Tutumbishayi Nzambi mu Ditshionkomoka Mu Assemblée

Ku ntuadijilu wa bidimu bia 1880, Balongi ba Bible bakajingulula se: pa kumbusha dibuela mu bisangilu ne disombeshangana pamue ne bena mudimu nabo bavua pabuipi, bivua bibakengela kabidi bamanyangane ne bana babo ba mu miaba mikuabo. Nunku, kutuadijabo kulongolola kumpala-mpala assemblée ya ku tshidimu bua Balongi ba Bible ba ku Etats-Unis, pashishe, ba mu Canada. Bivua bikondo bia dikoleshangana mu nyuma, bikondo bivuabo bapeta malongesha mavule a mu Bible munkatshi mua matuku a bungi ne bivuabo bakankamijangana. Batismo wa bapiabapia bàvuà bakudimuna mutshima e kuluaye bumue bua ku malu manene a mu assemblée eyi. Assemblée ivua kabidi yambuluisha bua kufila bumanyishi bualabale patoke.​—⁠Lomo 1:​11, 12.

Lelu’eu, Bantemu ba Yehowa badi ne tshibidilu tshia kulongolola assemblée ya muomumue. Pa tshibidilu, bisumbu bitue ku 18 too ne ku 25 bidi bienza tshijengu, tshidibo bakumbula kudi mutangidi muena ngendu. Misangu ibidi ku tshidimu, assemblée ya tshijengu mmilongolola mu disambombo ne mu dia lumingu; idi isangisha bisumbu bia mu tshijengu anyi bimue bisumbu bia mu tshijengu.

Musangu umue ku tshidimu, assemblée minene ya matuku 3 anyi 4, idibo babikila ne: assemblée ya distrike idi milongolodibue mu ditunga dionso. Idi isangisha bantu batue ku binunu muaba umue. Bisangilu ebi bidi bikolesha Bantemu ba Yehowa mu nyuma, pamue ne bakuabo bantu badi basankidila midimu yabo. Badi bafila kabidi bumanyishi bua patoke.

Programme wa bisangilu ebi mmulongolola kudi kasumbu kaludiki ka Bantemu ba Yehowa, udi wandamuna ku majinga a bantemu bena nkristo aba pa buloba bujima. Udi ne miyuki, mayukidilangana, manaya pa malu atu enzeka, miyuki mivule idi yenjibua kudi batangidi bena ngendu ne bantemu bapiluke basungula mu bisumbu. Bamue Bantemu badi bumvuija kabidi mushindu uvuabo batantamena ntatu bua kuikala ne nsombelu wa buena-nkristo munkatshi mua bena bulongolodi ebu badi kabayi batumikila mikenji ya Nzambi, anyi balonda bipeta bivuabo bapatule mu mudimu wabo wa buambi. Bisangilu bia distrike bidi kabidi ne luseke lua pa bualu: drame, idi itangila malu a mu bikondo bitshivuabo bafunda Bible ne a mu tshikondo tshietu etshi, mmilejibue bu manaya. Drame eyi idi ileja mushindu udi bena nkristo batantamena ntatu ya mu tshikondo tshietu etshi.

Mu assemblée eyi badi bafila biakudia ne bia kunua bua kutalaja pa mioyo ku mushinga mutekete. Abi bidi biambuluisha bateleji bua kuikalabo pamue mu disanka mu mêba a diikisha bangabanga ne kutungunuka ne miyuki. Midimu yonso ya mu bisangilu ebi idi yenjibua kudi bena budisuile, Bantemu ba Yehowa. Makuta a difutshila muaba wa dienzela assemblée ne a dijikija majinga makuabo adi afuma ku mapa a budisuile. Badi babuelamu tshianana kakuyi difutu dienzejibua, nansha kusangisha kua mfranga.

Tshisumbu tshia Bantemu ba Yehowa badi pabuipi nebe netshikumanyishe dituku ne muaba wenzekela assemblée eyi mu musoko wenu. Nebakumanyishe kabidi mushindu wa kufikaku ne bua muaba wa kulala.

Bisangilu ebi bidi biambuluisha Bantemu ba Yehowa ne badi badisangisha kudibo bua kudiunda ne kupeta mmuenenu mualabale ku wa tshisumbu tshiabo ne kunanga dîku dijima dia bana babo pa buloba bujima.​—⁠1 Petelo 2:17.

• Balongi ba Bible ba kumpala bavua bapeta mabenesha kayi mu assemblée yabo?

• Umvuija mushindu udi bulongolodi ne programme wa assemblée ya tshijengu ne ya distrike.

[Miaku miumvuiji ya tshimfuanyi pa dibeji 18]

Drame wa Bible munaya ku assemblée wa distrike mu Etats-Unis

Assemblée wa bukua-matunga ku Pologne

Assemblée wa bukua-matunga ku Argentine

Assemblée wa tshijengu ku Japon

Batumibue badi bapeta mikanda idi yumvuija Bible ku Suisse

Batismu ku assemblée wa bukua-matunga ku Afrique du Sud

Dileja dia mukanda mupiamupia ku Canada

Batumibue bimba misambu, ku Espagne