Programe muenza bua kulua ngamba-malu ne mulongeshi muimpe

NANSHA wewe muikale muana anyi mukulumpe, mulume nansha mukaji, programe eu neakuambuluishe bua kulengeja ngakuilu ne ndongeshilu webe wa Dîyi dia Nzambi.

Mulongeshi wa Kalasa ka Mudimu wa Nzambi ke wasunguila balongi midimu ya kuenzabu. Neusangane dibeji diebe dia mibelu mu mabeji asatu adi alonda aa. Bishiferi bidi kumpala kua ngikadilu ya bungamba-malu mbia malongesha adi alonda kunyima eku. Mu malongesha aa, badi bumvuijamu mushindu wa kukumbaja ngikadilu eyi bilenga ne baleja kabidi mudi ngikadilu yonso ne mushinga. Badi kabidi bakuleja mua kukumbaja malu adibu bakulomba.

Mekala adi mu dibeji dia mibelu adi aleja ngikadilu ne mudimu udi mukumbanyine ngikadilu au, bu mudi: (1) dibala kumpala kua bantu, (2) dinaya dienza kudi bantu babidi anyi ba bungi, peshi (3) muyuki muenzela tshisumbu. Mutangidi wa kalasa neakupeshe ngikadilu wa kuenza. Mbimpe kuenza mudimu ne ngikadilu anu umuepele ku musangu wonso. Enza mudimu udibu bafila ku ndekelu kua dilonga, neupete dikuatshisha. Biobi bimueneke ne: udi mulonde bimpe mibelu idi mu dilonga didibu bakupeshe, mufidi wa mibelu neakulombe bua kukumbaja mukuabu ngikadilu, amu nanku.

Nebikengele kadre anyi nsombelu kampanda biwikala wenza dinaya. Kadre idi mu dibeji dia 82, ki nyonso ituku to. Mufidi wa mibelu udi mua kukulomba kadre kampanda bua kukuambuluisha, anyi udi mua kukulekela udisunguilaku nkayebe.

Dibala mukanda eu ne dienza midimu idibu bafila nansha paudi kuyi ulongolola midimu ya mu kalasa nedikuambuluishe bikole bua kukola kuya kumpala. Bumue, udi mua kubala mene dilonga dimue ku lumingu.

Kudi anu mushindu wa kulengeja malu nansha tuetu badifundishe mu kalasa aka kukadi matuku mavule anyi bikale tukadi bambi ba lumu luimpe ba kale. Tudi tujinga bua malongesha a mu Kalasa ka Mudimu wa Nzambi akuambuluishe bikole menemene!