MUKANDA WA KUMPALA WA YONE

1 Tshivuaku katshia ku tshibangidilu, tshituvua bumvue, tshituvua bamone ne mêsu etu, tshituvua batangile ne tshivua bianza bietu bilenge, tshidi tshitangila dîyi dia muoyo,+ 2 (eyowa, muoyo au wakamueneshibua, ne tudi bamone muoyo wa tshiendelele+ ne tufila bujadiki+ buawu ne tunumanyishawu wowu uvua kudi Tatu, ne uvua mumueneshibue kunudi), 3 tshituvua bamone ne bumvue ntshitudi tunumanyisha penu,+ bua nuenu penu nuikale netu bulunda.* Ne bulunda buetu ebu tudi nabu ne Tatu ne Muanende Yezu Kristo.+ 4 Nunku tudi tunufundila malu aa bua disanka dietu dikumbanangane dionso.

5 Eu mmukenji utuvua bumvue kudiye ne utudi tunumanyisha ne: Nzambi udi butoke,+ ne kakuena mîdima nansha mikese munda muende.* 6 Tuetu bambe ne: “Tudi nende bulunda,” kadi tutungunuka ne kuenda mu mîdima, tudi tushima ne katuena tuenza tshidi bulelela to.+ 7 Kadi tuetu tuenda mu butoke bu mudiye yeye muine muikale mu butoke, tudi ne bulunda kudi muntu ne muntu, ne mashi a Muanende Yezu adi atulengeja ku mpekatu yonso.+

8 Tuetu bambe ne: “Katuena ne mpekatu,” tudi tudishima tuetu nkayetu+ ne bulelela kabuena munda muetu. 9 Tuetu batonde mpekatu yetu, yeye mmuena lulamatu ne mmuakane bua kutubuikidila mpekatu yetu ne kutulengeja ku malu onso adi kaayi makane.+ 10 Tuetu bambe ne: “Katuena benze mpekatu,” tudi tumuvuija yeye muena dishima, ne dîyi diende kadiena munda muetu to.

2 Bana banyi bakese, ndi nnufundila malu aa bua kanuenji mpekatu to. Kadi muntu yeye muenze mpekatu, tudi ne muambuluishi* kudi Tatu, Yezu Kristo,+ muntu muakane.+ 2 Yeye udi mulambu wa kulengejangana nawu ne Nzambi*+ bua mpekatu yetu,+ ki nganu mpekatu yetu nkayayi, kadi kabidi ne ya ba pa buloba bonso.+ 3 Mu bualu ebu mmutudi tumanyina ne: tudi bafike ku dimumanya, mbuena kuamba ne: bituikala batungunuke ne kutumikila mikenji yende. 4 Muntu udi wamba ne: “Ndi mufike ku dimumanya,” kadi kayi utumikila mikenji yende, mmuena dishima ne bulelela kabuena munda mua muntu eu to. 5 Kadi muntu yonso udi utumikila dîyi diende, bulelela, dinanga dia Nzambi ndivuijibue dipuangane munda mua muntu au.+ Mu bualu ebu mmutudi tumanyina ne: tudi mu buobumue nende.+ 6 Muntu udi wamba ne: udi mu buobumue nende, mmuenzejibue bua kutungunuka ne kuenda anu bu muvua yeye au muende.+

7 Bananga, tshindi nnufundila ki mmukenji mupiamupia to, kadi mmukenji wa kale unukavua bapete katshia ku tshibangidilu.+ Mukenji wa kale au ndîyi dinuvua bumvue. 8 Ndi nnufundila kabidi mukenji mupiamupia udi mulelela mu bualu buende ne mu bualu buenu, bualu mîdima idi yenda ipita, ne butoke bua bushuwa bukadi butokesha.+

9 Muntu udi wamba mudiye mu butoke, kadi mukine+ muanabu, utshidi mu mîdima.+ 10 Muntu udi munange muanabu udi ushala mu butoke,+ ne munda muende kamuena tshintu tshidi tshilenduishangana to. 11 Kadi muntu udi mukine muanabu udi mu mîdima ne udi wenda mu mîdima,+ ki mmumanye kudiye uya to,+ bualu mîdima mmifofomije mêsu ende.

12 Bana bakese, ndi nnufundila bualu mbanubuikidile mpekatu yenu bua bualu bua dîna diende.+ 13 Nuenu batatu, ndi nnufundila bualu nudi bafike ku dimumanya yeye udi wa ku tshibangidilu. Nuenu bansongalume, ndi nnufundila bualu nudi batshimune mubi.+ Nuenu bana bakese, ndi nnufundila bualu nudi bafike ku dimanya Tatu.+ 14 Nuenu batatu, ndi nnufundila bualu nudi bafike ku dimumanya yeye udi wa ku tshibangidilu. Nuenu bansongalume, ndi nnufundila bualu nudi ne bukole+ ne dîyi dia Nzambi ndishale munda muenu+ ne nudi batshimune mubi.+

15 Kanunangi malu a ba pa buloba anyi bintu bia pa buloba.+ Muntu yeye munange malu a ba pa buloba, dinanga dia Tatu kadiena munda muende to;+ 16 bualu bintu bionso bia pa buloba, mmumue ne: majinga a mubidi,+ majinga a mêsu,+ ne kuleja bintu bia mu nsombelu ne lutambishi,* kabiena bifumina kudi Tatu, kadi bidi bifumina pa buloba. 17 Bualu bukuabu, buloba budi bupita, nansha dijinga diabu kabidi,+ kadi muntu udi wenza disua dia Nzambi udi ushalaku kashidi.+

18 Bana bakese, edi ndîba dia ndekelu, ne anu bu munudi bumvue ne: muluishi wa Kristo udi ulua,+ nansha mpindieu baluishi ba Kristo ba bungi bakadi bamueneke,+ ne bualu ebu mbutudi bamanyine ne: edi ndîba dia ndekelu. 19 Bavua bumbuke kutudi, kadi kabavua ba mushindu umue netu to;*+ bualu bu bobu ba mushindu umue netu, bavua mua kuikala bashale netu. Kadi bavua bumbuke bua bimueneke patoke ne: bonso ki mba mushindu umue netu to.+ 20 Nudi bedibue manyi kudi wa tshijila,+ ne nuenu bonso nudi ne dimanya. 21 Ndi nnufundila, ki mbualu kanuena bamanye bulelela,+ kadi bualu nudi babumanye, ne bualu dishima nansha dimue kaditu difumina ku bulelela to.+

22 Nnganyi udi muena dishima? Ki mmuntu udi uvila ne: Yezu kena Kristo anyi?+ Au ke muluishi wa Kristo,+ muntu udi uvila Tatu ne Muana. 23 Muntu yonso udi uvila Muana kena kabidi ne Tatu to.+ Kadi muntu yonso udi witabuja Muana+ udi kabidi ne Tatu.+ 24 Kadi nuenu, malu anuvua bumvue katshia ku tshibangidilu adi ne bua kushala munda muenu.+ Bikala malu anuvua bumvue katshia ku tshibangidilu mashale munda muenu, nenushale penu mu buobumue ne Muana ne mu buobumue ne Tatu. 25 Bualu bukuabu, tshivuaye yeye muine mutulaye ntshiotshi etshi: muoyo wa tshiendelele.+

26 Ndi nnufundila malu aa bua bantu badi bakeba kunupambuisha. 27 Kadi nuenu, diedibua manyi dinuvua bapete kudiye+ didi dishala munda muenu, ne kanuena dijinga ne muntu mukuabu ikale unulongesha to; kadi diedibua manyi dia kudiye didi dinulongesha bua malu onso,+ ndilelela, ki ndia dishima to. Anu bu mudidi dinulongeshe, nushale mu buobumue nende.+ 28 Nunku mpindieu, bana bakese, nushale mu buobumue nende, bua padiye umueneshibua, tuikale ne dikima dia kuakula,+ katuyi tumunyema ne bundu mu tshikondo tshia dikalaku diende to. 29 Nuenu bamanye ne: yeye udi muakane, nudi kabidi bamanye ne: muntu yonso udi utungunuka ne kuenza malu makane mmuledibue kudiye.+

3 Tangilayi mushindu wa dinanga didi Tatu mutupeshe,+ bua batubikile ne: bana ba Nzambi!+ Ne ke tshitudi. Ke bualu kayi ba pa buloba ki mbatumanye,+ bualu ki mbafike ku dimumanya.+ 2 Bananga, tudi mpindieu bana ba Nzambi,+ kadi tshituikala ki ntshianji kumueneshibua to.+ Tudi bamanye ne: padiye umueneshibua, netuikale bu yeye, bualu netumumone anu bu mudiye. 3 Muntu yonso udi ne ditekemena edi munda muende, udi udikezula yeye muine,+ anu bu mudi yeye au mukezuke.

4 Muntu yonso udi utungunuka ne kuenza mpekatu udi utungunuka kabidi ne kushipa mikenji, nunku mpekatu ndishipa dia mikenji. 5 Nudi bamanye kabidi ne: yeye uvua mumueneshibue bua kumbusha mpekatu yetu,+ ne kakuena mpekatu munda muende to. 6 Muntu yonso udi ushala mu buobumue nende kena utungunuka ne kuenza mpekatu;+ muntu udi utungunuka ne kuenza mpekatu ki mmuanji kumumona anyi mufike ku dimumanya to. 7 Bana bakese, muntu nansha umue kanupambuishi to; muntu udi utungunuka ne kuenza malu makane mmuntu muakane, anu bu mudi yeye au muakane. 8 Muntu udi utungunuka ne kuenza mpekatu udi ufumina kudi Diabolo, bualu Diabolo utu wenza mpekatu katshia ku tshibangidilu.*+ Bua bualu ebu Muana wa Nzambi wakamueneshibua, bua kubutula* midimu ya Diabolo.+

9 Muntu yonso udi muledibue kudi Nzambi kena utungunuka ne kuenza mpekatu to,+ bualu dimiinu* Diende didi dishala munda mua muntu eu, ne kena mua kutungunuka ne kuenza mpekatu to, bualu mmuledibue kudi Nzambi.+ 10 Bana ba Nzambi ne bana ba Diabolo badi bamuenekela ku bualu ebu: Muntu yonso udi kayi utungunuka ne kuenza malu makane kena ufumina kudi Nzambi, nansha muntu udi kayi munange muanabu.+ 11 Bualu eu ke mukenji unudi bumvue katshia ku tshibangidilu: bua tuetu tunangangane;+ 12 ki mbu Kayina uvua mufumine kudi mubi ne mushipe muanabu to.+ Uvua mumushipe bua tshinyi? Bualu midimu yende yeye ivua mibi,+ kadi ya muanabu ivua miakane.+

13 Bana betu, kanukemi bua mudi ba pa buloba banukine.+ 14 Tudi bamanye ne: tudi bumbuke ku lufu balue ku muoyo,+ bualu tudi banange bana betu.+ Muntu udi kayi unangangana udi ushala mu lufu.+ 15 Muntu yonso udi mukine muanabu mmushipianganyi,+ ne nudi bamanye ne: kakuena mushipianganyi udi ne muoyo wa tshiendelele ushala munda muende.+ 16 Mu bualu ebu tudi bafike ku dimanya dinanga, bualu yeye au wakafila muoyo* wende bua bualu buetu,+ tudi benzejibue bua kufila mioyo* yetu bua bana betu.+ 17 Kadi muntu yonso udi ne bintu bia pa buloba ebu ne umona muanabu ukengela tshintu kadi ubenga kumuleja luse, mmushindu kayi udi dinanga dia Nzambi mua kushala munda muende?+ 18 Bana bakese, katuena ne bua kunangangana anu ne mêyi anyi ne ludimi patupu,+ kadi tunangangane mu bienzedi+ ne mu bulelela.+

19 Mu bualu ebu, netumanye ne: tudi bafumine ku bulelela, ne netujadikile* mioyo yetu kumpala kuende 20 bua bualu buonso budi mioyo yetu mua kuikala itupisha nabu, bualu Nzambi mmunene kupita mioyo yetu ne mmumanye malu onso.+ 21 Bananga, bikala mioyo yetu kayiyi itupisha, tudi ne dikima dia kuakula kumpala kua Nzambi;+ 22 ne tshionso tshitudi tulomba tudi tutshipeta kudiye,+ bualu tudi tutumikila mikenji yende ne tuenza malu adi asankisha ku mêsu kuende. 23 Bushuwa, eu ke mukenji wende: bua tuikale ne ditabuja mu dîna dia Muanende Yezu Kristo+ ne bua tunangangane,+ anu bu muvuaye mutuelele mukenji. 24 Bualu bukuabu, muntu udi utumikila mikenji yende udi ushala mu buobumue nende, ne yeye mu buobumue ne muntu eu.+ Ku nyuma uvuaye mutupeshe, tudi bamanye ne: yeye udi ushala mu buobumue netu.+

4 Bananga, kanuitabuji dîyi dionso diamba ku bukole bua nyuma* to,+ kadi nutete mêyi mamba ku bukole bua nyuma* bua kumona ni adi afumina kudi Nzambi,+ bualu baprofete ba dishima ba bungi mbapatuke pa buloba.+

2 Mushindu eu ke unudi numanya ne: dîyi diamba ku bukole bua nyuma edi didi difumina kudi Nzambi: Dîyi dionso diamba ku bukole bua nyuma didi ditaba mudi Yezu Kristo mulue mu mubidi, didi difumina kudi Nzambi.+ 3 Kadi dîyi dionso diamba ku bukole bua nyuma didi kadiyi ditaba Yezu, ki ndifumine kudi Nzambi to.+ Kabidi, edi ndîyi diamba ku bukole bua nyuma dia muluishi wa Kristo, dinuvua bumvue ne: didi dilua,+ ne mpindieu dikadi pa buloba.+

4 Bana bakese, nuenu nudi nufumina kudi Nzambi ne nudi babatshimune,+ bualu eu udi mu buobumue nenu+ mmunene kupita eu udi mu buobumue ne ba pa buloba.+ 5 Bobu mbafumine pa buloba;+ ke bualu kayi badi bakula malu adi afumina pa buloba ne ba pa buloba badi babateleja.+ 6 Tuetu tudi bafumine kudi Nzambi. Muntu yonso udi ufika ku dimanya Nzambi udi ututeleja;+ muntu yonso udi kayi mufumine kudi Nzambi kena ututeleja to.+ Mu bualu ebu mmutudi tutapulula dîyi dia bulelela diamba ku bukole bua nyuma ne dîyi dia dishima diamba ku bukole bua nyuma.+

7 Bananga, tutungunukayi ne kunangangana,+ bualu dinanga didi difumina kudi Nzambi, ne muntu yonso udi unangangana mmuledibue kudi Nzambi ne mmumanye Nzambi.+ 8 Muntu yonso udi kayi unangangana ki mmuanji kufika ku dimanya Nzambi, bualu Nzambi udi dinanga.+ 9 Mu bualu ebu dinanga dia Nzambi diakamueneshibua bua bualu buetu, ne: Nzambi wakatuma Muanende mulela umuepele+ pa buloba bua tupete muoyo ku butuangaji buende.+ 10 Dinanga didi dimuenekela mu bualu ebu, ki mbua ne: tuetu tuvua banange Nzambi to, kadi nne: yeye wakatunanga, kutumaye Muanende bu mulambu wa kulengejangana nawu ne Nzambi*+ bua mpekatu yetu.+

11 Bananga, bikala Nzambi mutunange mushindu eu, nunku tuetu petu tudi benzejibue bua kunangangana.+ 12 Muntu nansha umue ki mmuanji kumona Nzambi musangu nansha umue.+ Tuetu batungunuke ne kunangangana, Nzambi udi ushala munda muetu ne dinanga diende didi divuijibua dipuangane munda muetu.+ 13 Mu bualu ebu tudi bamanye ne: tudi bashale mu buobumue nende ne yeye mu buobumue netu, bualu mmutupeshe nyuma wende. 14 Bualu bukuabu, tuetu nkayetu tudi bamone ne tudi tujadika ne: Tatu mmutume Muanende bu mupandishi wa ba pa buloba.+ 15 Muntu yonso udi witaba ne: Yezu udi Muana wa Nzambi,+ Nzambi udi ushala mu buobumue ne muntu au ne yeye mu buobumue ne Nzambi.+ 16 Tudi bafike ku dimanya ne bitabuje dinanga didi Nzambi nadi buetu tuetu.+

Nzambi udi dinanga,+ ne muntu udi ushala mu dinanga udi ushala mu buobumue ne Nzambi ne Nzambi udi ushala mu buobumue nende.+ 17 Mu mushindu eu, dinanga ndivuijibue dipuangane munda muetu, bua tuikale ne dikima dia kuakula*+ mu dituku dia dilumbuluisha, bualu anu bu mudi yeye au, ke mutudi tuetu bine pa buloba ebu. 18 Kakuena ditshina mu dinanga,+ kadi dinanga dipuangane didi diumbusha* ditshina, bualu ditshina didi dituelela mikalu. Bulelela, muntu udi utshina ki mmuvuijibue mupuangane mu dinanga to.+ 19 Tudi tunanga, bualu yeye uvua mudianjile kutunanga.+

20 Muntu yeye muambe ne: “Ndi munange Nzambi,” kadi mukine muanabu, mmuena dishima.+ Bualu muntu udi kayi munange muanabu udiye mumone,+ kena mua kunanga Nzambi udiye kayi mumone.+ 21 Tudi bapete mukenji eu kudiye ne: muntu yonso udi munange Nzambi udi kabidi ne bua kunanga muanabu.+

5 Muntu yonso udi witabuja ne: Yezu udi Kristo, mmuledibue kudi Nzambi,+ ne muntu yonso udi munange yeye uvua muenzeje diledibua edi, mmunange yeye udi muledibue kudi yeye au. 2 Mu bualu ebu tudi bamanye ne: tudi banange bana ba Nzambi,+ patudi tunanga Nzambi ne tutumikila mikenji yende. 3 Bualu mona tshidi dinanga dia Nzambi diumvuija: bua tutumikile mikenji yende;+ pabi mikenji yende kayena ne bujitu,+ 4 bualu muntu yonso udi* muledibue kudi Nzambi udi utshimuna ba pa buloba.+ Edi ke ditshimuna didi ditshimune ba pa buloba: ditabuja dietu.+

5 Nnganyi udi mua kutshimuna ba pa buloba?+ Ki mmuntu udi witabuja ne: Yezu udi Muana wa Nzambi anyi?+ 6 Nyeye eu uvua mulue ku diambuluisha dia mâyi ne mashi, Yezu Kristo, kavua mulue ne mâyi nkayawu to,+ kadi ne mâyi ne mashi.+ Nyuma udi ujadika,+ bualu nyuma udi bulelela. 7 Bualu kudi bisatu bidi bijadika: 8 nyuma+ ne mâyi+ ne mashi;+ ne bisatu ebi bidi mu diumvuangana.

9 Tuetu bitabe bujadiki bua bantu, bujadiki bua kudi Nzambi mbupite bunene. Bualu ebu mbujadiki budi Nzambi ufila, bujadiki budiye mufile bua bualu bua Muanende. 10 Muntu udi witabuja Muana wa Nzambi udi ne bujadiki munda muende. Muntu udi kayi witabuja Nzambi mmumuvuije muena dishima,+ bualu ki mmuitabuje bujadiki buvua Nzambi mufile bua Muanende to. 11 Bujadiki budi nunku: Nzambi wakatupesha muoyo wa tshiendelele,+ ne muoyo eu udi munda mua Muanende.+ 12 Muntu udi ne Muana udi ne muoyo eu; muntu udi kayi ne Muana wa Nzambi kena ne muoyo eu to.+

13 Ndi nnufundila malu aa bua numanye ne: nudi ne muoyo wa tshiendelele,+ nuenu badi ne ditabuja mu dîna dia Muana wa Nzambi.+ 14 Dishindika* ditudi nadi kudiye didi nunku:+ tshintu tshionso tshitudi tulomba bilondeshile disua diende, udi ututeleja.+ 15 Kabidi, tuetu bamanye ne: udi utumvua bua tshintu tshionso tshitudi tulomba, tudi bamanye ne: netupete bintu bitudi tulomba, bualu tudi bamulombabi.+

16 Muntu yeye mumone muanabu wenza mpekatu udi kayi ufikisha ku lufu, nealombe, ne Nzambi neamupeshe muoyo,+ eyowa, udi uwupesha badi benza mpekatu udi kayi ufikisha ku lufu. Kudi mpekatu udi ufikisha ku lufu.+ Tshiena mmuambila bua kulomba bua mpekatu au to. 17 Bualu buonso budi kabuyi buakane mmpekatu,+ kadi kudi mpekatu udi kayi ufikisha ku lufu to.

18 Tudi bamanye ne: muntu yonso udi muledibue kudi Nzambi kena utungunuka ne kuenza mpekatu to, kadi eu udi muledibue kudi Nzambi* udi umulama, ne mubi kena mua kumukuata* to.+ 19 Tudi bamanye ne: tuetu tudi tufumina kudi Nzambi, kadi ba pa buloba bonso badi ku bukokeshi bua mubi.+ 20 Kadi tudi bamanye ne: Muana wa Nzambi mmulue,+ ne mmutupeshe lungenyi lutue* bua tupete dimanya dia yeye udi mulelela. Tudi mu buobumue ne yeye udi mulelela au+ ku butuangaji bua Muanende Yezu Kristo. Yeye udi Nzambi mulelela ne muoyo wa tshiendelele.+ 21 Bana bakese, nudilame ku mpingu.+