Kuteki njiya

BIDI mua kumueneka bikole bitambe bua kuepuka diteka njiya padi muntu kampanda utuenzela malu mabi. Bible udi ne mibelu mikuatshishi bua nsombelu wa mushindu’eu. ‘Nuikale ne tshiji,’ ke muakafunda mupostolo Paulo, ‘kadi kanuenji bualu bubi; diba kadibueledi tshiji tshienu.’​—Efeso 4:26.

Padi muntu utuenzela malu mabi, bidi anu bia ku tshilelelu bua kumvua ndambu wa tshiji. Paulo bu muakambaye ne: ‘nuikale ne tshiji’ bidi bileja ne: tshiji tshidi imue misangu mua kuikala tshikumbanyine​—pamu’apa mu diandamuna ku tshienzedi tshia kansungasunga anyi ditupakana kampanda mu malu a buakane. (Fuanyikija ne 2 Kolinto 11:29.) Kadi paditshi tshishala katshiyi tshijike, nansha tshiji tshiakanyine tshidi mua kuikala ne bipeta bia kabutu, bidi bifikisha ku mpekatu minene. (Genese 34:1-31; 49:5-7; Musambu wa 106:32, 33) Nunku, ntshinyi tshiudi mua kuenza padi dikuyobola dikufikisha ku diumvua tshiji?

Mu malu mavule adi atangila ntupakanyi mikese, udi mua kujikija nsombelu eu mu mutshima webe ‘ne kushala mupuwe’ anyi kuya kudi eu udi mukuenzele malu mabi bua kuyukidilangana pa tshilumbu etshi. (Musambu 4:4; Matayo 5:23, 24) Peshi, mbitambe buimpe bua kujikija tshilumbu etshi ne lukasa bua se: diteka njiya kadivu kubudika ne kupatula bipeta bia kabutu.​—Efeso 4:31.

Yehowa utu ku budisuile utufuila luse bua mpekatu yetu, nansha mpekatu itudi bua dipanga kumanya dietu katuyi mua kumanya se: tudi bayenze. Tudiku mu mushindu wa muomumue mua kufuila bantu netu luse bua ntupakanyi yabu mikese anyi?​—Kolosai 3:13; 1 Petelo 4:8.

Bualu budi bukoka ntema mbua se: muaku wa tshiena-Greke bua “kufuila muntu luse” udi mu ngumvuilu wa ku dîna umvuija “kulekelela.” Kufuila muntu luse kakuena kumvuija ne: tudi tupepeja anyi tukankamija malu mabi. Imue misangu kudi mua kukonga dilekeledibua patupu dia nsombelu eu, pa kusunguluja ne: kuteka njiya nekuvudije dibuki diebe ne kunyanga buobumue bua tshisumbu tshia bena nkristo. Kupita’apu, kuteka njiya kudi mua kuikala ne buenzeji bubi pa makanda ebe a mubidi!​—Musambu wa 103:9.