“Ditalala dia Nzambi didi dipite lungenyi luonso”
MU miyuki ya bantu, basadidi ba lulamatu ba Nzambi mbapetangane ne bikondo bia disumpakana dikole dipampakaji. Mmushindu kayipu udibi bilelela lelu’eu, bualu tudi ne muoyo mu “matuku makole”! (2 Timotee 3:1, Mukenji Mulenga) Mupostolo Paulo wakabela bena nkristo bua kuupuilabu Yehowa tunyinganyinga tuabu ku butuangaji bua masambila. Ne tshipeta kayi? “Ditalala dia Nzambi didi dipite lungenyi luonso nedilame mitshima yenu ne bieledi bienu bia lungenyi ku butuangaji bua Kristo Yezu.”—Filipoi 4:7, NW.
“Ditalala dia Nzambi” edi ntshinyi? Mbupole budi bufumina ku dikala ne malanda masheme ne Mufuki. Bulunda bua mushindu’eu budi butupetesha dieyemena dia se: nansha tuetu bikale ne makenga, Yehowa “kakulekelela tshisamba tshiende; kakushiya bena diende nansha.”—Musambu wa 94:14, Bible wa Today’s English Version.
Ebi kabiena biumvuija ne: tudi bepula ku buluishi to. “Makenga a muntu muakane adi a bungi;” ke muakafunda mufundi wa misambu. (Musambu wa 34:19) Kadi ditalala dia Nzambi didi mua kutuala disulakana. Mmunyi?
Ditalala dia Nzambi ‘ndipite lungenyi luonso,’ ke muakafunda Paulo—anyi bu mudibi bikudimuna mu Bible wa Concordant Version, “nditumbuke kupita ngikadilu kayi yonso wa mu lungenyi.” Kanyinganyinga kadi mua kutukebela mpampakenu mikengeshi kabukabu. (Muambi 7:7) Kadi, ditalala dia Nzambi didi mua kutupolesha, nangananga patudi tukengela “bukole bupite bua ku tshilelelu.”—2 Kolinto 4:7 NW; 2 Timote 1:7.
Kupita apu, ditalala dia Nzambi mbukubi. Didi mua “kulama mitshima yenu ne makole enu a mu lungenyi,” anu bu muakafundila Paulo bena Filipoi. Muaku wa tshiena-Greke mukudimuna “kulama” mmuaku wa basalayi uvua pamu’apa usaka meji ku difuanyikija nsentedi idi ishala mitabale butuku ne munya. Mu mushindu wa muomumue, ditalala dia Nzambi didi mua kutumika bu mulami wa mêba 24 pa 24 wa mitshima yetu ne makole etu a mu lungenyi.—1 Kolinto 10:13; fuanyikija ne Efeso 4:26.
Pa kutangila mianda mikengeshi itudi tuakamangana nayi lelu, ditalala dia Nzambi ki ntshintu tshia kuelela tuasakidila anyi?—Musambu wa 18:2; fuanyikija ne Ekesode 40:38.