Bamanyishi ba Bukalenge badi balonda

Kanemu bua bunsantu bua muoyo

BIBLE udi uleja se: mashi adi ne mushinga mukole ku mesu kua Nzambi ne udi upiisha ditumika nawu dibi. (Lewitike 17:14; Bienzedi 15:19, 20, 28, 29) Bua mêyi-maludiki aa, Bantemu ba Yehowa kabatu banyisha dipingaja mashi mu mubidi to.

Bua kuambuluisha ba-doktere ne bena mudimu mu lupitadi bua bumvue mmuenenu wa Bantemu ba Yehowa pa bualu ebu ne bamanye se: Bantemu nebitabe bua kuondopibua ne manga makuabu, Société Watch Tower mmulongolole mu matunga mashilangane komité bua kuyukidilangana ne bena mudimu mu lupitadi [Comité de Liaisons Hospitalières (C.L.H.)]. Bena komité eyi batu bakumbula mpitadi bua kuyukidilangana ne buondopi. Matuku adi panshi aa, mu bimenga 12 mu ditunga dia Pologne, bisangilu bipite pa 200 biakenjibua, muinemu bakabuelamu kudi ba-doktere bapite pa 500, nangananga balombodi ba klinike peshi balombodi ba midimu mu mpitadi. Muanda udi ulonda eu wakenzeka mu dikumbula dia mushindu’awu:

“Tshisangilu tshiakenzeka mu klinike mudibu buondapa masama a mutshima ku tshimenga tshia Zabrze tshivua ditshimuna dia mpatshi. Bituadijile mu 1986, ba-doktere badi buondapa bantu mu klinike eu badi bapanda bana betu kakuyi [dikeba] mashi. Nenku, bituadijile ku tshikondo atshi, bakadi misangu 40 bapande bantu mushindu’eu. Klinike au mmudiakaje bua kuakidila babedi badi bafuma mu Pologne mujima, kabidi ne aba badi bafuma mu matunga menyi. Kunyima kua diyukidilangana edi diakanenga minute 50, tshindodi wa muludiki wa midimu wakaleja bena C.L.H. kudi kasumbu kampanda ka babedi ne kuamba ne: ‘Bantu aba mBantemu ba Yehowa. Badi beleshangana diboko ne klinike wetu, ne badi batuambuluisha. Kaben’anu bambuluisha bena kuitabuja nabu, kadi, kabidi ne babedi bakuabu badi pabo bababidila diambuluisha edi. Tudi tuela Bantemu ba Yehowa tuasakidila, tuajadiki ne: dipandibua dinene dia mutshima didi mua kuenzeka nansha kakuyi mashi.

“‘Tshilejilu, tuvua bapande mukaji eu [ufunkune umue wa ku babedi bende] kakuyi [dikeba] mashi, ne mu Dimue edi, neapatuke mu lupitadi. Mpindieu, ndi musue kuleja se: tudi tutumika misangu mikese ne mashi kupita kumpala bualu adi ne njiwu. Adi akuata mudimu munene mu disambuluja disama dia HIV (SIDA), dia hépatite, ne kabidi adi alepesha matuku a diondapibua.

“‘Ndi muena katolike, kadi mu nzubu muetu tutu pa tshibidilu tunemeka mmuenenu wa bakuabu. Dituku kampanda, mvua muye mu diendakana pamue ne bana banyi pabuipi ne tshipalu tshia ndundu tshia Slaski. Kale, tshipalu etshi bakavua batshilengulule, kadi tuakamona se: mpindieu ntshishintuluke kakutshiyi kabidi mushindu wa kutshimanya. Ngakebeja umue wa ku bena mudimu mushindu wakenzeka dishintuluka adi. Wakangambila ne: kabavua kabidi batekemena dilongolola tshipalu etshi, kadi, Bantemu ba Yehowa bakatshifutshila, buobo e kutshivuija tshipiatshipi.

“‘Nenku, yonso wa kutudi udi mua kulongela bivule kudi bantu aba. Ndi ngela meji se: mu tshibambalu etshi tshia lupitadi, tudi ne bua kunemeka mmuenenu ya bakuabu.’ Pashishe, ufunkuna Ntemu uvua ne bua kupandibua matuku makese kunyima, wakamba ne: ‘Inabanza eu ngumue wa ku Bantemu ba Yehowa, ne neapandibue kakuyi dikeba mashi.’”

Bantemu ba Yehowa badi benza madikolela bua kubenga kuitabijija ku bukole mitabuja abu kudi bakuabu, kadi badi anu balonda tshilejilu tshia bapostolo ne “batumikila Nzambi bu mfumu, pamutu pa kutumikila bantu.” (Bienzedi 5:29) Ebi bidi bitangila kabidi kuleja kanemu bua mashi. Badi baleja dianyisha padi bakuabu banemeka mitabuja abu pa bualu ebu.