LUKONKO LUA 7

Ndi mua kuenza tshinyi bobu bangenzeja bua kuenda masandi?

BUA TSHINYI BIDI NE MUSHINGA?

Mapangadika audi wangata mu bualu bua disangila adi ne buenzeji mu nsombelu webe matuku atshilualua.

NTSHINYI TSHIUDI MUA KUENZA?

Fuanyikija bualu ebu: Heather mbatuadije kupetangana ne Mike kukadi ngondo ibidi, kadi udi udiumvua anu bu ne: mbamanyangane katshia konso eku. Badi bafundilangana mesaje, bayukila ku telefone mêba a bungi, ne badi mene bakuatshishangana ku mêyi. Mpindieu Mike mmusue kuya kule.

Mu ngondo ibidi mishale eyi, Mike ne Heather bakadi bakuatangana ku bianza ne batuangana mishiku. Heather ki mmusue bua baye kule to. Kadi ki mmusue kukosa malanda ne Mike to. Udi udimona muimpe ne muntu wa pa buende padiye ku luseke luende. Udi udiambila ne: ‘Nansha nanku, meme ne Mike si tudi banangangane . . .’

Biwikala mukumbane bua kutantshilangana ne muikale mu nsombelu wa buena wa Heather, ntshinyi tshiuvua mua kuenza?

ANJI ELA MEJI!

Tshilamba tshia kuvuala bakupula natshi mu nzubu — Kusangila kua mulume ne mukaji ndipa didi Nzambi mulongoluele anu badi mu dibaka. Kuenda masandi kumpala kua kubuela mu dibaka nkunyanga dipa edi. Kudi bu kuangata tshilamba tshimpe tshidibu bakupeshe kutshivuija mukusu

Wewe mushipe mukenji bu mudi wa bukole budi nabu buloba bua kukoka bintu, neukenge bua bipeta biamueneka. Ke mudibi kabidi wewe mubenge kutumikila mukenji wa bikadilu bu mudi eu udi wamba ne: ‘Nudi ne bua kuepuka masandi.’—1 Tesalonike 4:3.

Mbipeta kayi biudi mua kupeta wewe mubenge kutumikila mukenji eu? Bible udi wamba ne: “Muntu udi wenda masandi udi wenzela mubidi wende nkayende bubi.” (1 Kolinto 6:18) Mmunyi mudibi mua kuenzeka?

Bakebuludi mbamone ne: bansonga ba bungi bavua bende masandi kumpala kua kubuela mu dibaka batu batuilangana ne malu aa:

DIDIPISHA. Bansonga ba bungi bavua bende masandi kumpala kua kubuela mu dibaka badi bamba ne: bavua balue kudijinga bua tshivuabu benze.
DIPANGA DIEYEMENANGANA. Padi nsongalume ne nsongakaji benda masandi, yonso wa kudibu utu ushala udiebeja ne: ‘Nganyi mukuabu ukadiye muende nende masandi?’
DIDISHIMA. Bansongakaji ba bungi batu basue mulume wikala mua kubakuba, kadi ki ngeu udi ubangata bu tshintu tshia kudisankisha natshi to. Bansongalume ba bungi kabatu bakokibua kudi nsongakaji udi mubitabe bua bende nende masandi to.
Mu tshikoso: Wewe muitabe bua kuenda masandi kumpala kua kubuela mu dibaka, udi udinyanga pa kujimija tshintu tshia mushinga tshiudi natshi. (Lomo 1:24) Kuena ne bua kupana mubidi webe to, udi ne mushinga wa bungi!

Leja ne: udi ne bukole bua “kuepuka masandi.” (1 Tesalonike 4:3) Dituku diwabuela mu dibaka ke diwikala mua kusangila ne bayebe anyi mukajebe. Tshikondo atshi, kuakuikala ne dibungama, didipisha anyi udimona mu njiwu bu mutu bansonga ba bungi batu bende masandi kumpala kua kubuela mu dibaka badiumvua to.—Nsumuinu 7:22, 23; 1 Kolinto 7:3.

UDI WELA MEJI KAYI?

Muntu udi mukunange ne muoyo mujima udiku mua kunyanga mubidi webe ne mushindu uudi udiumvua anyi?
Muntu udi ukutabalela ne muoyo mujima udiku mua kukusaka bua kunyanga malanda ebe ne Nzambi anyi?—Ebelu 13:4.