Mukanda wa kudi Kasumbu kaludiki

Bamanyishi netu ba lumu luimpe basuibue:

Tudi ne diakalenga dinene dia kutendelela Yehowa Nzambi umuepele mulelela mu buobumue. Tudi ‘benzejanganyi nende ba mudimu’ badiye mupeshe mudimu wa tshijila udi usungila mioyo ya bantu wa kuyisha ne kulongesha lumu luimpe lua Bukalenge buende bujadika. (1 Kol. 3:9; Mat. 28:19, 20) Bua kukumbaja mudimu udi wenzeka pa buloba bujima eu mu ditalala ne mu buobumue, tudi ne bua kuikala balongolola bimpe.​—1 Kol. 14:40.

Mukanda eu newukuambuluishe bua kumanya mudi malu enzeka mu tshisumbu tshia bena Kristo lelu. Udi wakula bua majitu ne midimu biudi nabi bu muudi Ntemu wa Yehowa. Wewe wangata majitu audi nawu ne mushinga ne ukumbaja midimu idibu bakupesha, ‘neukoleshibue mu ditabuja.’​—Bien. 16:4, 5; Gal. 6:5.

Ke bualu kayi, tudi tukukankamija bua kulonga mukanda eu bimpe menemene. Keba mishindu iudi mua kutumikila malu audi ulonga au mu nsombelu webe. Tshilejilu, biwikala mumanyishi udi kayi muanji kubatijibua, mmalu kayi audi ne bua kuenza bua kubatijibua bua kulua Ntemu wa Yehowa? Ku lukuabu luseke, biwikala ukadi mubatijibue, ntshinyi tshiudi mua kuenza bua kuya kumpala mu nyuma ne kuvudija mudimu uudi wenzela Yehowa? (1 Tim. 4:15) Ntshinyi tshiudi pebe mua kuenza bua tshisumbu kuikalatshi mu ditalala? (2 Kol. 13:11) Keba mandamuna a nkonko eyi mu mukanda eu.

Biwikala muntu mulume mubatijibue, ntshinyi tshiudi mua kuenza bua kukumbaja malu malomba bua kulua musadidi wa mudimu ne pashishe kulua mukulu? Bu mudi bantu bapiabapia binunu bia bungi batungunuka ne kubuela mu bulongolodi bua Nzambi, kudi dijinga dinene dia bana betu ba balume badi bakumbane bua kulombola bisumbu. Mukanda eu newukuambuluishe bua kumanya malu adi akengedibua bua ‘kuipatshila’ bipatshila bia mu nyuma ebi.​—1 Tim. 3:1.

Tudi tusambila ne muoyo mujima bua mukanda eu ukuambuluishe bua kumona muaba uudi nawu mu bulongolodi bua Yehowa ne kuwanyisha bikole. Tudi banunange nuenu bonso bikole ne tudi tutungunuka ne kusambila bua nuikale munkatshi mua bantu bikala ne disanka dia kutendelela Tatu wetu wa mu diulu Yehowa bua kashidi ne tshiendelele.​—Mis. 37:10, 11; Yesh. 65:21-25.