Disulakana bua bakengesha kabayi ne bualu

MBUMUE bua ku malu mabi makuate muengu adi muntu muenza​—milambu ya bana. Bamue kabatu bitaba se: ngenzelu mubi wa mushindu’eu uvua mua kuikalaku. Kadi tshimanyinu etshi tshia ntendelelu wa bena Phénicie ntshijadikibue kudi bintu bivulavulayi bipeta pa kumbula mu buloba.

Bana bena mu mêku manême bavua balambudibua mu kapia kudi banzambi bu mudi Tanit ne Baal-Hammon. Mu Carthage, bavua buoshila lupingu lua tshiamu tshikunze lua Kronos bana batekete bu mulambu. Diodore de Sicile, mushikuluji wa malu a kale wa mu siekele wa kumpala K.B.B., udi wamba ne: bavua bakandika balela ba muana bua kudila. Pamu’apa bavua bela meji ne: binsonji bia dibungama bivua mua kukepesha mushinga wa mulambu.

Tshikondo kampanda ngenzelu wa ntendelelu wa muomumue uvuaku pabuipi ne Yeruzaleme mu Tofete wa kale. Muab’eu batendeledi bavua baja maja ne bimba ngoma bikole bua kabumvu miadi ya muana pavuaye wimanshibua mu difu dia mfulu wa kapia dia Moleke.​—Yelemiya 7:31.

Yehowa udi umvua tshiji tshikole bua aba badi ne muoyo mupape bajika matshi abu ku makenga a bakuabu. (Fuanyikija ne Nsumuinu 21:13.) Bu mudiye Nzambi udi umvuila bana luse, Yehowa neabiishe bushuwa bashipibue bakena ne bualu ba mushindu’eu ku “dibiishibua ku lufu dia bantu bakane ne dia bantu bapange buakane.”​—Bienzedi 24:15, NW; Ekesode 22:22-24.