Bidimu dikumi bia dipatuka mu tshikondo tshimue-tshimue!

PAKEBEJABU muanetu munanga wa bakaji muena Espagne muakumvuaye bidimu dikumi bishale pakatuadija kupatuka mu tshikondo tshimue-tshimue Tshibumba tshia Nsentedi mu tshiena-Espagne ne mu anglais, wakandamuna ne: ‘Tudi tumvua se: ndibenesha bualu mpindieu tudi, anu bu munutu nuamba, tulonda dikasa dimue-dimue ne anglais. Pandi ngamba ne: “anglais,” pa tshibidilu ndi ngela meji ku bulongolodi. Tudi tuangata bulongolodi bu “Mamu.” Tudi tudiumvua balamatangane bikole [nabu]. Mbimpe bitambe. Mbualu bua dikema!’

Muanetu wa bakaji wa lulamatu eu wakumvuija mudi babadi bavule ba miakulu mikuabo, pa kumbusha wa anglais, bumvua. Mu bidimu bishale, biena-bualu bia Tshibumba tshia Nsentedi tshia mu tshiena-Espagne bivua bipatuka ngondo pabuipi ne isambombo kunyima kua dipatuka diabi mu anglais. Miakulu mikuabo ivua payi ipitshisha tshikondo tshia muomumue. Eyowa, dijinga dia kupatula biena-bualu bia muomumue, mu tshikondo tshimue-tshimue mu miakulu mivule divua dikole.

Nanku, pakatuadijatshi ne nimero wa dia 1 Tshisanga 1984, Tshibumba tshia Nsentedi tshia mu tshiena-Espagne tshivua tshia kumpala ku dipatuka mu tshikondo tshimue-tshimue ne tshia anglais. Miakulu mikuabo kayakanenga bua kulonda dikasa edi. Ku mbangilu wa 1985, Tshibumba tshia Nsentedi tshiakatuadija kupatuka mu miakulu 23 mu tshikondo tshimue-tshimue. Bu muvua bakudimunyi benda bamueneka, pashishe, babibidija pa kubalongesha, Tshibumba tshia Nsentedi mu miakulu mivule tshiakatuadija kupatuka mu tshikondo tshimue-tshimue ne tshia anglais.

Nimero eu wa Tshibumba tshia Nsentedi mmufikilu wa bidimu dikumi wa dipatuka dia mu tshikondo tshimue-tshimue. Tshibumba tshia Nsentedi tshidi mpindieu tshipatuka mu miakulu 116, 85 ya kudiyi mu tshikondo tshimue-tshimue. Mbuena-kuamba ne: bia pa lukama 99,3 bia bibejibeji bionso 16 100 000 bia Tshibumba tshia Nsentedi bidi bipatuka ne bizubu ne biena-bualu bia muomumue. Ku aba batu babuela mu dilonga dia Tshibumba tshia Nsentedi dia ku lumingu ne ku lumingu, bia pa lukama 95 batu bakonkonona biena-bualu bia muomumue mu tshikondo tshimue-tshimue.

Réveillez-vous!, tshibejibeji tshitu tshienda pamue ne Tshibumba tshia Nsentedi, udi upatuka mu tshikondo tshimue-tshimue mu miakulu 37 ya ku miakulu yende 74. Mukanda wa ku tshidimu ne ku tshidimu wa Annuaire des Témoins de Jéhovah udi upatuka mu miakulu 18. Dipatuka dia mu tshikondo tshimue-tshimue dia mushindu’eu didi diambuluisha tshisamba tshia Nzambi bua kuikalatshi mu buobumue “mu tshieledi tshia lungenyi ne mu meji.”​—1 Kolinto 1:10.