Bakabienza bua dinanga

MUKAMBA kampanda muena lulamatu, muakididi wa benyi ku Canada uvua ukolesha bana ba bakaji banayi bu bena nkristo balelela. Bakulu mu tshisumbu bakamona se: nzubu wende uvua ukengela dilongolodibua dinene. Kavua ne mfranga nansha nzanzu ya kuenza mudimu eu nkayende. Nunku mu diumvuangana ne dîyi-diludiki dileja mu 1 Timote 5:9, 10, bakulu bakalongolola mu musokoko bua kumuenzela mudimu eu. Mushindu kayi?

Malongolola akenjibua bua mukamba eu ne bana bende bapatuke ku nzubu bua matuku atanu. Bantu bapite pa 80 mu tshisumbu bakafila dikuatshisha diabu ne muoyo mujima, pa kufila mapa a bintu, mfranga, ne dîba. Dîku ditshiyilaku, benji ba mudimu bakunguila ne dizuka ku nzubu bu mbulubulu. Pambelu pajima pa nzubu pakalongolodibua. Bimana biakalandakajibua ne kupentshibua. Siman wakapeludibua ne kuakajibua. Turo tua panshi ne tapi bipiabipia biakedibua? Biamu bia nzembu ne bia dikenkesha nabi biakakoleshibua. Nansha bintu bikavua bitumikatumika bakapingaja bipiabipia pamutu pabi. Dilongolola dionso diakenjibua anu mu matuku atanu!

Musangelu ne dikanzamuka bivua muaba au biakakemesha bena mutumba menemene. Muena mutumba kampanda wa bidimu 80 uvua mulengibue ku muoyo bikole kudi madikolela a Bantemu wakafika ku difila bulosu bua mukubua ne kufiatutukaye bua kuambuluisha. Mfumu wa mudimu wa umue wa ku bena budisuile aba wakafila mumbunda wa dipatukila muîshi wa tshilambilu tshia mu tshikuku. Mfumu wa mudimu mukuabu wakafila tubadi tua mu tshikuku tupiatupia. Muntu kampanda uvua mulengibue bikole ku muoyo wakasua kumanya bivule pa Bantemu ba Yehowa. Wakitaba ne dizuka mukanda wa Udi mua kuikala ne muoyo wa kashidi pa buloba bukudimuna mparadizu.

Dikemeshibua dijima divua difunda pa mpala ya mukamba eu ne bana bende ba bakaji mu dipingana diabu. Kuvua binsonji bivule, tuseku, ne dielangana mu tshitupa​—tshikondo tshivua katshiyi kupua muoyo tshia dinanga dia buena nkristo ne dilengibua ku muoyo. Bushuwa, dinanga dia mu mutshima ne diditatshisha bua bena mu tshisumbu bakengi ntshimanyinu tshia buena nkristo bulelela, bualu Paulo wakafunda ne: “Bushuwa, patutshidi ne tshikondo tshikumbanyine muanda eu apa, tuenzele bantu buonso bimpe, kadi nangananga aba badi balela betu mu ditabuja.”​—Galatia 6:10, NW.