Nkonko ya babadi

Bidi mua kuikala bimpe bua kuitaba ditapibua bisalu anyi amue manga a nshingi adi ne “albumine” udi ufumina ku mashi a muntu anyi?

Mu bulelela buonso, muena nkristo yonso pa nkayende udi ne bua kupangadija pa bualu ebu.

Basadidi ba Nzambi badi ne bua kutumikila buludiki budi busanganyibua mu Bienzedi 15:28, 29, kubenga mashi. Mu diumvuangana ne bualu ebu, bena nkristo kabena ne bua kudia munyinyi udi kauyi mupuekesha mashi anyi bintu bu mudi boudin mienza ne mashi. Kadi mikenji ya Nzambi idi kabidi ne mudimu mu malu a luondapu. Bantemu ba Yehowa badi ne karte kadi kamanyisha se: badi babenga ‘diedibua mashi, mashi mu kabujima kawu, globile mikunze, globile mitoke, plakete, anyi plasma ya mashi.’ Kadi, tudi mua kuamba tshinyi pa bidi bitangila nshingi ya serume idi ne ndambu wa protéine anyi biibaki bia mubidi bitu mu mashi?

Bantemu mbajingulule katshia ku kale ne: ebu mbualu bua dipangadija dia muntu pa nkayende mu diumvuangana ne kuondo kende ka muoyo kalongesha kudi Bible. Ebi biakazangikibua mu “Nkonko ya babadi” ya Tshibumba tshia Nsentedi tshia mu dia 1 Kabalashipu 1990, tshiakakonkonona bualu budi butangila serume ya kutuila mu nshingi idi munganga mua kufundila muntu bikalaye muanyika ku amue masama. Bienji bia manga a kutuila mu nshingi a mushindu’eu kabiena plasma wa mashi to kadi mbikubi bia mubidi bidi bifumina ku plasma ya mashi a bantu anyi a nyama yakakolela disama. Bamue bena nkristo badi bumvua ne: badi mua kuitaba nshingi ya mushindu’eu kakuyi ditatshisha kuondo kabo ka muoyo mbatuishibue ne: bikubi bia mubidi bidi bifumina ku mashi a mukaji udi ne difu bidi bisambuka mu mashi a muana udi munda muende. “Nkonko ya babadi” ke muakambayi, bia muomumue ne mudi ndambu wa albumine umbuka kudi mukaji udi ne difu uya kudi muanende.

Bavule badi bangata muanda eu ne mushinga, bualu bimue bisalu bidi kabiyi bienza ne mashi bidi mua kuikala ne ndambu wa albumine wa plasma uvuabu batumike nende anyi basakidile ku bienji biabi dîba dia dibienza. Pa tshibidilu ndambu mukese wa albumine utu ukuatshibua nende mudimu mu nshingi ya ormone muenza ne bintu bivule wa EPO (Erythropoïétine). Bamue Bantemu mbitabe nshingi ya EPO bualu udi mua kuambuluja dienjibua dia globile mikunze ne udi mua kuepula munganga ku diumvua se: diedibua mashi didi mua kukengedibua.

Manga makuabo avua pamu’apa kukuatshibua nawu mudimu matuku alua neikale ne ndambu mukese wa albumine, bualu kumpanyi ya dienza manga idi yijandula manga mapiamapia anyi idi ishintulula bienji bia aa adiku. Nunku bena nkristo badi ne bua kutabalela né ng’albumine udi mu bisalu anyi nshingi mikuabo idi munganga ubafundila. Bikalabu ne dielakana anyi ne kabingila ka kuela meji se: albumine udi tshimue tshia ku bienji, badi mua kuebeja munganga wabo.

Anu bu mudibi bilejibue, Bantemu bavule ki mbabenge nshingi idi ne ndambu mukese wa albumine to. Kupita apu, eu yonso udi musue kulonga bualu ebu mu buondoke kumpala kua kuangata dipangadika pa nkayende udi ne bua kubala tshiakabidi mamanyisha mafila mu “Nkonko ya babadi” ya mu Tshibumba tshia Nsentedi tshia mu dia 1 Kabalashipu 1990 (mu français).