Mukese kadi muikala ne dikinki

ROBERT, nsongalume wa ku Canada, wakenza ngendu ku Mputu mu dikeba dia tshipatshila tshia muoyo wende. Wakamona malu mavule avua mamutekesha ku muoyo bua matuku atshilualua.

Pavuaye musomba mu nzubu kampanda wa tshidiilu mu Seville, mu Espagne, bakapa Robert trakte mufunda kudi Bantemu ba Yehowa. Diambedi, Robert uvua ne mpata. “Nansha nanku, ngakamubala,” ke muakambaye. “Tshiena mua kubiumvuija, kadi ngakumvua diakamue lungenyi lumvuila. Mu ngendu yanyi, mvua mumona kanyinganyinga ka bantu ne dishimbuka bishilashilangane, ne ku muoyo kuvua kuntalala bua dipanga dianyi dia tshikandi tshia kushintulula malu. Kunyima kua dibala trakte, ngakadiebeja ne: ‘“Bulongolodi bupiabupia” ebu budi mua kuenzeka anyi?’ Nunku, ngakela meji ne: ‘Eyowa, bidi mua kuenzeka.’”

Ne ditekemena divuijilula dipiadipia, Robert wakafundila biro bia Bantemu ba Yehowa mu Canada, ulomba bua muntu kampanda amukumbule ne amuambuluishe bua kujingulula Bible papinganaye kuende.

Kabiyi mpata, dîyi dia mukana didi ne dikinki. Kadi, katupepeji nansha kakese bukole bua mukenji mufunda. Mikanda miashila pa Bible, nansha kayiyi minene idi ne buenzeji bukole. Idi ilenga tshieledi tshia lungenyi ne mutshima, ifila ditekemena dilelela bua matuku atshilualua.​—Ebelu 4:12.