Dienza mudimu bimpe ne bintu bidi bantu bamona

BUA tshinyi kulongesha ne bintu bidi bimueneka? Bualu bidi mua kulengeja dilongesha diebe. Yehowa Nzambi ne Yezu Kristo bakakuata mudimu ne bintu bidi bimueneka; tudi petu mua kubidikija. Padiku bintu ebi ne mêyi a mukana kabidi, bantu badi balonga malu mishindu ibidi. Kuenza nunku kudi mua kuambuluisha bateleji bua kushala ne ntema ne kubueja bintu abi mu matshi ne kubimona mu lungenyi. Kadi udi mua kuenza tshinyi bua kuela bintu bidi bantu bamona ebi mu diyisha diebe dia lumu luimpe? Udi mua kumanya munyi ne: udi ukuata nabi mudimu biakane?

Muakakuata balongeshi ba dilambu mudimu ne bintu bidi bantu bamona. Bua kulongesha malu manene, Yehowa wakenza mudimu ne bintu bidi bimueneka bidi bantu bavuluka ne lukasa. Tshilejilu, wakapatula Abalahama bumue butuku pambelu e kumuambilaye ne: ‘Tangila mulu, bala mitoto, biwamanya mua kuyibala. Tunkanunuina tuebe netuikale bungi nunku.’ (Gen. 15:5) Nansha muvua dilaya edi dikole bua kuditaba dimueneka kadiyi mua kukumbana, biakalenga Abalahama bikole ne kumusakabi bua kueyemena Yehowa. Musangu mukuabu Yehowa wakatuma Yelemiya mu ditanda dia mufumbi wa ngesu bua kumonaye muvuaye ufumba dima. Edi divua dilongesha kadiyi kupua muoyo dia bukenji budi nabu Mufuki kudi bantu. (Yel. 18:1-6) Mmunyi muvua Yona mua kupua muoyo dilongesha divua diakula bua luse, divua Yehowa mumulongeshe ku diambuluisha dia mutshi wa mudiantondo? (Yona 4:6-11) Yehowa wakambila baprofete bende bua kuangata bintu kampanda bikumbanyine bua kumvuija nabi milayi. (1 Bak. 11:29-32; Yel. 27:1-8; Yeh. 4:1-17) Bintu bia mu tabernakle ne mu ntempelo bidi bituleja ne bituambuluisha bua kumvua malu a mu diulu. (Eb. 9:9, 23, 24) Nzambi uvua kabidi mukuate mudimu ne bikena-kumona bua kumanyisha malu a mushinga.​—Yeh. 1:4-28; 8:2-18; Bien. 10:9-16; 16:9, 10; Buak. 1:1.

Yezu yeye wakenza mudimu ne bintu bidi bimueneka mushindu kayi? Tshilejilu, pavua Bafalese ne Bena dingumba dia Helode basue kumukuatshila ku mêyi ende a mukana, Yezu wakabalomba tshijanja tshia ndenalio ne kubaleja tshimfuanyi tshia Kaisa tshivuapu. Yeye kulua kubambila ne: mbimpe kupingajila Kaisa bidi bu biende, ne bintu bia Nzambi kubipingajila Nzambi. (Mat. 22:19-21) Yezu wakafunkuna mukaji mukamba muena dikenga uvua mufile biende bionso bivuaye nabi (tukuta tubidi tukese tua bijanja) bua kulongesha mushinga wa kutumbisha Yehowa ne bionso bitudi nabi. (Luka 21:1-4) Wakakuata mudimu munga musangu ne muana mutekete bua kufila tshilejilu tshia budipuekeshi ne dibenga kulumbila lumu. (Mat. 18:2-6) Wakaleja tshidi budipuekeshi bumvuija pakuoweshaye bayidi bende mâyi ku makasa.​—Yone 13:14.

Mishindu ya kukuata mudimu ne bintu bidi bantu bamona. Katuena bu Yehowa bua kuleja bantu bikena-kumona to. Kadi kudi bimfuanyi bilenga bitambe bidi mu mikanda yetu ya Bantemu ba Yehowa. Leja bantu badi banyisha bulelela muikala Mparadizu wa pa buloba, mparadizu mulaya mu Dîyi dia Nzambi. Paudi ulonga Bible ne muntu, udi mua kuleja tshimfuanyi tshidi tshiumvuangana ne tshiena-bualu tshienu ne kumukonka bua akuambile tshidiye umona. Bidi ne mushinga bua kumanya ne: pakalejaye muprofete wende Amosa bimue bikena-kumona, Yehowa wakamuebeja ne: “Amosa, udi umona tshinyi?” (Amo. 7:7, 8; 8:1, 2) Udi mua kuela bantu nkonko ya nunku paudi ubaleja bimfuanyi bienza bua kulongesha nabi.

Wewe mufunde makumi anyi muenze tablo udi uleja mudi malu manene menzeke malondangane, bantu badi mua kumvua lukasa mulayi bu mudi wa “bikondo muanda mutekete” (wa mu Danyele 4:16), ne wa “mbingu makumi muanda mutekete” (wa mu Danyele 9:24). Bintu bia nunku bidi mu mikanda yetu mivule.

Panudi nulonga Bible mu dîku, bua kumvua bintu bu mudi tabernakle, ntempelo wa mu Yelushalema, ne tshikena-kumona tshia ntempelo tshia Yehezekele, nudi mua kuenza mudimu ne bimfuanyi. Nenubipete mu mukanda wa Étude perspicace des Écritures, apendise anyi tshisakidila tshia Bible wa Les Saintes Écritures​—Traduction du monde nouveau​—avec notes et références ne mu imue nimero ya Tshibumba tshia Nsentedi.

Panudi nubala Bible mu dîku, kebayi tuarte tuzola. Londeshayi luendu lua Abalahama kubangila ku Ula ne ku Halana too ne ku Betele. Tangilayi njila uvua bena Isalele balonde pakumbukabu mu Ejipitu bua kuya mu Buloba Bulaya. Kebayi muaba uvua tshisamba ne tshisamba tshia Isalele tshisombele. Tangilayi bunene bua buloba buvua Solomo ukokesha. Londeshayi njila uvua Eliya muyile pavuaye unyema Yezabele kumbukila ku Yizelele kupita mu tshipela too ne ku Bê-sheba. (1 Bak. 18:46–19:4) Kebayi bimenga ne misoko muvua Yezu muyishe. Londeshayi ngendu ya Paulo mu mukanda wa Bienzedi.

Bintu bia kutangila bidi ne mushinga bua mulongi wa Bible kumanya bimpe mudi tshisumbu tshienda. Udi mua kumuleja kabeji ka programe bua kumanyaye malu atu mu mpuilu ne mpungilu yetu. Bitu bilenga ba bungi ku muoyo patubu baya kumona Nzubu wa Bukalenge anyi biro bia Bantemu ba Yehowa. Kuya nabu nunku kudi mua kubumusha meji mabi atubu bela bua mudimu wetu ne kipatshila katutu naku. Panudi nutangila Nzubu wa Bukalenge, uleje dishilangana didi pankatshi pa muaba eu ne miaba mikuabu ya kutendelela ya bantu bakuabu. Leja mudi nzubu mulongolola ne mukumbanyine bua kulonga Bible. Akula nangananga bua mudimu wa patoke bu mudi: miaba ya diabanya mikanda, tuarte tua teritware, ne tushete tua mapa (muditu tushilangane ne malongo, bisaka anyi tushete tua milambu).

Padiku bande ya video mienza ku bulombodi bua Kasumbu Kaludiki, enza bua mulongi ayitangile bua kukolesha ditabuja diende mu Bible, bua kumanyaye mudi midimu ya Bantemu yenda, ne bua kutumikilaye mêyi a mu Bible.

Kuleja bantu tshisumbu bintu bidibu bamona. Padi bintu bia kutangila bilongolola ne bileja bilenga, kakuyi mpata, bidi bilua biamu binene bia mudimu bia kulongesha nabi. Mupika wa lulamatu ne wa budimu mmulongolole bintu ebi mu mishindu ya bungi.

Mikanda idibu balonga mu Dilonga dia Mukanda dia Tshisumbu ne biena-bualu bia Tshibumba tshia Nsentedi bia kulonga bitu ne bimfuanyi bidi mulombodi mua kukuata nabi mudimu bua kushindika malu manene.

Bimue biena-bualu bia miyuki ya patoke bidi mua kumueneka biakanyine kubienza ne bintu bidi bantu bamona bua kumvuija amue malu. Kadi bitu bitambe buimpe kutuma ntema ya bantu ku Bible, bualu ba bungi badi nende ku bianza. Pikalabi imue misangu tshianana bikengela kuleja tshimfuanyi peshi kufunda kakese bua kumvuija bualu bunene bumue anyi a bungi, udianjile kujadika ne: bantu badi mu milongo ya ndekelu nebabimone (anyi nebabibale). Kadi mbimpe kuenza mudimu ne bintu bia nunku mu mpukapuka.

Kipatshila ketu patudi tuleja bintu ebi patudi tuyisha ne tulongesha ki nka kunayisha bantu nansha. Tudi ne bua kuenza mudimu ne bintu bilenga ebi bua kushindika anu ngenyi ya mushinga mukole. Bintu ebi bitu bimpe patubi bitokesha ne bipepeja bilenga diumvuija dia miaku ya mukana, anyi bileja mushinga mukole udi nawu malu atudi tuamba. Bintu ebi bikuata nabi mudimu biakane bidi mua kuenza ne: nansha kunyima kua bidimu bia bungi, bantu bikale anu babivuluke biobi ne malu avuabi bitokesha anyi bishindika.

Bua kulonga, matshi ne mêsu bidi ne mushinga wa bungi. Uvuluke muvua balongeshi banene (Yehowa ne Yezu) bakuata mudimu ne lumonu ne lumvu, uditatshishe bua kubidikija paudi ulongesha bakuabu.