TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • nwt 2 Petelo 1:1-3:18
  • 2 Petelo

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • 2 Petelo
  • Bible—Nkudimuinu wa bulongolodi bupiabupia
Bible—Nkudimuinu wa bulongolodi bupiabupia
2 Petelo

MUKANDA MUIBIDI WA PETELO

1 Simona Petelo, mupika ne mupostolo wa Yezu Kristo, kudi bantu badi bapete ditabuja dia mushinga mukole bu ditudi nadi* ku diambuluisha dia buakane bua Nzambi wetu ne bua Mupandishi Yezu Kristo:

2 Ngasa ne ditalala bivulangane kunudi ku diambuluisha dia dimanya dijalame+ dia Nzambi ne dia Yezu Mukalenge wetu, 3 bualu bukole buende bua bunzambi mbutupeshe* bintu bionso bidi bikengela bua kuikala ne muoyo ne kulamata Nzambi ku diambuluisha dia dimanya dijalame dia Yeye uvua mutubikile+ kupitshila ku butumbi ne bikadilu bimpe. 4 Ku malu aa, mmutupeshe* milayi ya mushinga mukole ne mitambe bunene,+ bua ku diambuluisha diayi nupete penu bunzambi,+ bamane kupanduka ku dibola dia pa buloba didi difumina ku dijinga dibi.*

5 Bua bualu ebu mene, nudienzeje ne muoyo umue+ bua nusakidile ku ditabuja dienu bikadilu bimpe,+ ku bikadilu bienu bimpe dimanya,+ 6 ku dimanya dienu didikanda, ku didikanda dienu+ dinanukila, ku dinanukila dienu dilamata Nzambi,+ 7 ku dilamata dienu dia Nzambi dinanga dia buwetu, ku dinanga dienu dia buwetu dinanga.+ 8 Bualu bikala malu aa munda muenu, muwule tente, neanupangishe bua kuikala bantu badi kabayi benza mudimu anyi badi kabayi bakuama mamuma+ pa bidi bitangila dimanya dijalame dia Mukalenge wetu Yezu Kristo.

9 Bualu muntu udi kayi ne malu aa mmpofu, ukanga mêsu ende bua kubenga kumona butoke,*+ ne mmulue muena tshipua muoyo bua dilengejibua diende ku mpekatu yende+ ya kale. 10 Nanku bana betu, nutambe kudienzeja ne muoyo mujima bua kujadika dibikidibua+ ne disungudibua dienu, bualu nuenu batungunuke ne kuenza malu aa, kanuakupangila nansha kakese.+ 11 Mu bulelela, mu mushindu eu ke muanupeshabu ne tshianza tshilekelela dibuela mu Bukalenge bua tshiendelele+ bua Mukalenge ne Mupandishi wetu Yezu Kristo.+

12 Bua bualu ebu, ndi musue kunuvuluija malu aa misangu yonso, nansha munudi baamanye ne bashindame bimpe mu bulelela budi munda muenu. 13 Kadi ndi mmona bikumbane, pantshidi mu ntenta* eu,+ bua kunusonsola ne mavuluija,+ 14 anu mundi mumanye ne: bakadi pa kumbusha ntenta wanyi eu, anu bu muvua kabidi Mukalenge wetu Yezu Kristo mundeje patoke.+ 15 Nengenze muanyi muonso misangu yonso bua pangikala muye, nuikale bakumbane bua kuvuluka* malu aa nkayenu.

16 Tòo, ki nku dilonda mianu ya dishima mifuikakaja kutuvua banumanyishe bukole ne dikalaku bia Mukalenge wetu Yezu Kristo to, kadi tuvua bamonyi ba butumbi buende bunene.+ 17 Bualu wakapeta bunême ne butumbi kudi Nzambi Tatu pavua butumbi bunene bufikishe kudiye mêyi bu aa:* “Eu mMuananyi, wanyi munanga, undi meme muine muanyishe.”+ 18 Eyowa, tuvua bumvue mêyi aa afumina mu diulu patuvua nende ku mukuna wa tshijila.

19 Nunku, tudi ne dîyi dia buprofete dijadika bimpe menemene, ne nudi nuenza bimpe panudi nuteyaku ntema bu ku muendu+ udi ukenkesha muaba mufiike (too ne pakadi butuku bukeba kutshia ne mutoto wa nkesha+ ubanda) mu mioyo yenu. 20 Bualu tshia kumpala nudi bamanye bualu ebu ne: kakuena dîyi dia buprofete dia mu Mifundu didi difuma ku diumvuija dia muntu. 21 Bualu dîyi dia buprofete kadivua dilue ku disua dia muntu musangu nansha umue to,+ kadi bantu bakakula malu a kudi Nzambi bu muvuabu benzeja* kudi nyuma muimpe.*+

2 Kadi kuakajuka kabidi baprofete ba dishima munkatshi mua bantu, anu muikalaku kabidi balongeshi ba dishima munkatshi muenu.+ Bantu aba nebabueje mu musokoko tusumbusumbu tudi tubutula, ne nebavile too ne mfumuabu uvua mubasumbe,+ badikebela kabutu ka lukasa. 2 Bualu bukuabu, bantu ba bungi nebalonde tshikadilu tshiabu tshia dikamakama,*+ ne bua bualu buabu nebakule bibi bua njila wa bulelela.+ 3 Kabidi, ne lukuka luonso nebanudie bintu ne mêyi a mashimi. Kadi dilumbuluisha diabu dikavuabu bapangadije kale+ kadiena dilua ne lujoko ne dibutuka diabu kadiena dilala.+

4 Bulelela, Nzambi kavua mudikande bua kunyoka banjelu bavua benze mpekatu to,+ kadi wakabela mu Tartare,*+ ubela mu nkanu ya* mîdima mikole bua balamibue bua dilumbuluisha.+ 5 Kavua mudikande bua kunyoka bantu ba kale to,+ kadi wakalama Noa, muyishi wa buakane,+ ne bantu bakuabu muanda mutekete+ pavuaye mutume mvula wa kabutu pa buloba bua bantu babi.+ 6 Pavuaye mushiye tshimenga tshia Sodoma ne tshia Amola anu butu, wakabikosela tshibawu,+ mushile bantu babi tshilejilu tshia malu adi ne bua kulua.+ 7 Wakasungila muntu muakane Lota+ uvua tshikadilu tshia dikamakama* tshia bashipi ba mikenji tshinyingalaja bikole, 8 bualu ku dituku ku dituku muntu muakane au uvua utatshisha anyima* wende muakane bua bienzedi bia dishipa dia mikenji bivuaye umona ne umvua pavuaye musombele munkatshi muabu. 9 Nunku Yehowa* mmumanye mua kusungila bantu badi balamate Nzambi mu diteta,+ kadi mua kulama bantu babi bua babutudibue* dituku dia dilumbuluisha,+ 10 nangananga bantu badi bakeba kunyanga mibidi ya bakuabu+ ne badi bapetula bukokeshi.*+

Bena dikamakama ne mutu mukole, kabena batshina bua kuakula bibi bua bantu badi ne butumbi, 11 padi eku banjelu, nansha mudibu bobu ne makanda ne bukole bia bungi, kabayi bababanda ne mêyi a bipendu, bua kanemu kadibu naku bua* Yehowa.*+ 12 Kadi bu nyama idi kayiyi ne meji idi yenza malu ne tshingenyingenyi, idi miledibue* bua kuyikuata ne kuyishipa, bantu aba badi bakula bibi bua malu adibu kabayi bamanye.+ Nebapete kabutu kakebesha kudi njila wabu wa kabutu, 13 bapeta dikenga bu difutu bua njila wabu mubi.

Badi bangata kuditua mu nsombelu wa babanji,*+ nansha munda munya, bu bualu bua disanka. Badi matoba ne bilema bikale basanka* mu malongesha abu a dishima padibu benza nenu bibilu bia disanka.+ 14 Mêsu abu mmuwule tente ne masandi+ ne kaena akokesha mua kulekela mpekatu, ne badi balobesha bantu* badi kabayi bashindame. Badi ne mioyo yabu mibidija ku lukuka. Mbana bedibue mulawu. 15 Padibu balekele njila mululame, mbapambuishibue. Mbalonde njila wa Balama+ muana wa Beo uvua munange difutu dia bualu bubi,+ 16 kadi wakabedibua bua dinyanga diende dia tshivua tshiakane.+ Nyama utu wambula majitu utu kayi wakula wakakula ne dîyi dia muntu ne wakapangisha tshienzedi tshia bupote tshia muprofete.+

17 Bantu aba badi mishimi idi kayiyi ne mâyi, mabungi adibu basaka kudi tshipepele tshikole, ne mbabalongoluele mîdima mifiike fitutuu.+ 18 Badi bakula bua malu manene adi kaayi ne mushinga. Kupitshila ku majinga a mubidi+ ne bienzedi bia tshikadilu tshia dikamakama,* badi bakoka bantu badi bafuma ku dinyema bantu badi mu dipambuka.+ 19 Padibu babalaya budikadidi apu, bobu bine mbapika ba dibola;+ bualu bikalabu bapite muntu bukole kudi muntu mukuabu, yeye mmupika wende.*+ 20 Bulelela, bikalabu bamane kupanduka ku dinyanguka dia pa buloba+ ku diambuluisha dia dimanya dijalame dia Mukalenge ne Mupandishi Yezu Kristo, badi babuelakana kabidi mu malu aa ne adi abapita bukole, nsombelu wabu wa ndekelu mmulue mubi mutambe buabu bobu kupita wa kumpala.+ 21 Bivua mua kuikala bimpe buabu bobu bu bobu kabayi bamanye bimpe njila wa buakane, pamutu pa bamane kumumanya, balekela mukenji wa tshijila uvuabu bapete.+ 22 Tshidi lusumuinu lulelela elu luamba ntshibakumbanyine: “Mbua mmupingane ku bilushi biende, ne ngulube uvuabu boweshe mâyi mmupingane bua kudibondakaja mu bitotshi.”+

3 Bananga, eu udi mpindieu mukanda muibidi undi nnufundila, mundi nsonsola bieledi bienu bimpe bia meji ku diambuluisha dia divuluija, anu bu mu mukanda wanyi wa kumpala,+ 2 bua nuvuluke mêyi mamba kale* kudi baprofete ba tshijila ne mukenji wa Mukalenge ne Mupandishi uvuaye muambe ku butuangaji bua bapostolo benu. 3 Tshia kumpala, numanye bualu ebu ne: mu matuku a ku nshikidilu, baseki nebalue ne tuseku tuabu, benza malu bilondeshile majinga abu,+ 4 bamba ne: “Dikalaku diende divuabu balaye adi didi kuepi?+ Kaah, katshia ku dituku divua bankambua betu balale tulu mu lufu, malu onso adi atungunuka ne kuikala muomumue anu muvuawu katshia ku tshibangidilu tshia bufuki!”+

5 Bualu badi bapua bualu ebu muoyo ku bukole, ne: kale kuvua diulu ne buloba buimane bushindame pa mutu pa mâyi, buikale munkatshi mua mâyi ku dîyi dia Nzambi;+ 6 kabidi ne: ku diambuluisha dia bintu ebi, buloba bua tshikondo atshi buakabutudibua pavuabu buwujibue ne mâyi.+ 7 Kadi ku dîyi diodimue, diulu ne buloba bidiku mpindieu mbilamibue bua kapia ne mbilamibue too ne ku dituku dia dilumbuluisha ne dia dibutuka dia bantu babi.+

8 Kadi bananga, kanupu bualu ebu muoyo ne: dituku dimue kudi Yehowa* didi bu bidimu tshinunu ne bidimu tshinunu bidi bu dituku dimue.+ 9 Yehowa* kena ne lujoko pa bidi bitangila mulayi wende,+ bu mudi bamue bantu bamona bobu lujoko to, kadi udi nenu lutulu, bualu ki mmusue bua muntu nansha umue abutudibue, kadi mmusue bua bonso bafike ku dinyingalala bua mpekatu yabu.+ 10 Kadi dituku dia Yehowa*+ nedilue bu muivi,+ mu dituku adi diulu nedipite+ ne mukungulu,* kadi bintu bimane kukuata kapia kakole nebivingutuke, ne buloba ne bintu bidipu nebiedibue patoke.+

11 Bu mudi bintu bionso ebi ne bua kuvingutuka mushindu eu, nuelangane meji a mushindu wa bantu unudi ne bua kuikala mu bienzedi bia tshikadilu tshia tshijila ne mu bienzedi bia dilamata Nzambi, 12 panudi bindile dikalaku dia dituku dia Yehowa*+ ne badilame mu meji bimpe,* mu dituku muabutuka diulu+ mu kapia kadi kalakuka ne muenguluka bintu bidimu mu kapia kakole! 13 Kadi bilondeshile mulayi wende, tudi bindile diulu dipiadipia ne buloba bupiabupia,+ ne muomu emu nemuikale buakane.+

14 Nunku, bananga, bu munudi bindile malu aa, nuenze muenu muonso bua ndekelu wa bionso anusangane kanuyi katoba, kanuyi kalema, ne mu ditalala.+ 15 Kabidi, nuangate lutulu lua Mukalenge wetu bu lupandu, anu bu muvua muanetu munanga Paulo munufundile pende bilondeshile meji avuabu bamupeshe,+ 16 wakula bua malu aa anu bu mudiye wenza mu mikanda yende yonso. Kadi amue malu adimu mmakole bua kuumvua, ne malu aa ngadi bantu badi ne dipanga* ne badi kabayi bashindame bakonyangaja, bu mudibu kabidi benza ne Mifundu mikuabu, bua dibutuka diabu.

17 Nunku, nuenu bananga, bu munudi badianjile kuikala ne dimanya edi, nudimuke bua kanupambuishibu nabu ku dipambuka dia bashipi ba mikenji ne kanulu kujimija dishindama* dienu.+ 18 Tòo, kadi tungunukayi ne kukola mu ngasa ne dimanya bia Mukalenge ne Mupandishi wetu Yezu Kristo. Butumbi buikale kudiye mpindieu too ne ku dituku dia tshiendelele. Amen.

Anyi “ditabuja didi ne diakalenga dia muomumue ne ditudi nadi.”

Anyi “mbutupeshe ne muoyo mujima.”

Anyi “mmutupeshe ne muoyo mujima.”

Anyi “dijinga dikole.”

Anyi pamuapa: “mpofu, muntu udi kayi umona kule.”

Mmumue ne: mubidi wende wa pa buloba.

Anyi “kuakula.”

Ku mua.: “bu dîyi edi.”

Ku mua.: “bambula; batuala.”

Anyi “spiritu munsantu; nyuma wa tshijila.” Tang. Diumv.

Anyi “bienzedi biabu bia tshikadilu tshia dipanga bundu.” Tshiambilu tshia mu tshiena Greke aselgeia ku bungi. Tang. Diumv.

Tang. Diumv.

Anyi pamuapa: “majimba a.”

Anyi “tshikadilu tshia dipanga bundu.” Mu tshiena Greke: aselgeia. Tang. Diumv.

Tang. Diumv.

Tang. Tshis. A5.

Ku mua.: “bumbushibue.”

Anyi “badiombola bumfumu.”

Anyi “kumpala kua.”

Tang. Tshis. A5.

Anyi “miledibue mutu nyama ilelangana.”

Mmumue ne: “didia, dinua ne dienza bibilu bia bisankasanka.”

Anyi “badi baditua mu disanka kadiyi mikalu.”

Anyi “anyima.”

Anyi “bienzedi bia tshikadilu tshia dipanga bundu.” Tshiambilu tshia mu tshiena Greke aselgeia ku bungi. Tang. Diumv.

Anyi “bapite muntu bukole kudi tshintu kampanda, yeye mmupika watshi.”

Anyi “malu madianjila kumanyisha.”

Tang. Tshis. A5.

Tang. Tshis. A5.

Tang. Tshis. A5.

Anyi “tshiona tshia tshimpitshimpi.”

Tang. Tshis. A5.

Anyi “nudijinga ne muoyo mujima.” Ku mua.: “nudiendesha lukasa.”

Anyi “badi kabayi balongesha.”

Anyi “dijalama.”

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu