“Ndi muenza mu mushindu wa dikema”

“NDI mufume penyi?” Elu ke lukonko lutu bana batekete badiebeja mu tshikondo kampanda peshi kansanga. Padi bana bakulumpa, lukonko luabo lutu misangu ya bungi lutambe kuondoka: “Muoyo mmufumine penyi?” Lukonko elu mbaluyikidilangane kukadi bidimu binunu ne binunu, ne pa tshibidilu bena malu a siense bavule badi bamona dilongesha dia didimenena dia bintu bu diandamuna dia meji ku dijimbu dia ntuadijilu wa muoyo. Bu mudibi bimanyike, diumvuija dia dilongesha dia didimenena didi se: muoyo mmulue mu mpukapuka.

Kukadi kupite bidimu 3 000, Mukalenge Davidi wakafunda ne: “Mu mushindu mukuate buôwa ndi muenza mu mushindu wa dikema.” (Musambu wa 139:14, NW) Patudi tulonga bia bungi pa muoyo, tudi tutamba kumona bulelela mu miaku ayi. Bushuwa, mushikuluji wa malu a mbidi Fred Hoyle wakafunda ne: “Padi bashikuluji ba malu a bioshimi benda bajandula bivule pa dijingakana dia muoyo didi dikuata buôwa, bidi bimueneka ne: diela meji ne muoyo mmufumine ku mpukapuka didi dikepa ne diumbushibua dionso. Muoyo ki mmulue mu mpukapuka nansha.”

Kadi muoyo mmufumine penyi? Biena-bualu bibidi bidi ku mbangilu kua tshibejibeji etshi bidi biakula pa lukonko alu. Paudi musue kupeta mamanyisha a pamutu, suaku ufundile Association “Les Témoins de Jéhovah” B.P. 634 Limete Kinshasa anyi ku umue wa ku adresse idi mu dibeji 2.