Bimfuanyi bia mu Buloba Bulaya

Sankayi! Bikaminu bidi bipasalala ne manyi

MUPROFETE Yoele wakakankamija ‘bana ba Siyona bua kuikalabo ne disanka ne kusanka mu Yehowa.’ Wakatumika ne manyi a olive bua kumvuija disanka ne bubanji buabo: “Bushuwa miaba ya ditutshila neyuwule tente ne matete, ne bikaminu nebipasalale ne mvinyo mupiamupia ne manyi.”​—Yoele 2:23, 24.

Bu wewe ne muoyo mu Izalele mu tshikondo tshivua Bible ufundibua, uvua kusanka bua kuikala ne mutshi wa olive bu eu udi kulu eku pabuipi ne nzubu webe peshi mu madimi ebe.a Muine eu uvua mua kukupepejila nsombelu, kumuvuija wa disanka. Kadi bua tshinyi mutshi wa olive uvua ne dikuatshisha divule?​—Fuanyikija ne Balumbuluishi 9:8, 9.

Tshia kumpala, ukenkete bimpe mutshi webe. Mitshi ya olive idi mua kukumbaja siekele mivule, mikuabu kupitshisha pa bidimu tshinunu, kabidi, diwukonkonona didi pamu’apa mua kusokolola se: tshitaku tshiawu tshidi manungu-manungu ne tshifikuluke bu butu. Mutshi webe udi mua kufika bule bua metre asambombo; bushuwa kawakuikala mutambe bunene ne bule bu wa sedre peshi mulengele bu wa dibuè. Mabeji awu mmajoboke, engelela bu tshiamu tshia argent, adi afila dileji munkatshi mua tshidimu tshijima. Kadi, kuakuanyisha bulenga bua mutshi webe amu ku tshimuenekelu tshiawu peshi ku dileji diawu to. Nansha kakese!

Neuwanyishe ku bimuma biawu, ku binunu ne binunu bia olive ya lubishibishi peshi mifike! Ke tshivua tshivuije mutshi wa olive tshintu tshia mushinga mukole mu matuku a muoyo wa muena Izalele ne mu midimu yende. Mu ngondo wa Mai, mutshi mmubuikila kudi bilongo bikunze tetete bu kapia, bua dikuama dia bimuma. (Yobo 15:33) Padi bimuma ebi biboba, bidi mua kushintuluka diikala, kulekela mubidi wa luanyiluanyi ne kuangata mubidi mukunzubile peshi mufike.

Dinowa dia olive mu Octobre/​Novembre divua mudimu mukole. Bavua banyungisha matamba a mutshi bua kumatshisha bimuma bikadi bipie pa tshilamba tshiadija muinshi. (Dutelonome 24:20) Bimuma bia olive bivua bisukudibua kumpala kua kutumika nabi. Umue wa ku mishindu ya ditumika nabi, uvua ngwa kubibombeka mu mâyi a luepu. Kadi pashishe?

Ngenzelu eu uvua ulondeshila mushindu uvua muntu musue kutumika ne bia kunowa biende bivule. Bavua mua kudia bimuma bia olive bibishi peshi kubilamina mu mâyi a luepu lukole, nunku bena dîku diebe bavua ne tshiakudia tshisheme bua ngondo mivule. Misangu mivule, tshitupa tshinene tshia biakudia tshivua tshienza kudi olive, tshiakudia tshipite busheme tshivua pamu’apa tshidibua ne mikate mienza ne orge.

Kadi, tshitupa tshinene tshia olive tshivua imue misangu tshipita ku mishindu kampanda idi ikengedibua bua kupeta tshintu tshia dikuatshisha dipite bunene ne tshia mushinga mukole: manyi a olive. Uvua mua kupeta mishindu kabukabu ya manyi malenga ne kutumika nawu mishindu mishilangane. Tshia kumpala, uvua mua kututa peshi kukama kakese olive mipie mu tshinu anyi kuyidiatakaja mu makasa. (Mika 6:15) Pa kuenza nunku, uvua mua kupeta mafuta kaayi bukoya a mushinga mukole mutambe, adi abikidibua lelu’eu ne: extra virgin peshi huile vierge extra, avua makumbanyine bua kuela mu minda ivua itokesha mu ntenta wa ntendelelu. (Ekesode 25:37; 27:20, 21) Anjibi kutshinka mushindu uuvua mua kunanga bua kulama ndambu wa mafuta aa a mpatshi bua kulamba nawu dîba dia muanda wa pa buawu!

Misangu mikuabu, bavua bakama olive, nansha idi mimpe nankunanku, mu tshikaminu bua kupatula mafuta makuabu a bungi mu bitupa bipape bia olive, kadi, mmafuta a mushinga mushadile. Bitupa ebi bipape bidi pabi ne manyi pabuipi ne bia lukama 50. Kuvua mishindu kabukabu ya dikama, kadi tukonkononayi umue wa kudiyi. Olive mimana kuzaza bikole peshi nankunanku ivua yedibua mu tshikaminu tshia tshijengu. Dibue dia mpelo, dinyungulula kudi mpunda anyi kudi muntu divua dibunguluka pa olive, ke mafuta kutuadija kupatuka, apueka ne apongoloka mu mabungu.​—Matayi 18:6.

Mafuta a olive avua mua kufuanyikijibua ne ngolo muengulula mulue mâyi​—nunku, avua ne mushinga mupite bukole ne bavua batumika nawu mu mishindu kabukabu. Bimuma bia mutshi umu’epele bivua mua kukumbana bua dîku dia bantu batanu peshi basambombo mu tshidimu tshijima. Mafuta avua ne muaba munene ku biakudia biabo, bualu avua mapepele bua kupita mu tshifu ne avua afila bukole bua bungi. (Fuanyikija ne Yelemiya 41:8; Yehezekele 16:13.) Bavua imue misangu basambakaja mafuta aa ne bintu bia dipembu bua kudifita pambidi peshi kuela pa mutu pa mubikidibue kampanda bu tshimanyinu tshia diakidila muenyi dia disanka. (2 Samuele 12:20; Musambu wa 45:7; Luka 7:46) Bavua kabidi batumika nawu bu buanga bua kuondopa mputa.​—Yeshayi 1:6; Mako 6:13; Luka 10:34.

Uvua kabidi mua kutumika ne bungi bukumbane bua mafuta mu mishindu mikuabu. Uvua mua kukenkesha nawu mu nzubu, kuambika bu tshimue tshia ku bintu biwudi ulambula Nzambi, peshi kuenda nawu mushinga udi upetesha mfranga mikumbane. Eyowa, mu tshikondo tshivua Bible ufundibua, mutshi wa olive uvua tshikunyibua tshia mushinga mupite bukole; nunku, mbikumbanyine muvua Yoele mutumike nawu bua kufunkuna bubanji ne disanka.​—Dutelonome 6:11; Musambu wa 52:8; Yelemiya 11:16; Matayi 25:3-8.

[Mêyi adi kuinshi]

[Mêyi a dianyisha bua tshimfuanyi mu dibeji 24]

Pictorial Archive (Near Eastern History) Est.