Malanda a Yezu ne Tatuende

Pavua bamue bena Yuda babanda Yezu ne: mmushipe mukenji wa Nsabatu bua muvuaye muondope muntu, Yezu wakabandamuna ne: “Tatu wanyi mmutungunuke ne kuenza mudimu too ne mpindieu.”​—Yone 5:17.

Bulelela, tshivua Yezu wenza ki ntshikandikibue mu mukenji wa Nzambi wa Nsabatu to. Pavuaye wenza mudimu wende wa kuyisha bantu ne kubondopa, uvua widikija midimu mimpe ya Nzambi. Nunku Yezu uvua utungunuka ne kuenza malu mimpe dituku dionso. Kadi diandamuna divua Yezu mupeshe bantu bavua bamubanda divua dibafiikishe munda bikole kupita ne kumpala, ne bakakeba bua kumushipa. Bua tshinyi bakenza nanku?

Pa kumbusha mmuenenu mubi uvuabu nende wa ne: Yezu uvua ushipa mukenji wa Nsabatu pavuaye wondopa bantu, bakafiika kabidi munda bikole pavuaye muambe ne: mMuana wa Nzambi. Bavua bamona bualu ebu bu dipenda Nzambi bua muvuaye wangata Nzambi bu Tatuende, bienze anu bu ne: pavua Yezu wamba ne: Yehowa uvua Tatuende, uvua udibandisha, udivuija mumue ne Nzambi. Kadi Yezu kavua utshina to, wakabandamuna kabidi bua kubaleja muvuaye mu malanda a pa buawu ne Nzambi. Wakamba ne: “Tatu mmunange Muana ne udi umuleja malu onso adiye yeye muine wenza.”​—Yone 5:20.

Tatu ke Mufidi wa muoyo, mmuleje bualu ebu kale pavuaye mupeshe bantu bukole bua kubisha bantu ku lufu. Yezu wakatungunuka wamba ne: “Bualu anu bu mudi Tatu ujula bafue, ubapesha muoyo, nunku Muana pende udi upesha yonso udiye musue muoyo.” (Yone 5:21) Aa mmêyi a mushinga mukole adi afila ditekemena bua matuku atshilualua! Nansha lelu, Muana udi ujula bafue mu ngumvuilu wa mu nyuma. Nunku, Yezu wakamba ne: “Muntu yonso udi uteleja dîyi dianyi ne witabuja Yeye udi muntume, udi ne muoyo wa tshiendelele, kena upita ku dilumbuluisha to, kadi mmumbuke ku lufu muye ku muoyo.”​—Yone 5:24.

Too ne tshikondo atshi kakuvua muaba nansha umue uvuabu bafunde ne: Yezu ukavua mubishe muntu uvua mufue to, kadi wakambila bantu bavua bamubanda ne: dibishibua dilelela dia bantu ku lufu nedienzeke. Wakaleja ne: “Dîba didi dilua diumvua bantu bonso badi mu nkita ya tshivulukilu dîyi diende ne nebapatuke.”​—Yone 5:28, 29.

Bu muvua mudimu wa Yezu muikale wa pa buawu, wakaleja patoke ne: uvua ku bukokeshi bua Nzambi, pavuaye muambe ne: “Tshiena mua kudienzela bualu nansha bumue mu meme nkayanyi to. . . . Tshiena nkeba disua dianyi, kadi ndi nkeba disua dia yeye uvua muntume.” (Yone 5:30) Kadi Yezu wakumvuija mudimu munene uvuaye nawu mu malu avua Nzambi mulongolole, uvuaye kayi muanji kuenza patoke too ne mpindieu. Kadi bantu bavua babanda Yezu bakavua ne bia bungi bia ku malu aa kupita bumanyishi buvuaye ufila. Yezu wakabavuluija ne: “Nudi batume bantu kudi Yone [Mubatiji], yeye mmunujadikile bulelela.”​—Yone 5:33.

Bantu bavua babanda Yezu bavua mua kuikala bumvue ne: bidimu bitue ku bibidi kumpala, Yone uvua muambile bamfumu ba bitendelelu bena Yuda bua Muntu uvua ne bua kulua panyima pende, uvuabu ne bua kubikila ne: “Muprofete” ne “Kristo.” (Yone 1:20-25) Pavua Yezu uvuluija bantu bavua bamubanda bua muvuabu bangata Yone ukavuabu bele mu buloko eu ne mushinga wa bungi, wakamba ne: “Nuenu nuvua bitabe bua kusanka bikole bua tshitupa tshîpi mu butoke buende.” (Yone 5:35) Kadi wakafila bumanyishi bunene kupita Yone Mubatiji.

“Midimu indi ngenza eyi [too ne wa kuondopangana udiye ufuma ku dienza], idi ijadika ne: Tatu uvua muntume.” Pa kumbusha bualu ebu, Yezu wakatungunuka wamba ne: “Tatu uvua muntume uvua mujadike yeye muine bualu buanyi.” (Yone 5:36, 37) Tshilejilu, Nzambi uvua mufile bumanyishi bua bualu bua Yezu pakamubatizabu.​—Matayi 3:17.

Bushuwa, bantu bavua babanda Yezu aba kabena ne kabingila ka kumubenga to. Mifundu ivuabu bamba ne: bavua babala ivua ijadika bualu buende. Yezu wakajikija wamba ne: “Bu nuenu bitabuje Mose, nuvua mua kungitabuja panyi, bualu yeye wakafunda bua bualu buanyi. Kadi nuenu kanuyi nuitabuja mifundu yende, mmunyi munuitabuja bindi ngamba?”​—Yone 5:46, 47.