Tutu tuvuala bimpe patutu tuya mu bisangilu bietu bua tshinyi?

Udiku mumone mu foto idi mu mukanda eu mudi Bantemu ba Yehowa bavuale bimpe padibu mu bisangilu anyi? Tutu tudienzeja bua kuvuala ne kudilengeja bimpe nunku bua tshinyi?

Bua kuleja mutudi tunemeka Nzambi. Mbulelela se: Nzambi katu utangila nangananga tshimuenekelu tshia muntu to. (1 Samuele 16:7) Kadi, patudi tudisangisha bua kumutendelela, tudi tujinga kuleja ne muoyo mujima ne: tudi basue kumunemeka yeye ne bena Kristo netu. Tshilejilu, patudi tuya kumonangana ne mfumu wa ditunga, tudi tuenza muetu muonso bua kuvuala ne kudilongolola bimpe bua kuleja mutudi tuangata muanzu wende ne mushinga. Bia muomumue, mushindu utudi tuvuala patudi tuya mu bisangilu udi uleja mutudi tunemeka “Mukalenge wa tshiendelele” Yehowa Nzambi, ne muaba utudi tuya bua kumutendelela.​—1 Timote 1:17.

Bua kuleja mutudi ne bikadilu bia tshitembu. Bible udi ulomba bena Kristo bua kuvuala “ne bupuekele ne meji majalame.” (1 Timote 2:9, 10) Kuvuala ne “bupuekele” kudi kumvuija kubenga kuvuala bilamba bidi mua kukoka ntema ya bakuabu kutudi bu mudi: kuvuala bua kudileja, kulenduisha bantu anyi kushiya bitupa bia mubidi patoke. Kuikala ne “meji majalame” mu mvuadilu kudi kutuambuluisha bua kusungula bilamba bimpe bidi kabiyi bijula bakuabu majinga mabi anyi kubenga kuvuala buvualavi. Bu mudiku mishindu mishilashilangane ya mvuadilu, mibelu eyi idi ishila muntu mpunga wa kudisunguila mushindu muimpe wa kuvuala. Mvuadilu wetu muimpe ne tshimuekelu tshietu tshimpe bidi mua ‘kulengeja dilongesha dia Mupandishi wetu’ ne ‘kutumbisha Nzambi.’ (Tito 2:10; 1 Petelo 2:12) Patudi tuvuala bimpe bua kuya mu bisangilu, tudi tusaka bantu bakuabu bua kunemekabu ntendelelu wa Yehowa.

Nansha wewe kuyi ne bilamba bikumbanyine, netukuakidile amu ne disanka dionso pawalua ku Nzubu wa Bukalenge. Kuvuala bimpe kakuena kumvuija anu kuvuala bilamba bia mushinga mukole anyi bia pa buabi to, kadi nkuvuala bilamba bia mankenda, bilongolola bimpe.

• Mushindu utudi tuvuala bua kuya kutendelela Nzambi udi ne mushinga kayi?

• Bua kusungula mushindu utudi basue kuvuala ne kudilengeja, tudi mua kulonda mibelu kayi?