Adi ne mushinga mukole kupita mabue a korayi
Babandidi bungi buvule batu bakatshila pa kutangila tshintu tshilengele kuisu bu etshi mu mâyi a Mbuu Mukunze.
Mishipa bungi kabuyi kubala ya mekala malengele ne mashilangane bu muanza-nkongolo itu ikemesha aba batu badiina bua kubandila bintu muinshi mua mâyi aa a mankenda. Kadi, paudi utangila pambidi pa mushipa eu wa mekala malengele udi umueneka apa, udi umona bintu bikuabu bilengele kuisu, bimue bia kudibi mmabue malengele adi abalakana.
Kudi mabue malengele a bungi a mmuenekelu ne mekala kabukabu. Anu muudi mua kutshinka, nansha mu bikondo bia kale mabue malengele avua angatshibua ne mushinga mukole. Basóngi anyi benji ba bilengejilu bavua batumika nawu bua kuenza bilengejilu bidi bisankisha, ne bafundi ba Bible mbatele mabue malengele a korayi mulongo umue ne ngolo, tshiamu tshia argent ne rubis. (Nsumuinu 3:14, 15; Yehezekele 27:16) Kadi, bafundi aba badi batuambuluisha bua kubenga kuanyisha anu bulengele ne munshinga bia mabue mine a korayi.
Badi baleja se: bimue bintu bidi ne mushinga mukole kupita, ne tudi ne bua kubinanga bipitshidile. Ke bu mudi mukaji muimpe ne wa tshikadilu tshikumbanyine, bualu tudi tubala ne: “Mukaji wa tshikadilu tshikumbanyine, nnganyi udi mua kumupeta? Mushinga wende mmupite wa mabue a korayi.” (Nsumuinu 31:10) Udi mulume ukadi musele anyi? Tangila tshiakabidi korayi milengele idi apa, ne udiebeje né utu wangata mukajebe ne buneme ne mushinga mukole anu mudiye ubikumbanyina.
Nansha tuetu bikale balume peshi bakaji, basele peshi bajike, ditangila mabue aa malengele a korayi didi ne bua kutuambuluisha bua kuanyisha mushinga mupite bunene ne kawuyi kuelekeja wa meji, busunguluji ne dimanya bia Nzambi. Dîyi dia Nzambi didi diamba ne: “Wa diakalenga mmuntu udi mupete meji, ne muntu udi mupete busunguluji, bualu kuapeta bu difutu nkuimpe kupite kuikala ne argent bu lupetu, ne kuapeta bu makasa a mushinga nkuimpe kupite ngolo muine. Wowo adi ne mushinga mukole kupita mabue a korayi ne bintu biebe bia kudisankisha nabi kabiena mua kuakanangana nawu.”—Nsumuinu 3:13-15; 8:11.
Nansha tuamona tuetu bine pa kudiina muinshi mua mâyi peshi pa tshimfuanyi, mabue a korayi a mu Mbuu Mukunze adi ne bua kutuvuluija bulengele ne kuikala tshiena-bualu tshia tuetu kueleela meji.