Milayi ya Bukalenge​—Divuija bintu bionso bipiabipia

FUANYIKIJA ne: udi upola tshimuma tshipie bimpe, utshiumvua tshinunka muenya muimpe paudi ujinga kutshiela mu bikuabu bikadi mushiki mujima mu mutenga. Uvua mutuadije mudimu au kukadi mêba a bungi, kadi udi udiumvua anu ne makanda a kutungunuka kabidi nawu. Mamuebe udi yeye ku mutshi mukuabu pabuipi apu upola pende bimuma ne disanka, uyukila ne ba mu dîku dienu bakuabu ne balunda badi balue kunupolesha bimuma abi. Mubidi wende utshidi anu wa nsongakaji, anu muvuaye umueneka ku kale kuonso aku pautshivua wewe muana. Mbualu bukole bua kuitaba ne: wewe ukavua mumumonaku mukulakaje mu bulongolodi bukadi bumane kujimina, mumone muvua mubidi wenda umunyanguka ne masama, mumukuate ku tshianza pakavuaye ukula muoyo, ne mudile ku lukita luende pavuabu bamujika. Kadi mpindieu nyeye au ukadi ne muoyo ne makanda onso tshiakabidi, pamue ne bantu bakuabu bapite bungi!

Tshikondo tshia mushindu eu tshidi tshilua; tudi ne dishindika edi, bualu malu atu Nzambi ulaya atu anu akumbana. Mu tshitupa etshi, netumone muikala imue milayi ya Bukalenge mua kukumbana mu matuku makese emu bua kutufikisha too ne ku mvita ya Armagedone. Netutangilule kabidi milayi kampanda mimpe ya Bukalenge yakumbana pashishe. Bushuwa, patuamona dîba diatuadija Bukalenge bua Nzambi kukokesha buloba ebu bujima, buvuija bintu bionso bipiabipia, netusanke bikole be!