Dîna dia Nzambi

“Bikala Yehowa kayi muibake nzubu, biibaki badi batumika patupu.” Ke bidi bibadibua mu miaku ya Latin eyi. Miaku eyi mmishindamene pa Musambu wa 127:1 mu Bible, ne idi ne bulelela buondoke: madikolela kayi wonso adi Yehowa kayi mubeneshe neikale a patupu.

Miaku ayi, n’ya mu 1780 idi isanganyibua ku nzubu kampanda mu Colombo, mu Sri Lanka, ne n’ya kukonkonona bualu idi ne dîna dia Nzambi, Yehowa. (Tangila foto.) Mu siekele ya kumpala, dîna adi bavua batambe kutumika nadi. Bavua badifunda misangu mivule ku nzubu ya mbulamatadi, ku nzubu ya Nzambi, ne pa mfranga ya biamu. Ba-misionere bavua batumika ne dîna dia Nzambi pavuabu balongesha Bible mu matunga a kule, kakuyi mpata, buobo ke bafundi ba miaku eyi mu Sri Lanka.

Dishilangana kayipu didiku lelu! Bantu anu bakese batu badiamba mudibo bena nkristo ke badi batabalela dîna dia Nzambi. Bashikuluji bakuabo batu pamu’apa bajana Bantemu ba Yehowa bualu batu bazangika dîna edi. Mbua tshinyi? Bua bamue, bualu mushindu uvuabu badibikila mu tshiena-Ebelu kawena mumanyike menemene to. Kadi bantu bungi kayi badi bamanye mutubu babikila dîna dia Yezu mu tshiena-Ebelu? Kabidi, batu batumika ne dîna diende pa buloba bujima ne badinemeka.

Bua Yezu, dîna dia Nzambi divua ne mushinga mukole. Wakatulongesha bua kusambila ne: “dîna diebe ditumbishibue.” (Matayi 6:9) Pashishe, kumpala kua lufu luende, wakambila Nzambi ne: “Ngakaleja dîna diebe kudi bantu bawakampesha mu bulongolodi ebu. Bavua bebe, ne wakabampesha, ne bakanemeka dîyi diebe.” (Yone 17:6) Bena nkristo balelela mbalondi ba biidia bia Yezu. Kabena pabu ne bua ‘kumanyisha dîna dia Nzambi’ anyi? Bantemu ba Yehowa batu benza nanku, ne Yehowa utu ubenesha bivule “nzubu” wabo. Buabu buobo, musambu eu ng’wa bushuwa: “Disanka didi kudi tshisamba tshidi Nzambi muikale Yehowa!”​—Musambu wa 144:15.