Miaku mifunda idi ne diumvuija dia pa buadi

“IEHOVA SIT TIBI CUSTOS”

MIAKU EYI mifunda ku tshimanu tshia kumpala kua nzubu wa mu siekele wa 17 ku Celerina, ku Suisse wa ku est, idi yumvuija ne: “Yehowa ikale mukubi webe.” Ku muaba eu wa mikuna, kutu pa tshibidilu kusanganyibua dîna dia Nzambi dilamika anyi difunda ne mukubu pa nzubu, ekleziya, ne pa nzubu ya bamfumu ba ekleziya bidi bimane kunenga siekele mivule. Mmunyi muakavua dîna edi Yehowa ditambe kumanyika nunku?

Rejon wa kale wa Rhétie (bitupa bivua bimuenza bidi: Allemagne wa ku sud-est, Autriche, ne Suisse wa ku est bia lelu’eu) wakavua provinse wa Roma mu 15 K.B.B. Bantu bavua bakuase bakatuadija kuakula tshiena-Roma, muakulu muashila pa wa Latin wakavua pashishe kulela tu-miakulu tuvule tutshidi tuakudibua too ne ku lelu’eu mu bimue bibanda bia mikuna ya Suisse ne ku nord kua Italie.

Pashishe, bitupa bia Bible biakakudimunyibua mu tshiena-Roma. Nkudimuinu umue wa Biblia Pitschna, uvua ne mukanda wa Misambu ne Mifundu ya tshiena-Greke ya bena nkristo. Mu Bible eu, mupatula mu 1666, dîna Iehova divuamu misangu mivule mu mukanda wa Misambu. Bu muvua Bible muikale mukanda wa kumpala wa kubala ku nzubu, babadi ba nkudimuinu wa Biblia Pitschna bakibidilangana ne dîna dia Mufuki.

Kadi, ndelanganyi yakalonda yakajimija dijinga dia kumanya malu adi mu Bible. Bavule kabavua nansha baditatshisha bua kumanya tshivua muaku “Iehova” umvuija to, nansha bamfumu ba ekleziya kabavua benza madikolela bua kuwumvuija to. Nunku miaku mifunda eyi yakavua bilengejilu patupu bisunguluji bia tshikondo tshia kale.

Mu makumi a bidimu bidi panshi ebi, dishidimuna dia pa buadi didi dienda dienzeka. Bantemu ba Yehowa mbenze ngendu kumbukila ku miaba idi kuinshi kua Suisse, pa kupitshisha bikondo bia dikiisha mu bibanda ebi bilengele ne pa kuenza madikolela a pa buawu bua kulongesha bantu badi bakuase malu adi atangila Nzambi muena dîna dia Yehowa. Bamue Bantemu bakasombela kuinaku bua kumonabu mua kupitshisha mêba mavule mu mudimu wa kumanyisha bantu malu adi atangila malongolola a mpatshi a Mufuki bua buloba ne bantu. Nunku, miaku eyi ya tshiena-Roma mifunda kale yavu ne diumvuija dipiadipia kudi bantu aba bualu badi balonga malu adi atangila Nzambi mulelela, Yehowa.

[Bimfuanyi mu dibeji 32]

IEHOVA PORTIO MEA: Yehowa udi buhianyi buanyi.​—Tangila Musambu wa 119:57