Yezu udi uleja tshisumi bua ntendelelu mulelela

Panyima pa difesto dia dibaka dia mu Kana, Yezu wakaya mutangile ku Kapênuma. Mu luendu alu muvua kabidi mamuende ne bana babu ne Yezu ba mamuende aba: Yakobo, Jozefe, Simona, ne Yudasa.

Kadi Yezu wakaya ku Kapênuma bua tshinyi? Tshimenga atshi tshivua muaba muimpe kupita Nazaleta anyi Kana, ne tshivua tshimueneka tshialabale kubipita. Kabidi ku bayidi bapiabapia bavua Yezu mupete, ba bungi mbasombele mu Kapênuma anyi pabuipi apu. Nunku Yezu uvua mua kubalongesha amue malu miaba ivuabu basombele eyi.

Yezu wakenza kabidi malu a dikema matuku avuaye muenze mu Kapênuma amu. Nunku bantu ba bungi ba mu tshimenga atshi ne ba pampenga bakumvua lumu lua malu adiye wenzamu. Kadi Yezu ne bena diende bena Yuda bavua ne tshisumi, bakavua pa kumata mu njila batangile ku Yelushalema bua kuenza Pasaka wa mu tshidimu tshia 30.

Patshivua bayidi ba Yezu ku ntempelo mu Yelushalema apu, bakamona bualu kampanda bua dikema buvua butangila Yezu, bushilangane ne akavuabu bamone kumpala.

Mikenji ya Nzambi ivua ilomba bena Isalele bua kufila milambu ya nyama ku ntempelo, ne bantu bavua balua bavua dijinga ne biakudia bua matuku avuabu benza kuntu aku. Nanku Mikenji ivua yanyishila bantu bavua bumbukila miaba mile baya ku Yelushalema bua kuya ne makuta a kusumba nawu “ngombe, mikoko, mbuji,” ne bintu bikuabu bia mushinga mu matuku avuabu benza mu tshimenga atshi. (Dutelonome 14:24-26) Ke bualu kayi bangenda mushinga ba mu Yelushalema bavua bapanyina nyama anyi nyunyi anu munda mua lubanza lunene lua ntempelo amu. Bamue ba kudibu bavua batua mishinga mikole bua kudia bantu makuta.

Yezu wakafiika munda bikole kuitshikijaye makuta a binjanja a bashintudi ba makuta, kutonkola mêsa abu ne kuipataye bantu abu. Pashishe wakabambila ne: “Umbushayi bintu ebi muaba eu! Lekelayi kuvuija nzubu wa Tatu wanyi nzubu wa kuendela mushinga!”​—Yone 2:16.

Padi bayidi ba Yezu bamona bualu abu, badi bavuluka mêyi a buprofete adi atangila Muana wa Nzambi aa: “Tshisumi bua nzubu webe netshindie.” Kadi bena Yuda badi bamukonka ne: “Ntshimanyinu kayi tshiudi mua kutuleja bua muudi wenza malu aa?” Yezu kubandamuna ne: “Upulayi ntempelo eu, nemmujule mu matuku asatu.”​—Yone 2:17-19; Misambu 69:9.

Bena Yuda bakela meji ne: Yezu uvua wakula bua ntempelo wa mu Yelushalema uvua muaba au, ke bualu kayi badi bakonka ne: “Bavua bibake ntempelo eu munkatshi mua bidimu 46, wewe neumujule mu matuku asatu anyi?” (Yone 2:20) Kadi pavua Yezu yeye wakula bua ntempelo, uvua wakula bua mubidi wende. Panyima pa bidimu bisatu, bayidi bende bakavuluka mêyi aa pakabishibuaye ku lufu.