Dilongesha dia 1

Mushindu uudi mua kusokolola tshidi Nzambi ulomba

Mmamanyisha kayi a mushinga adi asanganyibua mu Bible? (1)

Muena Bible nnganyi? (2)

Bua tshinyi údí ne bua kulonga Bible? (3)

1. Bible ndipa dia kudi Nzambi dia mushinga mukole. Mmuenze bu mukanda udi tatu wa dinanga mutumine bana bende. Udi utuambila bulelela pa bidi bitangila Nzambi​—tshidiye ne tshidiye wanyisha. Udi umvuija mua kupita ne ntatu ne mua kupeta diakalenga dia bushuwa. Bible nkayende ke udi utuambila tshitudi ne bua kuenza bua kusankisha Nzambi.​—Musambu 1:1-3; Yeshaya 48:17, 18.

2. Bible uvua mufunda kudi bantu bu 40 bashilangane mu lupolo lua bidimu 1 600, kubangila mu 1513 K.B.B. Mmuenza ne mikanda mikese 66. Aba bakafunda Bible bavua benzeja kudi Nzambi. Bakafunda ngenyi yende, ki nyabu nansha. Nunku Nzambi údí mu diulu ke Muena Bible, ki mmuntu nansha umue wa pa buloba.​—2 Timote 3:16, 17; 2 Petelo 1:20, 21.

3. Nzambi wakatabalela bua se: Bible atentudibue ne bujalame ne alamibue bimpe. Kopi mivule ya Bible ikadi mipatudibue kupita mukanda mukuabu kayi wonso. Muntu yonso kakuikala ne disanka bua kukumona ulonga Bible, kadi kulekedi bua bualu ebu bukuimanyike. Matuku ebe atshilualua a tshiendelele mmasuikakaja ku dipeta diebe dia dimanya dia Nzambi ne dienza disua diende nansha kuikale buluishi bua munyi.​—Matayo 5:10-12; Yone 17:3.