Kulomba muntu bua kubala Bible

TUDI basue kukoka lungenyi lua muntu yonso ku Bible (anyi Dîyi dia Nzambi). Mukanda munsantu eu ke nshindamenu wa malu atudi tuyisha. Tudi basue bantu bamone se: malu atudi tubayisha ki ng’etu to, kadi ng’a Nzambi. Bidi bikengela bantu bikala beyemena Bible.

Mu buambi. Paudi udilongolola bua kuya kuyisha, wikale usungula mvese umue anyi ya bungi bua bantu badi bitaba kuyukila nebe. Nansha paudi usua kufila patupu mikanda yetu, bitu bimpe kubalaku mvese kampanda muakanyine. Bua bantu badi bu mikoko, Bible udi ne bukole bua bungi kupita tshintu tshionso tshitudi mua kuamba. Padiku kakuyi mushindu wa kubala Bible, udi mua kutela mêyi ende tshianana. Tshilejilu, bu muvua mivungu kayiyi miaba yonso tshikondo tshivua Yezu pa buloba, yeye ne bapostolo bende bavua batela Mukanda wa Nzambi bikole. Tuetu petu tukuatayi mvese mu mutu, tuenzayi nayi mudimu bimpe mu buambi, ne imue misangu mene tuyitele ku muoyo tshianana.

Padiku mushindu wa kubala Bible, umukuate ku bianza mu mushindu udi muntu uudi uyisha mua kutangilamu pende. Kadi muntu yeye ubala mvese mu Bible wende nkayende, malu adiye ubala au adi mua kumutuisha bikole kupitshisha.

Tshidibi, wamanya ne: bamue bakudimunyi ba Bible ki mbakudimune bimpe malu onso anu bu muvuawu mafunda ku ntuadijilu to. Tshilejilu, Bible ya bungi ya lelu kayena ne dîna dia Nzambi to, kayena itokesha malu adi atangila bafue bu mudibi mu tshiena-Ebelu ne tshiena-Gelika nansha, ne idi isokoka tshidi Nzambi mulongolole bua buloba. Nunku, bua kuleja muntu mudi bakudimunyi banyange malu, udi mua kubala ne kufuanyikija mvese minene mu Bible ya bungi anyi mu nkudimuinu ya Bible ya kale. Mukanda wa Comment raisonner à partir des Écritures udi uleja mutu Bible ya bungi ikudimuna miaku minene mu mvese itudi tutamba kukuata nayi mudimu. Muntu yeye munange bulelela, neanyishe malu awamuleja aa bikole.

Mu bisangilu. Bitu bikengela kulomba bantu bonso bua kubala Bible yabu mu bisangilu. Kuenza nenku kudi kuambuluisha bia bungi. Bantu badi bashala ne ntema ku biudi wamba. Badi bumvua ne bamona kabidi malu audi ubala. Bapiabapia badi bajingulula ne: Bible ke nshindamenu wa malongesha etu.

Wewe ke udi ne bujitu bua kufikisha bantu ku dilondesha dibala dia mvese mu Bible yabu. Mushindu mutambe buimpe nkubalomba buludiludi bua kubala mvese.

Wewe ke udi ne bua kusungula mvese yudi musue kushindika, mvese idi bantu mua kubala. Mbimpe kubala mvese idi ipatula malu manene patoke. Mpindieu pikalaku dîba, udi mua kukumbaja mikuabu idi ikuatshisha bijadiki biudi ufila.

Kakuyi mpata, kutela anu dîna dia mukanda ne mvese anyi kulomba bantu tshianana bua kukeba mvese ki nkukumbane nkayaku to. Wewe ubala mvese umue pashishe uya ku mukuabu bangabanga ne bantu kupeta wa kumpala, nebatekete mu maboko, kabakukeba kabidi mvese mikuabu to. Utangile bantu. Ubale mvese anu paudi ujadika ne: bantu ba bungi bakadi bumupete pabu.

Wele meji kumpala. Utele mvese uudi musue kubala kumpala kua dîba. Nunku kuakujimija dîba dia bungi bua kushala muindile too ne padi bantu bamupeta to. Kadi nansha muudi mua kuenda kuamba malu makese bua kupitshisha dîba mu dindila bantu, neubambuluishe bikole.