Tshiji tshianyi peshi makanda anyi a mubidi?

NNGANYI utu kayi ukuata tshiji? Bitu bifikila yonso wa kutudi. Imue misangu, tutu ne mabingila a kukuata tshiji tshikole. Kadi, mu bululame buonso, misangu mivule tshiji tshietu (peshi bukole buatshi) ki ntshiashila pa mabingila majalame to, ki muomu anyi?

Bible udi utuambila ne: “Lekela tshiji ne imansha luonji, kukeluki bua kuenza anu bibi.” (Musambu wa 37:8) Mêyi aa adi ne mubelu kayi wa meji? Kudiku mua kumueneka bipeta kampanda bibi bua makanda ebe a mubidi anyi?

Muinshi mua tshiena-bualu tshia “Makanda a mubidi,” tudi mua kubala mu tshikandakanda tshia The New York Times ne:

“Bantu batu bakeluka ku musangu ne ku musangu, peshi bakuata tshiji tshikole lubilu, ne bavuma pa malu a patupu kabatu’anu benza bibi pa kubenga kulengelela bakuabu. Batu mua kuikala badishipa bobo bine.

“Bakebuludi mu muanda eu mbafike ku disangisha mamanyisha mapiamapia adi aleja se: tshiji tshia mulunguluku tshitu ne njiwu mikole bua makanda a mubidi, ne tshifuane mua kukebela muntu lufu lua tshimpitshimpi kupita too ne makanya, bunene bupitshidile ne ndiilu munemesha ne bifidi bia manyi mavule.

“‘Makebulula etu mmasokolole ne: tshiji tshia lukinu ne dielela bakuabu meji mabi tshitu tshibipisha mubidi wetu mushindu umue ne bituadi bia njiwu bidi bimanyike too ne ku mpindieu,’ ke muakajadika munganga Redford Williams, mushikuluji wa bikadilu bia bantu mu lupitadi lua université wa Duke.”

Malonga mmaleje se: aba batu basamisha lungenyi bipitshidile bua tunyinganyinga tua ku dituku ne ku dituku batu bakolesha divula dia mâyi a lulengu [adi celile iluka] mu mubidi, mine mâyi adi akebesha tshikutakanyi mu lungenyi. Dikuata tshiji ku musangu ne ku musangu didi mua kulela dipampulumuka dia bungi bua cholestérol (mâyi adi dimuma diluka) mukumbaji wa mudimu muimpe ne mubi mu mubidi, ne kuvudija njiwu ya kupeta disama dia mutshima ne tujilu, bua dikondakana dia nkuatshilu wabi wa mudimu.

Bamue badi mua kuandamuna ne: ‘Ntshianyi tshikadilu’ peshi ne: ‘Mbia katshia ku buana.’ Nansha nanku, abi kabiena biumvuija se: kuena mua kushintuluka to, biwenza madikolela ne muoyo umue bua kutumikila mibelu ya Nzambi. Mu Bible webe, keba mibelu yende idi yakula bua tshiji ne luonji mifunda mu Nsumuinu 14:29, 30; 22:24, 25; Efeso 4:26; Yakobo 1:19, 20.

Pa kutumikila mêyi aa a Nzambi, udi mua kuakaja bukole buebe bua mubidi ne kulepesha matuku a muoyo webe. Tshikandakanda tshia Times tshidi tshimanyisha ne: “Bakebuludi bavule badi bitaba ne: bena biji bia lukasa badi mua kukepesha njiwu ya dipetangana ne lufu lua tshikoso pa kushintulula tshikadilu tshiabu, kukeluka kua tshimpitshimpi.”