Bidi mua kukuambuluisha anyi?

TSHIBEJIBEJI etshi tshiwudi natshi mu tshianza tshiebe ntshilongolola bua tshikale mpokolo wa dikankamijibua, pa kukuvuluija mêyi-maludiki a mu Bible bua mêku ikale mashindame ne bua kukuba muoyo mutoke wa muntu pa nkayende. Tshidi tshileja se: Bible wakadianjila kumanyisha bikondo ebi bia tshimvundu bidiku lelu, pashishe tshidi tshileja patoke tshintu tshialua kujikija bionso ebi​—Mbulamatadi wa Bukalenge bua Nzambi. Udiku mua kubabidila Tshibumba tshia Nsentedi ne Réveillez-vous!, bidi bimuzangika anyi?

Vilma, mukaji kampanda wa Ku Philippines, wakafunda ne: “Bikalaku miaku kampanda bua kufunkuna ngikadilu wa bibejibeji bienu, ndi nngela meji se: nensungule miaku eyi: ‘bualu bua dikema.’ Ngakamona ne ngakabala bua musangu wa kumpala Réveillez-vous! wenu ne Tshibumba tshia Nsentedi pamvua mu bus, mu dialukila ku nzubu mfumina ku Manila. Pa tshibidilu, mvua ntuala bikandakanda pamvua nngenza ngendu, kadi, bua musangu au tshivua mutuale nansha tshimue.

“Muntu uvua musombe ku luseke luanyi mu luendu uvua muena bidimu bungi bubandile, yeye eu uvua ne bibejibeji bienu. Kunyima kua yeye mumane kubala Réveillez-vous!, wakapatula tshibejibeji tshikuabu, Tshibumba tshia Nsentedi. Nngakababidila tshikondo atshi bua kuanji kusómba Réveillez-vous! Mu bululame buonso, dibala dia bibejibeji abi diakansankisha, bualu biena-bualu bionso bivua bimpe, bivua bia malu a lelu, ne bivua bikankamija.”

Mukaji awu wakafila nkomenu wa se: “Ndi musue kupeta bibejibeji bienu. Bu nuenu mua kusua, mmanyishayi mushindu undi mua kubipeta.” Bena ku biro bia filiale wa Bantemu ba Yehowa wa Philippines bakasanka bua kuenza nanku pa kusakidila dîna dia mukaji eu ku liste wa mêna a bantu bavuabo batumina mikanda ku poste.