BIENA-BUALU BIDIBU BASAKIDILE

Tshia kuenza ne muntu udibu bipate mu tshisumbu

Kakuena bualu butu bunyingalaja bu padibu bipata mulela wetu anyi mulunda wetu mu tshisumbu bualu ki mmunyingalale bua bubi buende to. Patudi tulonda tshidi Bible utuambila bua muntu udibu bipate, tudi tuleja mutudi banange Nzambi bikole ne mutudi balamate ku malu adiye mulongolole.a Tukonkononayi imue nkonko itu ijuka bua bualu ebu.

Ntshinyi tshitudi ne bua kuenza ne muntu udibu bipate mu tshisumbu? Bible udi wamba ne: ‘Kanubuelakanyi ne muntu udi ne dîna dia muanetu wa mu Kristo bikalaye muena masandi, anyi muena lukuka lua bintu, anyi muena mpingu, anyi mupendianganyi, anyi mukuatshiki wa maluvu, anyi munyengi wa bintu; kanudi mene ne muntu wa nunku.’ (1 Kolinto 5:11) Bible udi utuambila kabidi bua muntu yonso ‘udi kayi ushala mu diyisha dia Kristo’ ne: ‘Kanumuitabuji mu nzubu, kanumuedi muoyo; bualu bua udi umuela muoyo udi muabanyanganyi nende wa midimu yende mibi.’ (2 Yone 9-11) Katuena ne bua kuyukila malu a Nzambi ne muntu udibu bipate anyi kusombeshangana nende to. Tshibumba tshia Nsentedi tshia mu dia 15 Tshisua-munene 1981, dibeji dia 23 (mu Mfualansa) tshidi tshiamba ne: “Kuela muntu muoyo patupu ke bualu bua kumpala budi mua kufikisha bantu ku diyukila anyi ku didia bulunda. Tudiku mua kuitaba bua kuenza bualu bua kumpala ebu ne muntu udibu bipate mu tshisumbu anyi?”

Kukosa malanda onso ne muntu udibu bipate kudi ne mushinga anyi? Eyowa, tudi ne bua kuenza nanku bua malu a bungi. Bua kumpala, patudi tuenza nanku tudi tuleja mutudi balamate Nzambi ne Dîyi diende. Katuena tutumikila Yehowa anu padibi bitekete bua kumutumikila to, kadi tudi tumutumikila nansha padibi bitukolela. Dinanga ditudi banange Nzambi didi ditusaka bua kutumikila mikenji yende yonso bashindike ne: yeye udi muakane, udi ne dinanga, ne mikenji yende itu itupetesha anu diakalenga. (Yeshaya 48:17; 1 Yone 5:3) Buibidi, kukosa malanda ne muntu udibu bipate kudi kutulama tuetu ne bena mu tshisumbu bonso bua muntu au katunyangidi malanda etu ne Nzambi, kanyangi bikadilu bietu bimpe ne kapendeshi tshisumbu to. (1 Kolinto 5:6, 7) Buisatu, kutumikila tshidi Bible wamba bua muntu udibu bipate kudi mua kumuambuluisha. Patudi tuitaba dipangadika didi bakulu bavua balumbuluishe muntu au bangate, bidi mua kulenga muoyo wende nansha muvuaye kayi muitabe bionso bivua bakulu benze bua kumuambuluisha. Padi muntu au umona ne: bantu badiye munange bikole mbakose nende malanda, bidi mua kumuambuluisha bua ‘kukatamuka,’ kumona bunene bua bubi buende ne kuenza malu adi akengela bua kupingana kudi Yehowa.​—Luka 15:17.

Tshia kuenza ntshinyi padibu bipate mulela wetu? Dîba adi, bua malanda makole atu pankatshi pa bena mu dîku, bidi mua kutukolela bua kutumikila mikenji ya Yehowa. Ntshinyi tshitudi mua kuenza ne mulela wetu udibu bipate? Katuena mua kuakula bua malu onso adi atangila tshilumbu etshi mu mukanda eu to, kadi tuakulayi anu bua malu manene abidi.

Imue misangu, muena mu dîku udibu bipate utshidi musombele kua baledi bende. Bu mudi malanda abu a bulela kaayi afua bualu mbamuipate, udi mua kutungunuka ne kuenza malu onso adi bena mu dîku benza. Kadi bua bubi budiye muenze, muntu eu mmukose malanda ende ne bena mu dîku diabu mu malu a Nzambi. Nunku bena mu dîku diabu badi balamate Nzambi kabena kabidi mua kuenza nende malu atubu benza bua kutendelela Nzambi to. Tshilejilu, padi muntu udibu bipate ubuela mu dilonga dia mu dîku, kena ne bua kuandamuna anyi kuelamu dîyi to. Pikalaye utshidi muana, baledi badi ne bujitu bua kumulongesha ne kumunyoka. Nunku baledi badi banange muanabu badi mua kulonga nende Bible.b​—Nsumuinu 6:20-22; 29:17.

Mikuabu misangu, mulela wetu udibu bipate mu tshisumbu kena netu kumbelu kumue to. Nansha mutudi mua kutuilangana nende imue misangu bua kuyukila malu a mu dîku, tudi ne bua kukepesha bungi bua misangu itudi tupetangana nende. Bena mu dîku badi bashale ne lulamatu kabena ne bua kukeba tumalu tua kudingila bua kuyukila ne mulela wabu udibu bipate mu tshisumbu udi kayi musombele kuabu to. Dinanga didibu banange Yehowa ne bulongolodi buende didi ne bua kubasaka bua kulonda tshidi Bible wamba bua muntu udibu bipate. Padibu batumikila tshidi Bible wamba, badi bambuluisha muntu udi muenze bubi bua kuitabaye dinyoka didibu bamupeshe.c​—Ebelu 12:11.

[Mêyi adi kuinshi]