Yezu udi usungula Shaula

Shaula uvua muena Lomo uvua muledibue mu Tâso. Uvua Mufalese uvua mupiluke mu mikenji ya buena Yuda, ne uvua mukine bena Kristo. Uvua upulumuna bena Kristo ubumbusha mu nzubu yabu ne ubelesha mu buloko. Uvua mene muimane utangila muvua bantu bavua bafiike munda bashipa muyidi Stefano ne mabue.

Kadi Shaula kavua ukuata bena Kristo anu mu Yelushalema to. Wakalomba muakuidi munene bua amutume ku Damaseke bua kukuataye bena Kristo. Pakavua Shaula pabuipi ne tshimenga atshi, bukenke bukole buakakenkesha diakamue muaba onso uvuaye, kudishindaye panshi. Wakumvua dîyi dimuambila ne: ‘Shaula, bua tshinyi udi unkengesha?’ Shaula kuebeja ne: ‘Wewe udi nganyi?’ Kumuandamunadi ne: ‘Mmeme Yezu. Buela mu Damaseke, nebakuambile tshia wewe kuenza.’ Musangu umue Shaula wakalua mpofu, kuyabu nende mu tshimenga bamukuate ku tshianza.

Mu Damaseke muvua muena Kristo mukuabu wa lulamatu diende Anania. Yezu wakamuambila mu tshikena kumona ne: ‘Ndaku ku nzubu wa Yudasa mu njila udibu babikila ne: Mululame, ukebaku Shaula.’ Anania wakamuambila ne: ‘Mukalenge ndi mumanye malu onso a muntu au! Udi welesha bayidi bebe mu buloko!’ Kadi Yezu wakamuambila ne: ‘Ndaku kudiye. Ndi musungule Shaula bua kuyisha lumu luimpe kudi bisamba bia bungi.’

Nunku Anania wakapetangana ne Shaula, kumuambilaye ne: ‘Muanetu Shaula, Yezu mmuntume bua kukutabeja mêsu.’ Diakamue Shaula wakatuadija kumona kabidi. Bakamuambila malu makuabu avua atangila Yezu, kuluaye muyidi wende. Pakabatijibua Shaula wakalua muena Kristo, kutuadijaye kuyisha mu nsunagoga pamue ne bena Kristo nende. Udiku mua kufuanyikija muvuabi bitonde bena Yuda pavuabu bamone Shaula ulongesha bantu malu a Yezu anyi? Bakamba ne: ‘Muntu eu ki nguvua wenda ukuata bayidi ba Yezu au anyi?’

Shaula wakalongesha bantu ba mu Damaseke munkatshi mua bidimu bisatu. Bena Yuda bakakina Shaula, kutuadijabu kukeba bua kumushipa. Kadi bena Kristo bakumvua tshifufu atshi, kumuambuluishabu bua kunyema. Bakamuela mu tshitunga kumupuekeshilabu pa disoso dia ku tshimanu tshia tshimenga.

Pakaya Shaula ku Yelushalema, wakadienzeja bua kudisangisha ne bena Kristo nende kuntu aku. Kadi bavua bamutshina. Ke muyidi mukuabu wa bulenga diende Bânaba kuya ne Shaula kudi bapostolo kubajadikilaye ne: Shaula ukavua mushintuluke bushuwa. Shaula wakatuadija kuyisha lumu luimpe ne tshisumi pamue ne tshisumbu mu Yelushalema. Panyima pa matuku bakalua kumubikila ne: Paulo.