Dilongesha 4

Mushindu uudi mua kumanya Nzambi

Ubale Bible bua kumanya Yehowa. Kale Nzambi wakasungula bamue bantu bua kufundabu ngenyi yende. Badi babikila mêyi akafundabu aa ne: Bible. Nenku lelu bidi bikengela kubala Bible bua kumanya Nzambi. Badi babikila kabidi Bible ne: Dîyi dia Nzambi, bualu udi ne dîyi anyi mukenji wa Yehowa. Tudi tuitaba malu adi Bible wamba bualu Yehowa katu ushima to. ‘Nzambi katu mumanye mua kushima.’ (Ebelu 6:18) Dîyi dia Nzambi didi ne bulelela munda muadi.—Yone 17:17.

Bible ndipa dia mushinga mukole didi Nzambi mutupeshe. Bible udi bu mukanda udi tatu wa dinanga mufundile bana bende. Udi utumanyisha malu adi Nzambi mulaye bua kuvuija buloba muaba mulenga wa kusombela anyi mparadizu. Udi utuambila malu avua Nzambi muenze kale, adiye wenza lelu ne aluaye kuenzela bana bende ba lulamatu mu matuku adi kumpala eku. Udi utuambuluisha kabidi bua kujikija bilumbu ne kupeta disanka.—2 Timote 3:16, 17.

Bantemu ba Yehowa mbalunda ba Nzambi; nebakuambuluishe bua kumvua malu adi Bible ulongesha. Ubambile anu ne: udi musue kulonga Bible. Kabatu balomba mfranga bua kulongeshangana to. (Matayo 10:8) Udi kabidi mua kubuela mu bisangilu bia Bantemu ba Yehowa. Bitu bienzekela miaba itubu baya kudisangisha bua kulonga malu a Nzambi. Batu babikila miaba eyi ne: Nzubu ya Bukalenge. Wewe ubuela mu bisangilu bia bena Kristo ebi, dimanya diebe dia malu a Nzambi nedivule ne lukasa luonso.

Udi mua kumanyina Nzambi ku bintu bidiye muenze. Tshilejilu, Bible udi wamba ne: “Nzambi wakafuka diulu ne buloba.” (Genese 1:1) Pakafuka Yehowa “diulu,” wakenza ne dîba. Ntshinyi tshidi dîba dituleja pa bidi bitangila Nzambi? Didi dituleja ne: Yehowa udi ne bukole bua bungi. Anu yeye ke uvua mua kuenza tshintu tshia bukole bu mudi dîba. Bualu ebu budi butuleja kabidi ne: Yehowa udi ne meji, bualu bivua bilomba meji bua kuenza dîba didi difila luya ne bukenke kadi kadiyi diosha dishidisha to.

Bintu bidi Yehowa mufuke bidi bileja mudiye mutunange. Elabi meji bua mishindu mishilangane ya bimuma bidi pa buloba. Yehowa uvua mua kuikala mutupeshe anu bimuma bia mushindu umue, peshi kubenga mene kutupeshabi. Kadi mmutupeshe bimuma mishindu mipite bungi, bishilangane ku bunene, ku mubidi (ta mekala) nansha ku muenya. Bionso ebi bidi bileja ne: Yehowa udi Nzambi wa dinanga, Nzambi wa kalolo, wa lungenyi ne wa bulenga.—Musambu 104:24.