Mâyi a muoyo

“MUNTU yonso udi umvua ambe ne: ‘Vua kunu!’ Ne muntu yonso udi ne nyota alue; muntu yonso udi musue angate mâyi a muoyo, kaayi kusumba.” (Buakabuluibua 22:17) “Mâyi a muoyo”​—adi umvuija bionso bidi Yehowa mulongolole bua lupandu luetu bishindamene pa mulambu wa tshia bupikudi wa Yezu Kristo. Bine ebi bidiku ne ki mbia kusumba. Nkalolo kayipu kadi Nzambi wetu muleje! Kadi bua tshinyi mbabifuanyikije ne mâyi?

Eyowa, mâyi adi mua kukolesha bikunyibua mu buloba, ne kuvuija muoyo wa bantu. Koku kakuyi mâyi, muoyo wa bikunyibua, ne wa bantu kawena mua kuikalaku. Kabidi, mu mubidi webe mudi bia pa lukama 65 bia mâyi. Bamue bondapi bapiluke badi bafila mubelu wa se: mbimpe kunua pa tshibidilu litre 2,4 ya mâyi ku dituku. Bionso bidi bipitakana munda muebe, kubangila ku dikudimuna dia biakudia ne dipatula dia bunyawu​—kudi kukengela mâyi. Wewe kuyi munue mâyi munkatshi mua lumingu lujima neufue.

Bia muomumue, “mâyi a muoyo” adi apetesha muoyo ne adiisha muoyo mu nyuma. Bituabenga mâyi a muoyo, katuakuikala ne ditekemena dilelela to. (Yone 3:36) Bituitaba mâyi aa, tudi mua kupeta muoyo wa kashidi. Kabiena bikemesha bua pavua mukaji muena Samariya muandamune ne disankidila pakamuambila Yezu ne: “Ewu yonso udi unua mâyi angamupa kakumvua kabidi nyota nansha kakese, kadi mâyi angamupa nealue munda muende mushimi wa mâyi adi asapalala bua kufila muoyo wa kashidi”! (Yone 4:14) Tuandamunayi ne muoyo umue ne tupete mâyi a muoyo kaayi kusumba.

[Mêyi a dianyisha bua tshimfuanyi mu dibeji 32]

Garo Nalbandian