‘Anu bu mudi tshiamu tshinona tshiamu tshikuabo’

KU NDEKELU kua siekele muisatu B.B., nsongalume kampanda wa disuminyina muena dîna dia Anthony, uvua mumanyike bu “Muena nkristo wa bena Egypte,” wakumbuka munkatshi mua bantu ne kuenzaye bidimu 20 mu muaba wa nkayende mu tshipela. Mbua tshinyi? Wakamona se: ke mushindu mupita kumulengelela wa kusadila Nzambi. Yeye uvua tshiasa nkaya munene wa kumpala wa Bukua-buena-nkristo.

Lelu’eu Bukua-buena-nkristo budi ne biasa nkaya bikese. Kadi bantu bapite bungi badi mu mushindu mukuabu bakeba bua kuditeka pa nkayabu. Badi bepuka kuyukidilangana ne bakuabu pa malu a ntendelelu, bamona se: diyukidilangana dia buena edi didi difikisha ku dipangangana ku mêyi ne ku matandu. Ntendelelu wabu udi nangananga wa diepuka kuenzela bakuabu bibi.

Bushuwa, diepuka kuenzela mukuetu bibi ntshitupa tshia ntendelelu mulelela, kadi bìdì bilombibue mbia bungi. Lusumuinu kampanda lua kale ludi lumanyisha ne: “Badi banona tshiamu ne tshiamu tshikuabo, badi balengeja muntu kudi muntu nende.” (Nsumuinu 27:17, MMM) Bible udi ukankamija bena nkristo bua kudisangishabu popamue, ki nkuditapulula mu malu wonso ne bulongolodi ebu peshi ne bena nkristo bakuabu nansha. (Yone 17:14, 15) Udi wamba: “Tukenketanganayi bua kusakangana ku dinanga ne ku midimu milenga, katuyi tulekela didisangisha dietu nkayetu.” (Ebelu 10:24, 25, NW) Bantemu ba Yehowa badi banemeka mubelu eu. Misangu mivule ku lumingu, badi badisangisha popamue bua ‘kulengejangana mpala muntu ne muntu,’ bibaka ditabuja dia bakuabu bena kuitabuja nabu. Mbamone se: diyukidilangana pa Bible mu buakane kadiena difikisha ku matandu nansha. Bishilangane, didi difikisha ku diumvuangana ne ku ditalala. Ntshitupa tshia mushinga mukole tshia ntendelelu mulelela.