Mu dikeba dia biuma bisokoka

MU 1848 bakangula ngolo muaba uvua Tshiamu tshia bukula ku Sutter ku Californie, ku Etats-Unis. Mu 1849 binunu bia bantu bakakungila ku rejon eu ne ditekemena dia kulua babanji, ne dikungila dinene kupita mu bikondo bionso bia ditunga dia Etats-Unis. Mu tshidimu tshimuepele, San Francisco, dilobo dia mazuwa divua pabuipi, diakadiunda e kulua tshimenga tshia bantu 25 000. Ditekemena dia kupeta buganji bua lukasa divua buenzeji bukole kudi bantu.

Mukalenge Solomo wa Izalele wa kale, uvua mumanye se: bantu batu bumbula ne makanda wonso bua kupeta biuma pakafundaye ne: “Kadi, biwabikila kabidi lungenyi ne kuela busunguluji lubila, biwatungunuka ne kukeba bine ebi amu bu argent, ne biwabikeba amu bu biuma bisokoka, kuyi upungila, nenku, neujingulule ditshina dia Yehowa ne neupete dimanya dia Nzambi.”​—Nsumuinu 2:3-5.

Udi mua kuenza bintu bia bungi ne ngolo ne argent, kadi kudi mushindu wa kuenza bia bungi ne lungenyi ne busunguluji. Bikadilu ebi bidi bituambuluisha bua kuangata mapangadika mempe, bua kujikija bilumbu, ne kulubuluka mu dibaka ne kupeta disanka. (Nsumuinu 2:11, 12) Bia muomumue, dimanya dilelela ne meji nebikuambuluishe bua kumanya Mukufuki webe, bua kumvua malongolola ende, bua kumutumikila ne bua kumulengelela. Ngolo kêna mua kukupesha nansha tshimue tshia ku bintu ebi.

Miaku ya mu Bible mmilelela: “Meji adi ambuluisha bua kukubibua amu bu mudi mfranga yambuluisha bua kukubibua; kadi, dimanya didi dipita diodi, bualu meji adi alama muenawu ne muoyo.” (Muambi 7:12) Padi bantu bavule balota bua kulua babanji ne lukasa luonso, mbia meji kupita bua kubuulula Bible ne kumuumbula bua kupeta busunguluji, lungenyi, dimanya ne meji bidi bikale bubanji bulelela!