Diedibua mashi didi dikonkononyibua
MU TSHIKONDO etshi tshia dibungama tshia disama dia Sida, ku lupitadi njiwu mipite bunene bua makanda a mubidi a mubedi idi mua kuikala mibutame mu tshibambalu tshia dipandila. “Kakuena mushindu utudi mua kujikija tuîshi tuonso nkong mu mashi adi malamibue,” ke mudi doktere Richard Spence udi ulombola munkatshi mua bidimu bipite pa dikumi Nzubu wa dipandangana dikena dienjibua ne mashi ku lupitadi lua Cooper Hospital-University Medical Center ku Camden, New Jersey, mu Etats-Unis wamba.
Bualu bukena kukema, nzubu eu udi wondapa Bantemu ba Yehowa bavule, badi bende lumu bua dibenga kuedibua mashi dishindamene pa Bible. (Lewitiki 17:11; Bienzedi 15:28, 29) Kadi, babedi bavule bakena Bantemu batu pabu baya ku nzubu eu, bualu badi batshina njiwu idi mua kufumina ku diedibua mashi, idi ikonga dipia hépatite, Sida, ne masama makuabu. “Divula dia Sida ndileje mudi diteta mashi dikengedibua,” ke mudi tshikandakanda tshia Courier-Post Weekly Report on Science and Medicine tshileja. “Kadi amue mashi adi mua kupanga kukuatshibua tuîshi dîba dia diateta bualu muntu udi mua kuikala ne Sida kumpala kua kusokolodibuaye ku diteta.”
Bua njiwu ya mushindu’eu, Nzubu wa dipandangana dikena dienjibua ne mashi eu udi utumika ne bipinganyi pamutu pa mashi, pa kusangisha ne dipingajiluila muntu mashi ende nkayende mu mubidi—ngenzelu udi bamue Bantemu mua kumona se: kêna mubi mu imue nsombelu.a Ngondapilu mukuabu udi utumika ne manga adi asonsola divudijibua dia mashi a mubedi. Kusakidila apu, batu imue misangu batumika ne tshipinganyi tshia mashi tshienza ne bintu bivule bua kukuatshisha diabanyibua dia oxygène kakuyi dikengedibua dia mashi. “Bantemu ba Yehowa mbanange ngondapilu mutambe bulenga,” ke mudi doktere Spence wamba, “kadi mbanange bipinganyi pamutu pa diedibua mashi.”
Bantemu ba Yehowa badi ne dianyisha bua dieleshangana diboko ne diambuluisha bidibu bababidila kudi ba-doktere badi banemeka mitabuja abu a malu a Nzambi. Bu tshipeta, mbababidile bushuwa “ngondapilu mutambe bulenga” ne mbalame kuondo ka muoyo kakezuke kumpala kua Yehowa Nzambi.—2 Timote 1:3.
[Mêyi adi kuinshi]
a Dikonkonona dialabale dia ngenzelu eu ne malu adi akengela kutabalela mu diangata dipangadika dia muntu pa nkayende, diangata ne muoyo wonso, ndifunda mu Tshibumba tshia Nsentedi tshia mu dia 1 Luabanya 1989, mabeji a 30-31 (mu Fransé).