Ditabuja dia dikima dia bana betu bena Rwanda

KU NTUADIJILU kua 1994, buloba bujima buakapampakana bu muvua ngumu ya dishipa bantu ba bungi ifumina ku ditunga dia Afrike dia Rwanda. Mvita ya tshikisu munkatshi mua bena ditunga yakabudika​—katongobela ka siekele mivule ya nkuna.

Bu muakapetanganabo ne dishimbuka dia mikenji ne bulongame, Bantemu ba Yehowa bapite pa 2 000 mu Rwanda bavua ne bua kunyema bua kukuba mioyo yabo. Pabuipi ne 1 300 bakafika ku dipeta tshisokomenu ne dikubibua mu tumponya tua bena tshimuangi pabuipi ne Zaïre ne Tanzanie, kadi bakuabo kabakapeta mushindu wa kunyema kumpala kua dîba to. Tudi ne kanyinganyinga kakole bua kumanyisha ne: pabuipi ne bana betu ba balume ne ba bakaji bu 400​—bakulumpe ne bana, bushuwa buonso buabu kabavua basalayi nansha—​mbafue mu tshikisu etshi tshikuate buôwa. Bena nkristo pa buloba bujima badi banyongopala bua dijimina dia balami ba muoyo mutoke aba ba dikima ne badi bakankamijibua kudi mulayi wa mu Bible wa dibiishibua ku lufu.​—Yone 11:25.

Mmunyi muvua nsombelu wa bana betu ba balume ne ba bakaji bena Rwanda bakapanduka? Bakulu bakatumibua kumbukila mu matunga bungi kampanda bua kutangila malu aa buludiludi. Luapolo kampanda luakamba ne: bana betu bena Rwanda mbâkame nsombelu eu mu “buneme ne dikima.” Tshilejilu, dilomba dia kumpala ku mavule akenza bana betu divua dia mikanda miumvuiji ya Bible. ‘Bidi bimueneka ne: badi batamba kuditatshisha bua biakudia bia mu nyuma kupita bua diambuluisha dia ku mubidi, nansha mudibu ne dijinga dia lukasalukasa dia bintu bivule,’ ke mudi luapolo lukoma. Nansha mudi nsombelu mu tumponya mikale mishadile, ‘tshitupa tshitambe makenda mmuaba udi bana betu basombela.’

Société Watch Tower mmufile mfranga idi ikengela bua kusumba biakudia, mbulankete, bilamba, bisabata, ne manga. Bana betu bena France mbafile mapa ne kalolo kuonso, ne ku ntuandijilu kua Kabalashipu, bakatumina bana betu bena Rwanda badi mu dikenga tone mitua ku ibidi ya bintu.

Kabiyi mua kukemesha to, nsombelu eyi mmifikishe ku bumanyishi buimpe. Babandidi bakatuibua bikole ku muoyo kudi muanda wa se: bana betu bena Rwanda bakapeta diambuluisha ne dikuatshisha bia mushindu’eu kudi Bantemu nabo, ne kuvua mushindu wa kuabanyangana diambuluisha edi ne bakuabo. Bamue bakumvuija ne: anu Bantemu ki bakakumbudibua mu tumponya kudi bena Ekleziya wabo!

Makenga a bana betu bena Rwanda adi atuvuluija ne: mu “matuku a ku ndekelu,” aa bantu nebikale “bena luonji” ne “bena tshikisu.” (2 Timote 3:1-5; nkudimuinu wa Today’s English Version) Ne nansha mudi Yehowa kayi ulaya tshisamba tshiende dikubibua dia mu tshishima ku njiwu ya ku mubidi, udi ulaya bua kukuba makanda abo a mu nyuma ne malanda abo nende ne, mu bukokeshi bua Kristo bua Bidimu Tshinunu, bua kubiisha ku lufu aba badi bafua mpindieu. (Musambu wa 91:1-10) Tutungunuke ne kuenza masambila etu kudi Yehowa bua akuatshishe ne ambuluishe bana betu bena Rwanda badi bapanduke mu tshikondo etshi tshia matetshibua bua diakalenga diabo.​—Musambu wa 46:1.