Nshapita wa 23
Bishima bivule mu Kapernaume
DIA Nsabatu panyima pa Yezu mumane kubikila bayidi bende banayi ba kumpala—Petelo, André, Yakobo ne Yone—badi baya buonso buabu mu nsunagoga wa mu Kapernaume. Kuine eku, Yezu udi utuadija kulongesha, ne bantu badi bakema bualu udi ubalongesha bu muntu udi ne bukokeshi, kadi ki mbu baskribe nansha.
Dine dia Nsabatu adi, muntu kampanda mukuata kudi demon udiku pende. Kupita lupolo, udi wela lubila lukole ne: “Butudi nebe mbunganyi, Yezu wa mu Nazarete? Udi mulue kutubutula anyi? Ndi mukumanye bushuwa, Munsantu wa Nzambi.”
Demon údí ukokesha muntu eu udi bushuwa umue wa ku banjelu ba Satana. Yezu udi ukanyina demon, wamba ne: “Puwa, ne patuka munda muende!”
Ee, demon udi upaluisha muntu ne umuelesha mikunda mipite bukole. Kadi udi upatuka munda mua muntu eu kayi mumuenzele bibi. Bantu buonso badi bakuatshika buôwa! “Ntshinyi etshi?” ke mudibu bebeja. “Ne bukokeshi udi utumina too ne spiritu ikena mikezuke dîyi, ne imutumikila.” Lumu lua muanda eu ludi lumuangalaka kuonso.
Bumuka ku nsunagoga, Yezu ne bayidi bende badi baya kua Simone, peshi Petelo. Kuineku, mamuenende wa Petelo udi usama mubidi luya bikole. ‘Muambuluishe bu wewe mua kusua,’ ke mudibu bamutendekena. Nunku, Yezu udi usemena, umukuata ku tshianza ne umuimanyika. Diakamue udi usanguluka ne utuadija kubalambila biakudia!
Pashishe, padi dîba dibuela, bantu bafumina nseke yonso badi batuala babedi babu ku nzubu wa Petelo. Mu katupa kîpi, bena mu tshimenga buonso badi bakungila ku tshiibi! Yezu udi wondopa babedi babu buonso, nansha disama badiamba bukole kayi. Udi upikula nansha aba badi bakokesha kudi ba-demon. Mu dipatuka munda, ba-demon badiye wipata badi bela mbila ne: “Udi Muana wa Nzambi.” Kadi, Yezu udi ubakanyina ne ubakandika bua kuakula bualu mbamanye ne: yeye udi Kristo. Mâko 1:21-34; Luka 4:31-41; Matayo 8:14-17, NW.
▪ Nshinyi tshidi tshienzeka mu nsunagoga dia Nsabatu panyima pa Yezu mumane kubikila bayidi bende banayi?
▪ Mu dipatuka diende mu nsunagoga Yezu udi uya penyi, ne ntshishima kayi tshidiye wenza kuine eku?
▪ Ntshinyi tshidi tshienzeka pashishe dine dilolo adi?