Bampanda-njila Badi Bafila tshilejilu mu mudimu wa buambi

Ntemu wa Yehowa wakakukumbula diambedi uvua imue misangu muena mudimu wa ku dîba ne ku dîba, mpanda-njila anyi misionere. Bu mudi Bantemu kabayi bapeta difutu mu mudimu eu, imue misangu utu udiebeja ne: Badi benza tshinyi bua kutuadija mudimu wa Nzambi wa ku dîba ne ku dîba?

Bantemu ba Yehowa buonso baditshipe ne batambule mba-ministre, kadi bavule ba kudibo badi ne majitu mu mêku anyi majitu makuabo adi abapumbisha bua kuenza mêba a bungi mu mudimu wa Nzambi ku lumingu luonso. Kadi, pa buloba bujima, Bantemu binunu ne binunu mbapepeje nsombelu wabo; nunku badi mua kusumba bidibo bakengela pa kuenza mudimu wa bianza wa mêba makese ne kupitshisha mêba 1 000 ku tshidimu mu mudimu wa Nzambi.

Bushuwa, bampanda-njila badi ne makuta makese bua kusumba bidibo bakengela, kadi badi baleja se: ke mushindu wa kukeba diambedi Bukalenge bua Nzambi, kabidi badi babeneshibua bikole. Dipitshisha patupu dia mêba 90 ku ngondo mu diyukila Dîyi dia Nzambi ne bantu nabo ndiakalenga ditambe. Musadidi wa ku dîba ne ku dîba udi udilengeja tshishiki mu mudimu, udi kabidi ne dîba dia kupinganyina bantu bavua bateleje. Udi anu upatula bipeta bidi bikankamija. Ba-ministre aba badi ne bintu bia ku mubidi bidibo bakengela, kabidi, badi banyisha bikole bidibo nabi.​—⁠Matayi 6:33.

Mu Février wa tshidimu tshia 1943, Société Watch Tower wakasa Kalasa ka Galaad. Kalasa aka kavua ne tshipatshila tshia kuibaka bamanyishi bapiluke ba ku dîba ne ku dîba bua kuenza mudimu wa bu-misionere mu matunga menyi. Malongesha a mu ngondo itanu mmakumbane bua dilonga dia Bible mu kabujima, dia muakafundibua Bible, dia bulongolodi bua Yehowa ne dia biena-bualu biakanyine bua mudimu mu ditunga dienyi.

Société utu wangata bujitu bua kufutshila ba-misionere njila too ne ku bijengu bidibo batumibue, utabalela bua kupetabo biakudia bia mankenda ne muaba wa kulala muakanyine mu nzubu wa ba-misionere. Utu upesha misionere yonso diambuluisha dikese bua kusumba bidiye ukengela. Ba-misionere badi bapingulukana mu midimu ya mu nzubu udibo basombele: kuya kuula bintu, kulamba biakudia, kusukula mu nzubu. Programme eu mmuenza mupepele bua kubambuluisha mua kuenza mêba 140 ku ngondo mu buambi ku nzubu ne ku nzubu ne mu kulombola kua malonga a Bible ne bantu ba muoyo muakane.

Bavule ba ku ba-misionere aba bavua batumibue mutantshi wa kilometele binunu ne binunu ne ku mabo ne mêku abo. Bivua bibakengela kuibidilangana ne nsombelu, dimanya, bibidilu bia ndilu ne mivu mishilangane, ne miakulu mipiamipia. Bakenza nanku anu bua dinanga dia bantu nabo, kabidi bualu bavua ne dinanga dikole dia kubambuluisha bua kumanyabo Bukalenge bua Nzambi.

Biangatshile ku tshidimu tshia 1943 too ne tshia 1991, Kalasa ka Galaad nkalongeshe tulasa 91 ne nkatume ba-misionere bapite pa 6000 mu matunga menyi. Ku bulombodi bua Société, bavua bafile diambuluisha divule bua didiunda dia mudimu wa kulongesha Bible mu Afrike, mu Amerike central ne wa ku Sud, mu Asie ne mu Pacifique wa ku Sud. Bavua benze kabidi mudimu munene ku Mputu.

Bantemu ba Yehowa badi badifila mu mudimu wa Nzambi, anyi bawenza ku dîba ne ku dîba bu bampanda-njila anyi bu ba-misionere kabiyi bua kupeta difutu dia bintu bia ku mubidi. Badi bangata mêba abo, mfranga yabo ne makanda abo bua kuambuluisha bantu nabo bua kupeta dimanya didi difikisha ku muoyo.​—⁠Yone 17:3.

• Mmunyi mudi bamue Bantemu ba Yehowa bafike ku didifila mu mudimu wa Nzambi wa ku dîba ne ku dîba, ne badi bawenza ne kabingila kayi?

• Ndilongesha kayi didi ba-ministre bapeta bua mudimu wa bu-misionere?

• Ba-misionere badi bapeta diambuluisha kayi mu bijengu biabo?

[Miaku miumvuiji ya tshimfuanyi pa dibeji 22]

Ku dia bakaji: Kalasa ka Galaad ku Brooklyn

Ku dia balume: Misionere ulongesha Dîyi dia Nzambi ku Papouasie Nouvelle-Guinée

[Miaku miumvuiji ya tshimfuanyi pa dibeji 23]

Ba-ministre bampanda-njila ne ba-misionere badi balongesha Dîyi dia Nzambi mu matunga mavule

Brésil

République Dominicaine

Espagne

Sierra Leone, Afrike