BIENA-BUALU BIDIBU BASAKIDILE
Mua kulekela tshilele tshia kudijikijila dijinga dia kusangila ne mulume anyi ne mukaji
Tshilele tshia kudijikijila dijinga dia kusangila ne mulume anyi ne mukaji tshidi tshinyanga malanda a muntu ne Nzambi. Tshidi mua kumufikisha ku didinanga ne kunyanga meji ende.a Muntu utu udijikijila dijinga dia kusangila ne mulume anyi ne mukaji udi mua kufika ku dimona bantu bakuabu anu bu bintu bidi bimuambuluisha bua kujikija dijinga diende. Nunku, kakumona kabidi disangila ne bayende anyi ne mukajende bu mushindu wa kumuleja dinanga to, kadi nedilue anu mushindu wa kudisankisha patupu bua tshitupa tshîpi ne kutuyisha dijinga diende. Kadi kutuyisha dijinga edi mushindu eu ki nkumana bualu to. Mu kuamba kuimpe, padi muntu wenza nunku, kena ushipa bitupa biende bia mubidi bua “masandi, malu a bukoya, nkuka [mibi] ya mubidi” to, kadi udi ubijula.—Kolosai 3:5.
Mupostolo Paulo wakafunda ne: ‘Bana betu, tudilengeje ku manyanu onso a mubidi ne a nyuma, tukumbaje tshijila tshietu mu ditshina dia Nzambi.’ (2 Kolinto 7:1) Biobi bikukolele bua kulonda tshidi mvese eu wamba, kuteketshi mu mikolo to. Yehowa ‘mmusue kubuikidila bantu mibi yabu’ ne kubambuluisha. (Musambu 86:5; Luka 11:9-13) Nunku, padi muoyo webe ukupisha dîba diudi wenza bualu ebu ne muudi udifila bua kubulekela nansha wewe ukuluka imue misangu, bidi bileja ne: kuena musue tshilele etshi to. Umanye kabidi ne: ‘Nzambi udi upita mitshima yetu bunene, ne mmumanye malu onso.’ (1 Yone 3:20) Nzambi kena umona anu mibi yetu to, udi umona tshitudi menemene. Dimanya edi didi dimuambuluisha bua kututeleja ne luse patudi tumulomba dilekela. Nunku, kulekedi kukuatshila Nzambi malu mu disambila ne muoyo mujima anu bu mutu muana uya kudi tatuende padiye ne lutatu. Yehowa neakupeshe kondo ka muoyo kimpe. (Musambu 51:1-12, 17; Yeshaya 1:18) Tshidibi, udi ne bua kuenza malu adi apetangana ne biudi umulomba mu disambila. Tshilejilu, udi ne bua kulekela kutangila filme anyi kubala mikanda ya malu a bantu butaka, ne kubenga kusomba ne balunda babi.
Biwikala kuyi ukokesha bua kulekela tshilele tshia kudijikijila dijinga dia kusangila ne mulume anyi ne mukaji, udi mua kukuatshila baledi bebe bena Kristo anyi mulunda webe ukadi muena Kristo mushindame udi mua kukuambuluisha mu bualu ebu.b—Nsumuinu 1:8, 9; 1 Tesalonike 5:14; Tito 2:3-5.
[Mêyi adi kuinshi]
a Didijikijila dijinga dia kusangila ne mulume anyi ne mukaji ntshilele tshia mulume unaya ne butaka buende anyi udivingaku ne bianza too ne mudi mâyi a balume apatuka, anyi mukaji udibueja bintu too ne padi dijinga diende dia kusangila ne mulume dijika.
b Bua kumanya tshia kuenza bua kulekela tshilele tshia kudijikijila dijinga dia kusangila ne mulume anyi ne mukaji, bala tshiena-bualu tshia “Les jeunes s’interrogent . . . Comment vaincre cette habitude ?” tshidi mu Réveillez-vous ! wa Kasuabanga 2006, ne mu mukanda wa Les jeunes s’interrogent— Réponses pratiques, Tshitupa tshia 1, dibeji dia 205-211.