wanutuadilabu ku dibuluibua dia Yezu Kristo. 14 Bu bana batumikidi, lekelayi kufumbibua kudi* majinga anuvua nawu kumpala mu dipanga dienu, 15 kadi bu Wa Tshijila uvua munubikile, nuenu bine nulue ba tshijila mu bikadilu bienu bionso,+ 16 bualu mbafunde ne: “Nudi ne bua kuikala ba tshijila, bualu meme ndi wa tshijila.”+

17 Kabidi, nuenu nubila Tatu udi ulumbuluisha kakuyi kansungansunga+ bilondeshile bienzedi bia muntu ne muntu, nuenze malu ne ditshina+ mu tshikondo tshinudi basombe bu benyi. 18 Bualu nudi bamanye ne: kabavua banupikule* ku nsombelu wa tshianana uvua munushila kudi bankambua* benu ne bintu bidi binyanguka, ne arjan anyi ne or to.+ 19 Kadi bavua banupikule ne mashi a mushinga mukole,+ bu a muana wa mukoko + udi kayi kalema, kayi katoba, mashi a Kristo.+ 20 Bulelela, uvua mudianjile kumanyika kumpala kua mbangilu wa ba pa buloba,+ kadi wakamueneshibua ku ndekelu kua bikondo bua bualu buenu.+ 21 Ku butuangaji buende, nudi bitabuje Nzambi,+ wakamujula ku lufu+ ne kumupesha butumbi,+ bua ditabuja dienu ne ditekemena dienu bikale mu Nzambi.

22 Mpindieu unudi badikezule* ku ditumikila dienu dia bulelela, binufikishe ku dinanga bana betu kakuyi lubombo,+ nunangangane bikole ne muoyo umue.+ 23 Bualu mbanupeshe diledibua dipiadipia,+ ki nku dimiinu didi dibola, kadi nku dimiinu* didi kadiyi dibola,+ ku diambuluisha dia dîyi dia Nzambi wa muoyo udi ushalaku kashidi.+ 24 Bualu “bantu bonso badi* bu bisonsa ne butumbi buabu buonso budi bu bilongo bia mu mpata; tshisonsa tshidi tshifubidila, ne tshilongo tshidi tshimata, 25 kadi dîyi dia Yehowa* didi dishalaku kashidi.”+ Ne “dîyi” edi, ke lumu luimpe luvuabu banuambile.+

2 Nunku, umbushayi malu mabi onso+ ne mashimi ne lubombo ne dialakana ne bijanu bionso. 2 Bu bana batshidibu balelelaku,+ nupete dijinga dikole dia mabele a dîyi adi kaayi masambakaja ne tshintu,* bua ku diambuluisha diawu nukole too ne ku lupandu,+ 3 kadi anu nuenu balabule* ne: Mukalenge mmuimpe.

4 Panudi nulua kudiye, dibue didi ne muoyo divuabu babenge kudi bantu+ kadi disungula kudi Nzambi ne dia mushinga mukole kudiye,+ 5 nuenu bine bu mabue adi ne muoyo, nudi nuibakibua nzubu wa mu nyuma+ bua kuikala bakuidi ba tshijila, bua kufila milambu ya mu nyuma+ idi Nzambi wanyisha ku butuangaji bua Yezu Kristo.+ 6 Bualu badi bamba mu Mifundu ne: “Tangilayi! Ndi nteka dibue disungula mu Siona, dibue dia mu ditumba dia mushinga mukole dia tshishimikidi, muntu udi uleja ditabuja kudidi kakuedibua mâyi ku makasa* nansha.”+

7 Nunku, nkunudi nuenu kudiye ne mushinga mukole, bualu nudi bena kuitabuja; kadi kudi badi kabayi bitabuja, “dibue diakabenga bibaki,+ diodi edi ndilue dibue dinene dia mu ditumba”*+ 8 ne “dibue dia tshilenduishi ne dibue dinene didi dishindishangana.”+ Badi balenduka bualu kabena batumikila dîyi to. Bavua babasungule mbua bualu ebu mene. 9 Kadi nuenu nudi “tshisa tshisungula, bakuidi bikale bakalenge, tshisamba tshia tshijila,+ tshisamba bua kuikala tshintu tshia Nzambi tshia pa buatshi,+ bua numanyishe miaba yonso bikadilu bitambe buimpe”*+ bia Yeye uvua munubikile bua kupatuka mu mîdima kubuela mu butoke buende bua dikema.+ 10 Bualu kumpala kanuvua tshisamba, kadi mpindieu nudi tshisamba tshia Nzambi;+ kumpala kanuvua bafuidibue luse, kadi mpindieu nudi bafuidibue luse.+

11 Bananga, ndi nnulomba bu bantu ba ku babende ne bena luendu+ bua nutungunuke ne kudikanda ku majinga a mubidi+ adi anuluisha.*+ 12 Nuikale anu ne bikadilu bimpe munkatshi mua bisamba,+ bua padibu banubanda bu benji ba malu mabi, badimuene nkayabu bienzedi bienu bimpe+ ne bafike ku ditumbisha Nzambi mu dituku dia dikonkonona diende.

13 Bua bualu bua Mukalenge, nukokele tshionso tshidi bantu benze:*+ nansha mukalenge+ bua mudiye ku mutu 14 anyi banguvena bu batumibue kudiye bua kunyoka benji ba malu mabi, kadi bua kutumbisha benji ba malu mimpe.+ 15 Bualu disua dia Nzambi didi ne: panudi nuenza malu mimpe, nupuwishe* diakula dia dipanga dia bantu badi kabayi ne meji.+ 16 Nuikale bu bantu badi ne budikadidi,+ kanuyi nukuata mudimu ne budikadidi buenu bu tshibuikilu* bua kuenza malu mabi,+ kadi bu bapika ba Nzambi.+ 17 Nunemeke bantu ba mishindu yonso,+ nunange tshisumbu tshijima tshia bana betu,*+ nutshine Nzambi,+ nunemeke mukalenge.+

18 Bena mudimu bakokele bamfumu babu ne ditshina dionso didi dibakumbanyine,+ ki nganu badi bimpe badi kabayi ne malu makole, kadi nansha bena malu makole kabidi. 19 Bualu mbimpe padi muntu unanukila mu ntatu* ne ukenga kayi ne bualu budiye muenze anu bua kondo ka muoyo kudi Nzambi.+ 20 Ne bidi ne dikuatshisha kayi bianututabu bua dienza dia mpekatu eku nunanukila bualu ebu?+ Kadi nuenu nunanukila mu makenga bua munudi nuenza malu mimpe, bualu ebu mbualu buimpe kudi Nzambi.+

21 Mu bulelela, bavua banubikile bua bualu ebu,* bualu nansha Kristo wakakenga bua bualu buenu,+ kunushilaye tshilejilu bua nuenu kulonda mu makasa ende bimpe menemene.+ 22 Kavua muenze mpekatu+ ne kabavua basangane dishima mukana muende nansha.+ 23 Pavuabu bamupenda,*+ kavua waluja bipendu* to.+ Pavuaye ukenga,+ kavua ufunyinangana to, kadi uvua muditeke yeye muine mu bianza bia Eu udi ulumbuluisha+ ne buakane. 24 Yeye muine uvua muambule mpekatu yetu+ mu mubidi wende ku mutshi,*+ bua tufue ku* mpekatu ne tuikale ne muoyo ku buakane. Ne “nuakondopibua ku mputa yende.”+ 25 Bualu nuvua bu mikoko idi ipambuka,+ kadi mpindieu nudi bapingane kudi mulami wa mikoko+ ne mutangidi wa anyima* yenu.

3 Bia muomumue, nuenu bakaji, kokelayi babayenu,+ bua bikala bakuabu kabayi batumikila dîyi, bapetshibue kakuyi dîyi ku diambuluisha dia bikadilu bia bakaji babu,+ 2 bualu mbadimuene bikadilu bienu bimpe+ pamue ne kanemu kakole. 3 Didilengeja dienu kadikadi dia pambelu (dilukisha dia nsuki ne divuala dia bilenga bia or+ anyi bilamba bilengele) 4 kadi dikale dia muntu musokome wa mu muoyo mu didilengeja didi kadiyi dinyanguka dia meji a ditalala ne mapole+ adi ne mushinga wa bungi ku mêsu kua Nzambi. 5 Bualu ke muvua bakaji ba tshijila ba kale bavua batekemena Nzambi badilengeja, bakokela babayabu, 6 anu bu muvua Sala utumikila Abalahama, umubikila ne: mukalenge.+ Ne nudi balue bana bende, kadi anu nuenu nutungunuka ne kuenza malu mimpe, kanuyi numvua buôwa to.+

7 Bia muomumue, nuenu balume, tungunukayi ne kusomba nabu bilondeshile dimanya.* Nubapeshe bunême+ bu tshivuadi tshitambe butekete, tshia buntu bukaji, bualu badi pabu bapianyi nenu+ ba ngasa wa muoyo, bua masambila enu kaapangishibu.

8 Ndekelu wa bionso, nuenu bonso nuikale tshintu tshimue mu lungenyi,*+ nuditeka pa muaba wa bakuabu, nunangangana bikole bu bana ba muntu, numvuilangana luse+ ne nudipuekesha.+ 9 Kanupingaji bubi ku bubi+ anyi tshipendu ku tshipendu.+ Kadi nupingaje dibenesha,+ bualu nuvua babikidibue bua bualu ebu,* bua nupiane dibenesha.

10 Bualu “muntu yonso udi musue kunanga muoyo ne kumona matuku mimpe udi ne bua kulama ludimi luende ku malu mabi+ ne mishiku yende ku diakula malu a dishima. 11 Yeye umbuke ku malu mabi,+ enze malu mimpe;+ akebe ditalala ne adilonde.+ 12 Bualu mêsu a Yehowa* adi kudi bantu bakane, ne matshi ende adi ateleja disengelela diabu,+ kadi mpala wa Yehowa* mmutangija kudi badi benza malu mabi.”+

13 Mu bulelela, nnganyi wanuenzela bibi nuenu balue bena tshisumi bua malu mimpe?+ 14 Kadi nansha nuenu ne bua kukenga bua bualu bua buakane, nudi ba diakalenga.+ Kadi kanutshinyi tshidibu batshina,* ne kanupampakanyi to.+ 15 Kadi nujidile Kristo bu Mukalenge mu mioyo yenu, badiakaje misangu yonso bua kuandamuna kumpala kua muntu yonso udi unukonka bua tshinyi nudi ne ditekemena dinudi nadi, kadi nuenza nanku ne bupole+ ne kanemu kakole.+

16 Nuikale anu ne kondo ka muoyo kimpe,+ bua mu mushindu wonso udibu bakula bibi bua bualu buenu, bantu badi bakula bibi bua bualu buenu bafuishibue bundu+ bua bikadilu bienu bimpe bu bayidi ba Kristo.+ 17 Bualu mbimpe kukenga bua munudi nuenza malu mimpe,+ bikalabi disua dia Nzambi dia kulekela bualu ebu, pamutu pa kukenga ne: mbualu nudi nuenza malu mabi.+ 18 Bualu Kristo wakafua musangu umue bua kashidi bua mpekatu,+ muntu muakane bua bantu badi kabayi bakane,+ bua kunulombola kudi Nzambi.+ Wakashipibua mu mubidi,+ kadi wakavuijibua ne muoyo mu nyuma.+ 19 Mu nsombelu eu wakaya, kuyishaye nyuma ivua mu buloko,+ 20 ivua mibenge kutumikila kale pavua Nzambi muindile ne lutulu* mu matuku a Noa,+ pavuabu benza buatu,+ muvua bantu bakese, mmumue ne: anyima* muanda mukulu, basungidibue pa mâyi.+

21 Dibatiza didi dipetangana ne bualu ebu didi dinupandisha penu mpindieu (ki nku diumbusha dia manyanu a mubidi, kadi nku dilomba Nzambi kondo ka muoyo kimpe),+ ku diambuluisha dia dibishibua dia Yezu Kristo ku lufu. 22 Yeye udi ku tshianza tshia balume tshia Nzambi,+ bualu uvua muye mu diulu, ne banjelu ne makokeshi ne makole biakatekibua ku bukokeshi buende.+

4 Bu muvua Kristo mukenge mu mubidi,+ nuenu penu nudipaye ne lungenyi lua* muomumue; bualu muntu udi mukenge mu mubidi mmulekele mpekatu,+ 2 bua ikale ne muoyo tshikondo tshitshidi tshimushadile mu mubidi, kabiyi bua majinga a bantu,+ kadi bua disua dia Nzambi.+ 3 Bualu tshikondo tshikadi tshipite atshi ntshikumbane tshinuvua nuenza disua dia bisamba+ panuvua badifile mu bienzedi bia tshikadilu tshia dikamakama,* majinga makole bua kukanda, dinua dipitshisha, bibilu bia bisankasanka,* bunuavi, ne ditendelela dibi dia mpingu.+ 4 Badi bakema bualu kanuena nutungunuka ne kunyema nabu mu njila mubi wa muomumue wa buenzavi to, nunku badi bakula bibi bua bualu buenu.+ 5 Kadi bantu aba nebalumbulule kumpala kua yeye udi pabuipi ne kulumbuluisha badi ne muoyo ne bafue.+ 6 Mu bulelela, ke bualu kayi bakambila kabidi bafue lumu luimpe,+ bua nansha mudibu babalumbuluisha mu mubidi bilondeshile mmuenenu wa bantu, bikale ne muoyo mu diumvuangana ne nyuma bilondeshile mmuenenu wa Nzambi.

7 Kadi nshikidilu wa malu onso ukadi musemene pabuipi. Nunku nuikale ne meji majalame,+ ne nuikale badimuke* bua kudifila mu masambila.+ 8 Kumpala kua malu onso, nunangangane bikole,+ bualu dinanga didi dibuikila mpekatu mipite bungi.+ 9 Nuikale nuakidilangana kanuyi ne manunganyi.+ 10 Bilondeshile mudi muntu ne muntu mupete tshipedi, nukuate natshi mudimu bua kukuatshishangana bu balami bimpe ba ngasa wa Nzambi udi ulejibua mu mishindu mishilashilangane.+ 11 Bikala muntu wakula, enza nunku bu muntu udi wakula mêyi a kudi Nzambi; bikala muntu ukuatshilangana mudimu, enze nunku bu udi weyemena bukole budi Nzambi ufila;+ bua Nzambi atumbishibue mu malu onso+ ku butuangaji bua Yezu Kristo. Butumbi ne bukole mbiende kashidi ne tshiendelele. Amen.

12 Bananga, kanukemi bua mateta makole adi bu kapia anudi nutuilangana nawu,+ bienze bu ne: mbualu bupiabupia budi bunuenzekela. 13 Kadi nuenu tungunukayi ne kusanka+ bua muaba unukadi mu diabanyangana dia makenga a Kristo,+ bua nusanke ne nutunke kabidi ne disanka mu dibuluibua dia butumbi buende.+ 14 Bobu banuamba* bua dîna dia Kristo, nudi ba diakalenga,+ bualu nyuma wa butumbi, eyowa, nyuma wa Nzambi, udi pambidi penu.

15 Kadi muntu nansha umue wa kunudi kakengi bu mushipianganyi anyi bu muivi anyi bu muenji wa malu mabi anyi bu mubuelakanyi wa mu malu a bende.+ 16 Kadi bikala muntu ukenga bu muena Kristo, kumvu bundu to,+ kadi atungunuke ne kutumbisha Nzambi padiye eku muikale ne dîna edi. 17 Bualu etshi ntshikondo tshisungula bua dilumbuluisha kutuadijadi ne nzubu wa Nzambi.+ Kadi bikaladi dituadijila kutudi,+ ntshinyi tshiafikila bantu badi kabayi batumikila lumu luimpe lua Nzambi?+ 18 “Ne bikala muntu muakane upandishibua ne lutatu, ntshinyi tshiafikila muntu udi kayi utshina Nzambi ne muenji wa mpekatu?”+ 19 Nunku, bantu badi bakenga mu diumvuangana ne disua dia Nzambi batungunuke ne kudifila* kudi Mufuki udi ne lulamatu padibu eku benza malu mimpe.+

5 Nunku, bu mundi panyi mukulu, mumonyi wa makenga a Kristo ne eu wapeta pende butumbi budi ne bua kubuluibua,+ ndi ndomba* bakulu badi munkatshi muenu ne: 2 Nulame tshisumbu tshia mikoko ya Nzambi+ tshidi mu bianza bienu, nuenza mudimu bu batangidi,* kanuyi benzeja ku bukole, kadi ku budisuile kumpala kua Nzambi;+ kabiyi bua dinanga dia bintu bipeta mu njila mibi,+ kadi ne muoyo wa disanka; 3 kanuyi nukokesha ne bumfumu pa bantu badi bumpianyi bua Nzambi,+ kadi nulue bilejilu kudi mikoko.+ 4 Ne pamueneshibua mulami munene wa mikoko,+ nenupete tshifulu tshia butumbi tshidi katshiyi tshifubidila.+

5 Bia muomumue, nuenu bansongalume, nukokele bantu bakulumpe.*+ Kadi buonso buenu nuvuale* didipuekesha* kudi umue ne mukuabu, bualu Nzambi kena wanyisha badibandishi, kadi udi upesha bantu badi badipuekesha ngasa.+

6 Nunku, nudipuekeshe muinshi mua tshianza tshia bukole tshia Nzambi, bua anubandishe mu tshikondo tshikumbane,+ 7 panudi eku numupuila ntatu* yenu yonso,+ bualu yeye udi unutabalela.+ 8 Nulame bieledi bienu bia meji, nuikale badimuke!+ Muena lukuna wenu, Diabolo, udi utambakana bu ntambue udi ukungula, ukeba bua kudia muntu.*+ 9 Kadi numukandamene,+ bashindame mu ditabuja, bamanye ne: tshisumbu tshijima tshia bana benu* badi pa buloba tshidi tshituilangana ne makenga a muomumue.+ 10 Kadi panyima pa nuenu bamane kukenga tshitupa tshîpi, Nzambi wa ngasa yonso, uvua munubikile ku butumbi buende bua tshiendelele+ mu buobumue ne Kristo, yeye muine neashikije dilongesha dienu. Neanushindamije,+ neanukoleshe,+ neanujalamije panshi bikole. 11 Bukole buikale kudiye kashidi. Amen.

12 Ndi munufundile mu mêyi makese ku butuangaji bua Siluwano*+ undi ngangata bu muanetu wa lulamatu, bua kunukankamija ne bua kunupesha bujadiki ne muoyo mujima ne: eu ke ngasa mulelela wa Nzambi. Nushale bashindamamu. 13 Yeye udi mu Babilona, musungula bu nuenu, udi unutumina muoyo, ne muananyi Mâko+ kabidi. 14 Nuelangane muoyo ne dituangana dia mishiku dia dinanga.

Ditalala dikale nenu bonso badi mu buobumue ne Kristo.