Tshitendelelu tshiebe: Mmazuwa adi kaayi ne bua kulekedibua anyi?
MAZUWA kampanda adi munkatshi mua tshipepele tshikole. Benawu, badi baluangana kamuyi mushindu bua kupandisha buatu buabu, badi ne tshia kuangata dipangadika dikole: kushala mu buatu anyi kubulekela ne kudipandisha nkayabu. Utuku mumanye se: bualu bufuanyikija bukuate buôwa ebu batu batumika nabu bu tshifuanyikijilu tshia malu a Nzambi anyi?
Bashikuluji ba malu a Nzambi, nangananga bashikuluji bena Katolike, badi misangu mivule bafuanyikija ekleziya wabu bu mazuwa kampanda adi mu tshipepele tshikole. Badi bamba ne: mazuwa aa, adi ne Yezu peshi Petelo ku yenda, adi mushindu umu’epele wa lupandu. Mmuenenu wa bamfumu ba bitendelelu ng’wa se: ‘Nansha bia munyi kanulekedi mazuwa. Ekleziya ukadi mupeta manyanguka a nsombelu makole kumpala, kadi mmazuwa akadi mapanduke ku mpepele yonso ya kale.’ Bamue badi bamba ne: ‘Bua tshinyi kulekela ekleziya Katolike? Kua kuya kukuabu nkuepi? Bua tshinyi kubenga kushalamu ne kuambuluisha bua kumulombola mu mâyi mapole?’
Mu diumvuangana ne mêyi a tshimfuanyi aa, bantu bavule, badi mu bitendelelu bia mishindu yonso, badi bela meji ne: ‘Ndi mumanye ne: tshitendelelu tshianyi ntshibi mu malu mavule, kadi ndi ntekemena se: netshishintuluke. Tshiena musue kutshilekela to. Ndi musue kuenza tshianyi tshitupa mu ditshiambuluisha bua kutshimuna ntatu yatshi.’ Ngelelu wa meji wa mushindu’eu udi mua kuikala mufumina ku disua dia muoyo mujima dia tshitendelelu tshia ba-nkambua anyi nansha ditshina dia “kutshitungila.”
Tshilejilu tshimpe ntshia Hans Küng, mushikuluji wa malu a Nzambi muabuluke ne mumanyike bikole muena Katolike, wakela meji ne: “Ndi ne bua kulekela buatu mu tshipepele, nshiila bamvua muenze nabu luendu too ne mpindieu bujitu bua kuakama tshipepele ne kujika mitanta idi ibueja mâyi mu buatu, ne pamu’apa baluangana bua kupanduka anyi?” Wakandamuna ne: “Tshiakulekela dipatula dianyi dia bipeta bimpe munda mua ekleziya to.” Bualu bukuabu bua kuenza budi ne bua kuikala bua “kudikosolola ne ekleziya ewu, bualu bua dilengulula diende pamutu pa dinanga dia ngikadilu ya mushinga mukole, ne pamu’apa, bua kuikala muena nkristo mulelela.”—Mukanda wa Die Hoffnung bewahren.
Kadi muntu udi mua kushala mu buatu bua ekleziya wende ne ditekemena dia se: Nzambi, mu luse luende, neashiile bitendelelu bionso tshikondo katshiyi mikalu bua kuakajilula ntendelelu anyi? Elu n’lunkonko lua mushinga mukole. Anu bu mudibi bileja ku tshifuanyikijilu etshi, kumbuka lukasa lukasa mu mazuwa adi mu njiwu bua kubuela mu matu makese a dipandishilangana akena bukubi kudi mua kuikala ne njiwu anu bu kushala mu mazuwa adi adiina. Bidi bia meji bua kushala mu ekleziya nansha bia munyi, nansha yeye mu ngikadilu kayi yonso anyi? Mmakokeshi kayi a diakajilula adi nawu bitendelelu bia buena-lelu? Ntshikondo bule kayi tshikala Nzambi mua kubilekela bikuate mudimu udi kawuyi mu diumvuangana ne disua diende?
[Mêyi a dianyisha bua tshimfuanyi mu dibeji 3]
Chesnot/Sipa Press