Ntshinyi tshidi lumuenu lusokolola?

TANGILA mu lumuenu. Ntshinyi tshiudi umona? Imue misangu, dîsu ditapa mu lumuenu didi disokolola mu tshimuenekelu tshiebe tshilema kampanda tshia bundu tshiudi musue bua kulengeja kumpala kua bantu kutshimonabu.

Bible mmufuane bikole lumuenu. Udi mua kutuambuluisha bua kudima mmuenenu mululame wetu nkayetu, watuepula ku ditambisha​—anyi ku dipepeja—​dia mushinga wetu ku mêsu a Nzambi. (Matayo 10:29-31; Lomo 12:3) Kusakidila apu, Bible udi mua kusokolola bilema mu mêyi, bienzedi, anyi mmuenenu bietu bidi bikengela kulengejibua. Padibi bienzeka, neulengulule tshidi lumuenu lusokolola anyi?

Mufundi wa Bible Yakobo udi wamba ne: “Bushuwa, bikala muntu kampanda muikale amu muteleji wa dîyi, kadi, kayi uditumikila, muntu eu mmufuanangane ne muntu udi utangila mpala wende mu lumuenu. Bualu, udi uditangila, uya, upua muoyo ne lukasa luonso kayi uvuluka ne: udi muntu wa mushindu kayi.”​—Yakobo 1:23, 24, NW.

Bishilangane, Yakobo udi umvuija muntu mukuabu, udi “uditangila mu mukenji mupuangane wa budikadidi, ne udi unanukilamu.” (Yakobo 1:25, NW) Muaku wa tshiena-Greke mukudimunyibue “uditangila” udi umvuija kusemena pabuipi pa kuinama anyi kubandama bua kutangila. “Bualu budi mu tshialu mbupite ne kule dîsu ditapa tshianana,” ke mudi nkonga-miaku wa Theological Dictionary of the New Testament wamba. Muaku eu udi umvuija dikebulula dienza ne lubatshi dia tshintu tshisokoka. “Kudi tshintu kampanda tshia mushinga mukole tshidi mukebi usua bua kumona, nansha mudibi mua kuikala bikole bua kutshimonaye ne kujingululaye diumvuija diatshi diakamue,” ke mudi mushikuluji wa Bible R. V. G. Tasker mufunde.

Nunku neudikonkonone mu lumuenu lua Dîyi dia Nzambi bua utumikile pashishe tshididi dilomba anyi? Yakobo udi utungunuka ne: “Muntu eu, bualu mmulue ki muteleji muvulaminyi, kadi muenji wa mudimu, neikale wa diakalenga mu diwenza diende.”​—Yakobo 1:25, NW.