“Anjayi kubala bivule kumpala kua kuseka”

EBI ke biakamba mulume kampanda udi musombele mu ditunga dia Nouvelle-Zélande pa bidi bitangila Tshibumba tshia Nsentedi, tshibejibeji tshiwudi ubala. Pa bidi bitangila tshiena-bualu tshivua tshiakula bua malu adi atangila tshidiendelandela tshia Yehowa tshidibo bakula bualu buatshi mu Yehezekele nshapita wa 1, muntu eu wakafunda ne:

“Tshionso tshia ku bifukibua ebi binayi bidi ne muoyo, anyi bakeluba, tshivua ne mapuapua anayi ne mpala inayi. Bivua ne mpala wa nyama wa ntambue, udi ufunkuna buakane bua Yehowa; mpala wa tshimpanga, udi ufunkuna bukole bua Nzambi; mpala wa nyunyu wa mukanku, udi uleja meji ende; ne mpala wa muntu udi ufunkuna dinanga didi nadi Yehowa.

“Kunyima kua meme mumane kubala misangu ne misangu malu aa, mutshima wanyi wakuwujibua tente ne musangelu. Binsonji bia disanka biakampueka pa matama anyi. Diakamue, ngakapanga tshia kuamba, meme e kudiambila ne: ‘Yehowa, mmushindu kayipu uwudi mulengele ne [kabidi] muena musangelu!’ Biakankemesha bikole bitambe, bualu tshivuaku muanji kuikala ne mmuenenu mupiamupia wa mushindu’eu pa bidi bitangila Yehowa Nzambi, umvua, meme muena mu bulongolodi ebu, museke kukadi bidimu bivule. Ndi ‘ngela tuasakidila’ kudi Bantemu ba Yehowa, ne kudi bena tuseku bavule bu meme, ndi mbambila ne: ‘Anjayi kubala bivule kumpala kua kuseka.’”