Tshidi baledi mua kuenza

MULEDI yonso mulume anyi mukaji udi ne tshiende tshidiye wenza mu bualu kampanda bunene budi muntu nansha umue kayi mua kumvua bimpe menemene to. Tatu ne mamu, baledi bonso babidi aba, badi bafila muntu ne muntu katupa kampanda ka mubidi wende. Tutupa etu tudi tudisanga tulua kukola munda mua mamu mmuntu wetu wa muoyo eu. Kabiena bikemesha padi muana uledibua tumvua bantu bamba ne: “diledibua dia muana ntshishima.”

Bushuwa, kulela bana nntuadijilu patupu wa bujitu budi nabu baledi. Kumpala, batu benzela bana ba mu maboko malu onso nkong; kadi padibu bakola, bidi kabidi bikengela kubatabalela bikole mu malu makuabu kabiyi anu mu malu a ku mubidi nkayawu to. Bidi bikengela kubambuluisha bua kukoleshabu lungenyi, ne meji a munda muabu, ne bikadilu bilenga ne kabidi kukolesha bumuntu buabu bua mu nyuma.

Bua bana kufikabu ku dikola bimpe mu malu onso, badi nangananga dijinga ne dinanga dia baledi. Nansha mudibi ne mushinga bua kuambila bana ne: tudi babanange, bienzedi bietu bidi ne bua kujadika mêyi etu a mukana au. Bulelela, tshilejilu tshimpe tshia baledi ke tshidi bana natshi dijinga. Bidi bikengela kubaludika mu nsombelu, kubaleja mêyi a kutumikila. Badi dijinga ne malu onso aa kubangila anu ku buana buabu menemene. Malu adi anyingalaja bikole adi mua kuenzeka ne atu mene enzeka padi bana kabayi bapete diambuluisha dîba diakane ne bishala nanku too ne padi tshikondo tshia kubambuluisha tshipita.

Mêyi matambe buimpe a kulonda atudi katuyi mua kupeta muaba mukuabu ng’aa adi mu Bible. Dilongesha didi diangatshila mu Bible didi diambuluisha bikole kupita makuabu onso. Dilongesha edi didi difikisha bana ku dijingulula ne: malu adibu babalongesha ki ng’adi muntu mukuabu muambe to, kadi ng’adi Mufuki wabu anyi Tatu wabu wa mu diulu muambe. Ebi bidi bipesha mibelu bukole butudi katuyi mua kufuanyikija ne bukuabu to.

Bible udi ukankamija baledi bua kuenzabu muabu muonso bua kufikisha bana ku diumvua mushinga wa mêyi adi makane, kubambuluisha bua kuavulukabu ne kuatumikila. Kadi padi bana bakola, baledi batu misangu mivule bamona bikole bua kuakula nabu malu adi ne mushinga wa bungi. Mukanda eu wa ne: Longa malu kudi Mulongeshi Munene, mmufunda bua malu a nanku kaenzeki to. Mukanda eu udi upetesha baledi ne bana babu malu a mu nyuma a kuikalabu babala popamue. Kadi kenzela kawu kakuabu nka kujudija diyuki pankatshi pa bana ne aba badi babala nabu mukanda eu.

Nenumone ne: mukanda eu udi ulomba bana bua kuandamunabu nkonko idimu. Mbamane kufila nkonko ya bungi mu mukanda eu. Panudi nufika muaba udi nkonko ayi, nenumone kashonyi aka: (—). Kashonyi aka kadi kakuambila bua kuanji kuimanaku kakese bua muana afile diende diandamuna anyi bua aleje muende mudiye umona malu au. Bana batu basue kuakula. Padibu kabayi bapesha muana mpunga wa kuakula bua kufila luende lungenyi, udi ujimija lukasa muoyo wa kulonda malu adibu bamuambila.

Bualu bukuabu bua mushinga menemene mbuobu ebu: nkonko eyi neyikuambuluishe bua kumanya meji adi munda mua muana. Bushuwa, muana udi pamuapa mua kufila mandamuna adi kaayi majalame to. Kadi malu adibu bafunde adi alonda panyima pa lukonko luonso adiku bua kuambuluisha muana apete ngeledi wa meji muimpe.

Mukanda eu udi ne bimfuanyi bipite pa 230. Bia bungi bia kudibi bidi ne mêyi ku nseke yabi adi abiumvuija ne alomba bua muana andamune bilondeshile tshidiye umona ne bidiye mubale. Nunku, nutangile bimfuanyi abi bimpe ne muana. Bidi mua kuikala dilongesha dimpe diambuluisha muana bua kukuataye malu adibu bamulongesha.

Padi muana ulonga mua kubala, umukankamije bua kuikalaye ukubadila mukanda eu ne dîyi dikole ne udibadila yeye muine. Padiye ubala anu kubala, mibelu mimpe idimu neyishale mu mutu muende ne mu mutshima wende. Kadi bua kukolesha dinanga ne kanemu pankatshi pebe ne muanebe, nudi ne bua kubala mukanda eu popamue ne kuubala nanku misangu ne misangu.

Bana badi bamona bantu benda masandi, bamona bakuabu bikale ne malanda ne nyuma mibi ne bikuabu bienzedi bibi, bionso ebi mu mushindu uvua bantu kabayi nansha mua kubielela meji bidimu bikese kumpala ne: bivua mua kuikala nanku to. Ke bualu kayi bidi bikengela kubakuba. Ke tshidi mukanda eu wambuluisha bua kuenza ne kanemu konso, kadi udi wamba malu bia buludiludi kauyi usokoka to. Kadi bidi menemene bikengela kutangija meji a bana kudi Muena meji onso, Yehowa Nzambi, Tatu wetu wa mu diulu. Ke tshivua Yezu Mulongeshi Munene wenza misangu yonso. Tudi batekemene ne muoyo mujima bua se: mukanda eu neunuambuluishe pamue ne dîku dienu bua kuakaja nsombelu wenu bua asankishe Yehowa, bua nuenu kupeta mabenesha a tshiendelele.