Masekelela a diledibua mmashiye mupuya wa lufu
DISEKELELA dia diledibua ndimueke lelu kudi bantu ba bungi bu tshilela tshidi tshiakane. Kadi Bible kena uleja mu mushindu wa dianyisha tshilela etshi to. Bualu bumue mbobu ebu: Mifundu kayena nansha ne muaba udi uleja umue wa ku basadidi ba Nzambi ba lulamatu usekelela diledibua.
Maledibua abidi adi Bible mutela, avua amu a bakokeshi bavua baluishi ba Nzambi. Mu disekelela dionso, bakashipamu muntu, bua babikidibua kusankabu bua lufu lua umue uvua mukalenge kayi usankidila. Musangu wa kumpala, Faraone, mukalenge wa Ejipitu, wakashipa kapita ka bena bidia. (Genese 40:2, 3, 20, 22) Mukokeshi muena Ejipitu eu wakenza nunku munkatshi mua difesto bualu kavua usanka ne musadidi wende. Musangu muibidi, Herodese, mukokeshi wa Galileya, muena tshiendenda, wakakosesha mutu wa Yone Mubatiji anu bua kusankisha muana wa bakaji uvua mumusankishe mu dija diende dia maja. Mmalu mabi kayipu!—Matayo 14:6-11.
Kadi Bible kena mutela anu masekeledi abidi aa a pa buawu anyi? Kabiena nanku. Mufundi wa malu a kala a bena Yuda, Yozefe, udi wamba ne: malu a nunku kaavua a pa buawu nansha. Udi ufunda misangu mikuabo ivuabo bashipa bantu mu dituku dia diledibua bua kudisankisha.
Tshilejilu, panyima pa kabutu ka Yeruzaleme mu 70 B.B., biakenzeka pakafua bena Yuda 1 000 000 ne bakuabo 97 000 bakapanduka bua kuangatshibua bu bena buloko. Batangila nabu ku Rome, général wa bena Rome Titus wakaya ne bena Yuda bavuaye mukuata ku dibungu dia Kezareya divua pabuipi.
Yozefe udi ufunda ne: “Pakashalaye ku Kezareya, Titus wakasekelela diledibua dia muan’abu Domitien ne lumu lua bungi, kushipa bena buloko bapita 2 500 mu manaya a nyama ya luonji ne mu kapia. Pashishe, wakaya ku Beirut, nkolonyi wa bena Roma mu Phénicie, kuakaluaye kusekelela diledibua dia tatu’ende mu dishipa kabidi bena buloko bapite bungi mu manaya malongolola biakane.”—The Jewish War, VII, 37, muandamuna kudi Paul L. Maier mu Josephus: The Essential Writings.
Kabiena bikemesha mudi The Imperial Bible-Dictionary usakidila ne: “Bena Ebelu ba tshikondo tshiakalonda bavua bamona masekelela a diledibua bu bimue bia ku bitendeledi bia ba-nzambi, mmuenenu uvua ne bua kushindikijibua pa kumona bionso bivua bipitakana mu matuku aa.”
Bena nkristo ba lulamatu ba mu siekele wa kumpala bushuwa kabavua ne mua kudisanga pamue mu tshilela tshilejibua bibi mu Bible ne tshisekelela bibi bitambe kudi bena Roma. Lelu, bena nkristo balelela mbamone bua se malu mafunda mu Bible pa mafesto a diledibua adi amue a ku malu mafunda bua kubayisha. (Lomo 15:4) Kabena basankidila diledibua bualu kuenza nunku kudi kupa muntu mushinga udi kawuyi wende. Ne kupite apu, basadidi ba Yehowa badi batangila ne meji mu mushindu mubi udi Bible muleja masekelela a diledibua.
[Tshimfuanyi mu dibeji 25]
Tshipalu tshia manaya mu Kezareya